728x90 AdSpace

Hot
Menu
Zon-ol na Donate

Latest News

SIMPILNA THUSIM. Agelh ~ Thang Do Khen

SIMPILNA THUSIM
Agelh ~ Thang Do Khen


1.     I duh mahmah ta zongin pumpi deihzah kisam zaw a, i kin mahmah ta zongin pumpi zawhzah kisam zaw hi.

2.     I gen' nop mahmah hangin a kilawmzah khat om a, i lawmte hawmthawhna in i kikalah tawpna bawl thei hi.

3.     Thuman deih lua-a thuhoih i don keileh ki tukalh dinga, ngaklah lua-a a hun i theih keileh ki paaktawng ding hi.

4.     Pil kisa in i ciakciakleh i vang kiam dinga, kipau ngam ta-kei ci a, i kisan sak luatleh huihlak ki tung ding hi.

5.     Neih khempeuh pholak-a, theih khempeuh pulakna pen kial tun cianga si masa ding cihna ahi hi.

6.     Puan tampi thuapin nuamsa takin i lup hangin, i gei-a khuadam khat i phawk keileh i ihmut kal-in i puan hong kikhenkhiat sak kha ding hi.

7.     I hamphatna pen i lawmte' hamsiatna ahih-a, i suahtakna pen i lawmte' awkcipna a suahleh leitungah mun a neilo mi i hi ding hi.


8.     Lungsim kisuanna in thanemna piangsak-a, thanemna in guallelhna piang sak hi. Tua ahihmanin na neuno khat zong kisuanna hi thei a, themno dong thupi ngaihsutna in gualzawlna piang sak hi.

9.     Kammal in vangliatna nei a, khitui in kipsakna pia hi. I tungah a khasia mite koici daihsak thei ding hiam? Awging daihsakna hilo in lungsim daihsakna hi ding hi.

10.  Nu leh pate' thuman-na pen leitu g nopsakna leh khansauna ahihmanin, khatvei thu nialna ah mat bangzah kiam dinga, i nuntakna hun bang tan kidok ding hiam?

11.  Nang mahmah in na vang ding na top keileh a pualam panin hong kipia theilo hi. Na top zahzah tawh hong kipahtawi toto hi zaw hi.

12.  Tulaitaka a gah i lawhlawhte hunkhat lai-a i nu i pate' suan na hi a, i tate' lawh ding zong i suan leuleu ding hi.

13.  Thuhoih zakna in lung nuam saka, thusia zakna in lung kham sak hi. Lungnopna leh lungkhamna pen eima' bawl' tawm theih ahi hi.

14.  Tulaitaka na pawlte hunkhat cianga na lang dingte hi thei a, tulaitaka na langte zong hunt cianga na lawm dingte hi thei hi. Leitungah a hi kimken bangmah om lo cih ei inla, na kituahpih khemoeuh nang' a' ahih lam phawk in!

15.  Cinate manphatna pen, "Nahoih geel' " hi a, Cidamte' manphatna zong, "Nahoih sep" ahi hi.

16.  Ka pu ka pate' khang panin ka kamsiat dan uh kizom toto na ci hiam? Hi zong himah hi. A hihleh tu in Jesu' khang pan kipan leuleu leng ee, "Leitung khuahun a lai zo Amah bek" ahi hi.

17.  I om na leitung pen kifemna mun hi a, kifemna tualpi-a om i hi hi. Na lawm na gualte, na veeng na paamte koi ah om! Nang koi ah om! Na huhhuhte in hong huh kik kha deh! Hong zuizuite na zui kik kha deh! Zu mun, sa mun-ah sawt na tut luatleh hong ki makhelh kha deh! A min beka tai hilo-in lukhu ngah dinga tai hita in!

18.  Miksite ka dem ohna thu ka phawk hi. Amaute in an tam muleh, "Khuakhal cianga ding" ci uh a, Ke'n an tam mu leng tam nekin, tawm mu leng ka tawm nek hi.

19.  Ka muanhuai kei lua hi. Ka mihinna nangawn ka tel zo kei hi. Guahzuleh ka hanga, ni saleh ka hang hi. Kei sangin a zawng zaw mu leng, "A phadawm hi'ng" kaci a, "Kei sangin a hau zaw mu leng, "Kei a bangci" ka ci zel hi. Nahoih sep ding ka geel-a, midang khat in hoih a sak khat hong genleh ka lung hiang hi. Ka zawh dongin hanciam ning kaci a, haksatna tuak leng, "Kei' a'ding hilo hi'n teh" kaci hi.


