728x90 AdSpace

Hot
Menu
Zon-ol na Donate

Latest News

Na Nu’ Anhuan Gensia Ke’n. Agelh ~ Kap Za Khai (Photoh)

Na Nu’ Anhuan Gensia Ke’n.
Agelh ~ Kap Za Khai (Photoh)
 
Nu’ Anhuan
Innkuan kipat a kipanin nu mah in anhuan hi. A anhuan pen a pasal leh a tate adingin a lim thei penpen dingin a huan hi a, a pasal leh tate in zong lim kei, tua ci hi, kici tuan loin ne ziahziah lel uh hi. Ataktak in bel nu’ anhuan pen leitungah a lim penpen ahih masak loh hangin ama’ itna ankuang ahihna kizui-in nu’ anhuan mah ne leng khum ngaungau, lim ngaungau in tha zong om deuh kisa ahi hi. A anhuanna sungah an ii vitamin sangin nu ii itna vitamin tam kihelzaw cihna hi. Tua vitamin in tate khangcingsak, pilsak, in khuasuaksak ahi hi.

Innkuan sunga nu’ huan an, sabuai tunga thuksa kikoih nu’ khutma ante pen a manpha mahmah, a limci mahmah an ahihna phawk huai hi. I nu om nawn keileh ama’ anhuan kine kha nawn lo dinga, i nu zahin itna ankuang hong huansak thei leitungah kuamah om lo ding ahih man hi. Ansai sunga ante tawmvei sungin lim kisa mahmah a, ahi zongin ngaihsunsun le’ng i nu’ khutma zah lim taktak lo ahihna kitheithei hi. I nu in inn nung huan sung pana piang ankam, chinpawng, mehnaal, zaasan cihte tawh a pasal leh a tate adingin an lim penpente nisim in ciimtak loin hong huansak hi. Nu’ anhuan mah lim pen cile’ng ka khial tam?


Tate’n Nu’ Anhuan Gensia
Nu’ anhuansa ne in mi a suak tate hong gol semsem in, an hong huan theih uh ciangin, tate in amau anhuan siamna suangin “i nu’ anhuan min lo deuh, a meh bawl tua kisam deuh ve aw, tuaci tuaci..” ci-in nu’ anhuan kigensia thei hi. Tua bang ciangin i nu hehse loin nui hehiau lel hi. Ama’ anhuansa tawh a khang a sung piang tate in amau leh amau anhuan thei ta ahihna a muh ciang a kipak ahi tam maw?

Nu’ anhuan gensiatna pen i phawk khak loh hangin nu’ hihna a gensiasia ihi mawk hi. Na nasep dan kician kei, kicing kei, kitangsapna tam lai lua, na zong hoih tak sem thei keiteh ci-a nute hawmthawh denna na hi gige thei hi. Khatvei lai-in nungak khat in a sanggamte kiangah “kei man i duh danin hong huan ning... i nu in huan leh a tui tamsak lua..” a cihleh a nu in “tua bang pau se dah...na pian a kipan na nu’ huansa tawh a khang hilo nai vua” ci ziau hi. I kammal tawh nu’ lungsim khasiasak, thaneemsak loh ding kisam hi. Ama’ hihna zah tawh a anhuan pen ei adingin a lim pen ahihna phawk ding kisam hi. Nu’ anhuan sangin tate’ huan pen a an-in limzaw mah dinga, ahi zongin a vitamin kikhai mahmah, kilamdang mahmah veve hi.

Nu’ anhuan i gensiat leh i pian a kipan tu-a dinmun leh pumpi taksa i neihna khempeuh a gensia ihi hi. Nu’ anhuan tawh a khangcing i taksa i pumpi, i lungsim le khuakte en kik dih ni. Pian a kipan nu nei nawn lote koih phot ni. Tuni dongin nu nei laite in nu’ anhuan bangci nasa uh hiam? Nu’ anhuan gensiat taak mah ahiam? Leitungah mi khat i suahna pen i nu’ anhuan hang hilo maw leh? Leitungah tate ii a kisam lopi i bawlkhak khialhna pen i nu’ anhuan gensiatna ahi hi.

