728x90 AdSpace

Hot
Menu
Zon-ol na Donate

Latest News

ZOMI LE TEDIM.

ZOMI LE TEDIM

Photo Credit : Thaw Thawn
Amun : Tedim, Zogam
         
Biakna lam laihawmte ah hi taleh leitung lama laihawmte ah hi taleh ‘Zomi’ cih le ‘Ciimnuai mi’ kici ka tammuh a, ‘Tedim’ cih kammal ka tam muh kei hi.

Gtn: Zomite lak pan a gualtungtuang masate min a kigualhna mun khatah, Tedimte min vive kigual hi. Ahih hangin tua a gualtungtuang a cihna munah Falam, Hakha le adang township pan ei sangin a gualtungtuang masazaw om napi-in amau min kihel lo hi. Bang hangin township dangte pan i sanggamte min kihel lo hi ding hiam? Tedimte sung thu bek a gen nuam hi napi hang in, Zogambup taang a i zat kammal ‘Zomi’ i zat khak man hi ding hi, ci-in ka um hi.


Zomi:
          Minamdangte (Kawlte a kipan) in ei Zomite thu hong gen ciangin ‘Chin’ hong cih uh pen i theih ciat hi. Ahih hangin ei le ei pen ‘Chin’ i kici kei hi. Ei le ei i ki-lawhna ah, Tedimte’n “Zomi’, Falam, Hakha, le Matupite’n ‘Laimi’, ci uh a, Mindat, Kanpetlet le Paletwate’n zong amau zat kammal om ciat hi. Tua ahih manin Zogambup, Chin bup thu apongin i gen ciangin Zogam, Zomi cih kammal i zang a, ei Tedimte sung bek tawh kisai thu i tuamgen ciangin Tedimte, Tedim mi, Tedim gam, cih kammal zat-huai ka sa hi.

Tedimte:
            Tonzang le Thantlangte in township a ngah maun Zogam a township khat le khat thu i kigen ciangin Falamte, Hakhate, Matupite, Mindatte, Kanpetlette, Palet-wate, Tedimte, Asho Chinte kici hi hang. ‘Tedim’ cih kammal pen leitung galpi nihna lai peka Tedim gam hong nawk Mikangte le Japante’n hong tel, hong theih, hong ciaptehna min ahih banah nidang lai peka gamdang (gtn: America gam) pan hong pai biakna lama sangmangte in zong hong theih, hong ciaptehna uh min ahi hi.

            Ka cihnopna ah ‘Tedim’ cih min/kammal pen i neu lai peka leitung mun tuam tuam pan hong kitheihna min hi. Kawlgam sung mun tuamtuam pan ahi zongin A-merica, England, Japan, Singapore, Malaysia,… gam khawngah ‘Tedim’ cih kammal va zang le’ng a theisate’n hong tel pah ding uh a, ‘Ciimnuai mi’ va ci le’ng thei lo ding uh hi. Tua ahih manin ‘Tedimte’ cihna panin ‘Ciimnuai mi’ ah kineusek suksuk kei-in kisangkhai semsem ding thupi sa ing. Ei Tedimte a kipanin Zomibup pen Pa-sian in thupha hong pia mahmah a, leitungbup level ah a pil, a siam le nasem kiom pianpian ta ahih manin i ngaihsutna le i dinmunte i liatsak semsem ding hun ta hi.

Theih ding:
1) Biakinn khawngah Pasian in ei Zomite Pasian in thupha hong pia,… i cih ciangin township danga i sanggamte zong a kihel a thugengen ihih lam kiphawk ni.
2) ‘Ciimnuai’ cih kammal pen Ciimnuai magazine, Ciimnuai laibusaal, Ciimnuai zintun buk, Ciimnuai pan Geltui ah… cih bang munte ah a kizat ciangin etlawm peuhmah hi.  

~ Khammaimit

HOLIMNA

Tedim pan Thang Ho le Kawlpi pan Lian Do pen amau vai tuak tawh Yangon ah zinsuk uh a, Yangon a om a lawmpa uh Hang Sai tawh hong holim uh hi.