Mite lungkim sak ning kaci a, ka kikholhpih peuh pawlbawl' in, mihin tuamtuam tawh ka kilang kawikawi hi. "A kikawm nuntakna a vih a zang himawk veng e" ci-in ka nuntakna taktak a bang himawk hiam cih ka thei nuam hi. Kei-kia-bek ka muanhuai lohlam ka kiphawk hi. Tua ahihmanin ka theih ma-a, "Lawm" hong ci khin Jesu sangin a hoih zaw lawmdang om kei in teh ka ci ta hi.

20.  Mite' van na kawm', na piak kik ding na mangngilh khat ahizongin, lampite, khawlmunte ah a ki mangngilh khat na la ahizongin, mikhat in na huang sungah a na khat a mangngilh kha ahizongin, tua pen nang' a' dingin ni'n suak ahihmanin, a sawtsawt teh a kiim a paam siasakin, a t zaw in a yhuaklawh dinh hi. Guksim, lak simte a hihleh, a gukni leh a lakni pem a genyheij kipatmi ki ciamteh thei ding hi.

21.  "Ka thungetna Pasian in hong dawng" cih ding sangin, "Pasian hong sapna ka dawng" cih ding hi zaw hi. Banghanhhiam vihleh thunget lungngulh theihna hong pia Pasian mah hi a, i nget dingte zong hong phawksak Kha Siangtho hi-in, deihna, ngetna, ngahna a gual diudeu pen Pasian mah ahi hi. Tua teng hong kisinsak nuam-a honh sam hi zaw hi. Tua ahihmanin mihingte' tavuan pen, "PASIAN HU-NGAIHNA" ahi hi.


22.  Pasian i kiangah hong om dingin i nget sangin Ama' kiangah om zaw leng kuamah ai sak lo a, ei' deih i pulak sangin Ama' deih dong zaw leng, ei: deihte sangin Ama' deihte feih huai zaw lai ding hi.

23.  Nisuah, nitum, sak leh khang panin hitaleh Ni a en peuhpeuhte in a mailam uh en lo in a vandak uh hi. Ama: mailam khual lo a, Pasian' a: ding a kioia mikhat, a kipaltuksakte' tungah a et Pasian a lungkim lo ding hi.

24.  I deih bangbang ngena Pasian i buaisak ciangin, Pasian pen i sila a suak sak i hi hi. Pasian' deihna bang hiam cih kan a, Ama' hanhin i buai zawkleh Pasian' sila a suak ki hi pan hi.

25.  Makai i cihte pen a thei pen leh a siam pente hi tuan lo ahihmanin a hawmthawh huai na tampi om ding hi. I hawmthawhnate va gen-a hong sang theilo a hiphial zongin amau tawh i kikal thu ding-ah:- "Amah ka tungsiah, kei a nuaisiah" vih lel theihna in NUNGZUIHNA maan ahi hi.


Tua ahihmanin Nungzuite leh Makaite' theih sing ah :-
1)    Mosi in a zi neih tunhtaangah a khial zaw hi-taleh Miriam in phunsanin a phaklawh hi.
2)    Noah a zukham tungtaangah amah a khial zaw hi-taleh Ham in kamsiatlawh hi.
3)    David pen kumpi khat buang, numei hon tawh a lamna ah Michel in a mawhsak a hangin nau nei thei lo-in a cii'nlawh hi.

Tua ahihmanin :-
1)    Tua ahihmanin makaite sangin siam zaw taleng, hawmthawhbawl' loh ding hong phawk sak hi.
2)    Makaite in zong, Pasian in tua zahtakin hong gumh hi cih kiphawkin, midik mithuman khat in hong kamsiatlawh khak ding kidop huai hi.
3)    Makaite leh nungzuite kikal thu-ah, mitawpni ciangin guptuam, paihtiam om nawnlo dinga, amaan zaw leh a maanlo zaw hong kilang ta ding hi. Tua ni ciangim i hap giapgiapte khawng i tung-et khekhe kha ding hi.

Makaite' kitel theihna :-
1)    Sawl kumpipa in, "Keizong hih thei ing" ci-in biakna a piakleh innkuan in ahingmanlawh uh hi.
2)    David kumpipa in, "Kei hong mawhsak ding om kei" ci-in Uriah' zi a mawhpih leh baangkua sung buaina veng thei lo hi.
3)    Samson in, "Kei ki muang lel ing" ci-in a nu a pa' thu a manh keileh khansih lawh hi.

Tua ahihmanin :-
Ih hihna i tel keileh mite in hong kamsiatlawh thei in, ei zong a ki hingman lawh thei ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: SIMPILNA THUSIM. Agelh ~ Thang Do Khen Description: Rating: 5 Reviewed By: Cinpu Zomi
Scroll to Top