Nu’ Anhuan mah Limpen
Gamdang a omte ahi zongin, inn a omte ahi zongin, i lunggulh mahmah thu khat in i nu’ khutma mahmah tawh a huan nu’ anhuan ahi hi. Nu’ khutma mah lim kisazaw thamtham hi. Innkuan kimtak in sabuai tungah nu’ anhuan nekkhop theihna kan-a a nop mahmah leh a manpha mahmah leitungah om lo hi.

Nu’ anhuan in tawldamna hong pia hi. Nuntakna leh lametna hong pia hi. Lungnopna leh kha muanna hong pia hi. Tha hong hatsak in hangsanna hong guan hi. Mehteh mehgahte ii limna taktak hong theisak hi. Tawldamna taktak leh cidamna taktak i lunggulh leh nu’ anhuan ne den in. Na pumpi taksa hong no suak semsem dinga, na lungsim leh na kha hong cidam semsem ding hi.

Kei zong mun tuamtuam ah ka zin kawikawi thei zel a, ka tuntunna ah an ka ne hi. Ansai golpipite sungah ka nek hun a om bangin, ansai neucik sungah zong ka ne hi. Ahi zongin ka zin tunna innteeknu’ anhuante mah lungmuang takin ka ne ngam a, zong lim kasa mahmah hi. Tua sangin zong, adiakdiak in ka pianna ka nu’ anhuan mah ka tuntunna pan ka lunggulh den hi. Khualzinna pan ka tun ciangin ka nu’ anhuan lungkim takin ka ne ziahziah a, ka lungdam in ka tawl zong dam hi. Leitungah an limpen a ne ka hi hi. Nu’ anhuan!

Nu’ Kipakna A An
Innkuan sungah nu’ lungdam theihna leh kipak theihna thu tampi a om lak panin khatin, a anhuanna ahi hi. A innkuan ading inn nasemte’ huan sangin amahmah in huan nuamzaw den hi. A pasal leh a tate in “Nu aw... na khutma na anhuan mahmah duh ing” cile’ng a tawl a gim zong phawk man loin kipak takin hong huansak tazen hi.

Khatvei lai-in papi khat a nu kiangah a hawh leh, a nu teek in a khut ling keuhkeuh sa-in anhuan kee hi. Papi pa in a nu kiangah “Nu aw...gimhuai lua teh, anhuan nu huansak lel ve” a cih leh “Ka ta aw, na nu’ anhuan na nek lohzawh sawt lua...tuni nong pai sunsun na nu in na nek ding hong huansak nuam ngiat ing” ci hi. Nu’ anhuan pen ama’ thupha tawh kizom leh kilawm hi. Pasal neisa tanu-te, inn tuansa tate leh khualzin pan hong ciah tate ading nute in amah ngiat in an hong huansak leh tua pen nu’ thupha hong piakna hi, cih phawk pah ding hihang.

Nu’ Anhuan Mah Lunggulh
Inn nasemte anhuan pen tavuan hang hi a, i nu’ huan ahih leh kipakna leh itna hang ahi hi. Mun khempeuh ah itna tawh kidim ankuang khat i nek khak ding haksa hi. Itna, deihsakna, kipakna vitamin tawh kidim an i duh leh i nu kiang bekah kingah thei hi. Midangte’ anhuan pen a an in lim mah ding hi. Pawlkhatte bangin guu khawng na sawh thei lai hi. I nu kiang lo mun tengah lungmuang taka an kine thei lo hi. Tua ahih manin i nu’ anhuan bekmah lunggulh huai pen ahihna ka phawk semsem hi. Anhuan dan a sinte’ anhuan lim mahmah kha ding hi. Ansaipite sunga a manpha mahmah ante lim mah kha ding hi. Ahi zongin tuate sangin i pianna i nu’ khutma kuama’n baan ngeilo ding hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Na Nu’ Anhuan Gensia Ke’n. Agelh ~ Kap Za Khai (Photoh) Description: Rating: 5 Reviewed By: Cinpu Zomi
Scroll to Top