Thang Ho: Lawm Hang Sai, i maia suak kikum dih ni e. Zomi, Tedim mi le Ciimnuai  mi cih vai nang koici ngaihsut na hia? gen dih ou.

Hang Sai: Zomi i cih bel Zogam sung tsp (myone) 9 sunga om khempeuh a ci hi lo ihia mataw! Tua ciang Tedim mi i cih zong bang kikupkup kul ahia? Tu huna Tedim, Tonzang le Cikha tsp sunga om pau kibang, ngeina kibang khempeuh i cih-na hi lo ahia mataw!

Lian Do: Guai, ke’n tua bel hi sa thei keng. Kawlpi ah pen ei Zomi tampi i teeng a, Tonzang le Cikha tsp pan bekbek zong tam khop mah kipha hi. Tedim mi, Tedim te na cihcih uh, a kuate hi tuan a hia?

TH: Hi lo e lawm, ni danga Tedim vuandok uk sung teng tu’n i gam khantohzia zuia kumpi’n tsp thum hong suah hang, i minam,i kampau le i ngeinate kikhel tuan lo, i veka unau khat, innkuan khat hi ve hang. Minam dang khat in nang bang Zomi?  hong ci-in nang “Ciimnuai Zomi” ci lecin hong thei diam? India gama om i sang-gamte’n “ei Tedim mite …” hong ci uh hi lo maw! Na ngaihsunpha dih ou lawm.

HS: Kei zong i veka ‘Tedim mi’ ka cihcih leh, sanggam pawlkhatte’n Tedim mi na cih uh kua hi tuan hiam? hong cihcih cianga ‘Tedim mi’ cihna munah ‘Ciimnuai mi’ peuh na ci mah veng in, Ciimnuai cih bel hong toipian mah ve aw, ‘Tedim mi’ cih pen leitungbup phial in hong theihpih uh ci leng mataw!

LD: Na gengen uh ciang hi mah e mataw, ken no teng na kituamcihna dan a ka na ngaihsut hi ven, hi mah ei, hong theisiam vuau guai.

HS: Thudang khat kikum leuleu dih ni e. Tedim lam Kawl lam khawngah misi a om ciang paakkual mah kipiapia maw, niangtui khawng zong kiawmawm lai maw?

TH: Tedim bangah paakkual zong a hih zote’n hih mah, niangtui zong a kiawmawm mah hi,  Ahi zong munkhatkhat ah sigalna teng niangtui awmna tawh a bei hun  zong om thei hi.

LD: Tulai khuahun paizia zui-in niangtui pen a awm zote’n awm henla, tuisa le thang khuaipum khawng koihin a duh peuh in bung lel leh,tua ciang paakkual zong tam man mahmah, paakkual man ding ci-in thusate kiangah sumtangin kipia hi zaw leh inntekte adingin phatuam ding cih khawng ke’n a ngaihsunsun hi veng aw.

HS: Tu a na gen pen hoihsa ing ei. Yangon ah zong si gal le’ng ni khatbup bei. Khua laizang inngol khatah misi tawh a nunungpen biakpiak theih nading i Tedim Upate’n hong vaihawm henla, hanah sivui ding teng bek motor khat bang pai hi leh inntekte ading motorsap lah phatuam, sigalte zong ahun uh phatuam ding  cih pen kei zong a na geelgeel hi’ng ei.

TH: Khai! guai, kua hong phawk lohin ei teng i thu kikup thupi peuhmah ei, pai dih vuau, i dang zong keu, niangtui va dawn dih ni ei.

Source :
ZANGKONG AWGING
KHOL 17, HAWM 189                               DECEMBER, 2006


[Lai gelhpa ngaihsutna hi a, endikpawl ngaihsutna hi lo hi,Ed.]

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMI LE TEDIM. Description: Rating: 5 Reviewed By: Cinpu Zomi
Scroll to Top