728x90 AdSpace

Hot
Menu
Zon-ol na Donate

Latest News

2017 KUM MALAYSIA GAM KUALA LUMPUR KHUAPI LEH SINGAPORE KHUAPI AH ZOMIBUP KHUADO KHOPNA AH KHUADO THU PULAKNA

2017 KUM MALAYSIA GAM KUALA LUMPUR KHUAPI LEH SINGAPORE KHUAPI AH ZOMIBUP KHUADO KHOPNA
AH KHUADO THU PULAKNA.
~ Prof. C.Thang Za Tuan 


Kimuhcil hopihna
Malaysia gam ah om u leh nau, suan leh muan, iit le ngaih sanggamteng aw,

Tuni in i vekpi in cidam lungnuam tak in mi gam mi lei ah tukhawm khawlkhawm in khua i do khop lingling theih zenzen manin cidamna leh hun hoih hunpha hong pia i biak TOPA tungah lungdam iko masa hi.

(Topa hoih hi, atawntung in Zomite’ tung-ah) cih I zin Mangpi ahi Topa phatna 3 vei awng phot ni.

September 20 ni in ZAM kipawlna Khuado Committee in Chief Guest a sap dingin na thukimna uh nong zaksak uh ciang ka nupa un angtang in ka thalawp mahmah uhi. Malaysia ah ei Zomipih te in kumsim in Biakna Pawlpi khempeuh, Khua leh Beh kipawlna leh kipawlna tuamtuamte khempeuh in kimu khawmin munkhatah nasiatak-in khua do khawm nahihman un tuni ciangciang ah Malaysia Khuado thupi pen hi kiciciat in nakithutuahna uh hong kiphat mahmah hi. 


Tuni in i Zo ngeina ah athupibel leh i neulai pek in i ngaklah bel khat ahi i Khuado pawi pen Malaysia khuapi ah tukhawm khawl khawm, lasa khawm, nuikhawm, lamkhawm, diangkhawm thei ding ihihman Topa in i vekpi in lungnop kilamdanna hong pia ciat tahen! Hih bangin i kikholh theih nading in, a vaihawm, agim atawl leh a sum a paai asi amapangpi ZAM makaite, a vaihawm a gamtangte leh Khuado a zo ding aa ong pai akuamah khempeuh tung ah zong Topa in makaihsiamna leh minam zuun siamna thupha tawh hong phungvuh toto tahen!

 Bangci in Khuado ding ihihiam?
            Hih bangin i Zo ngeina thupi ahi i Khuadopi pen i omomna gam leh lei ah i bawl theih ciangin i minam ngeina lah zomthei, ciingthei, zuunthei ihih banah, kipumkhat semsem natawh kalsuankhawm diamdiam ta ihihman in, kumdang tawh kibang hetlo-in tuni i  bawl khuado pen Khuado gim namsak phasakdeuh dih ni. LST Thuhilhkikna 31:11 na ah Pasian in lathak sakna tawh biakdingin Mawsi a vaikhahna mah bangin i kisatsuahna leh thalakna in in hih i zola ngaihno deihtak in sakhawm-in, lam khawm in  tha la masa phot dih ni.

a. Tun sungkhat piang, taang laizomteng, sinthu khat in, tuibang luang leeng e.
b. Tukawl tawi kum, khua i khenna, pupa sinthu  i lelna hi e.


Tu in Khuado thu ah 
(1) Khuado akhiatna leh athupitna 
(2) Ngeina leh Tatdan leh 
(3)Mailam ah geelbeh, zuuntohtheihte ci-in thulupi thum huamin i kikum ding hi.

  1. Khuado icih bang himawk hiam?
Zomite in Ngeina leh Tatdan (Culture & Tradition) sungah Pawipi thupi nih kinei hi. Tuate Sialsawm pawi (Lawm anneek)  leh Khuado pawi (Sawm anneek) hi.

I theihtheihsa kammal thupi ahita zongin Khuado ii a deihna suut pha kikkik ni. Zo kampau ah “Khua” cih kammal pen gentel pak theihloh zah dongin thuk in zai hi. Teenna vangkhua mun nuam, lamgialkiatna mun, i khankhiatna mun, nuntak khuasakna mun, i lungsim i khavang giahdetna mun, i neih leh lam koihna mun, daihna mun ahi hi. ‘Tui’ omlohna ah khua kisat theilo ahihman  ‘Khua le Tui’ ci-in kikop in kigen hi.  La i phuah ciangin zong, “Ciintui, Dimtui, Thangtui, Geeltui cihbangin i phuahna ah  khua ii thupitna alak ahi hi. Tua ahihman in khua leh tui, gam le lei, mun le mualte in u le nau hong ki-itsak, hong kihuaisak pen i khua pan kipan hi.

Do cih kammal in kamkawm hi-a, akhiatna nam nih nei hi.

A masa pen in ‘Khuado’ cih ciangin, kum khat sung tawntung khawh-le-tuk, khawi-le-vulh tungah thupha hong pia ‘khuazing khuasiam’ tungah lungdam kohna leh thupha ngetna hi-a, asisa pi-le-pu, nu-le-pate’ kha sam in zindo-a an limci pen neekkhawmna tawh ankuang umkhopna hun nuampen  ahi hi. Ei le ei zong zin ikidona khat hi. Lengla do na zong hi. Anthak  limci  i neek khop masakna hun  hi.
           
Khat lam leuleu ah, lungkham tuahsiat, sihna natna hong pia thei dawihang kauhangte hawlkhiat hun hi a, gal-le-sa, haksatna dona leh ahoihlo khempeuh io khiatna hi. Khua siansuahna zong hi. Hih thunih gawmin KHUADO kici hidingin ki-um hi. Anlak, Tuktun, Kumkhen, Cianlep zong ici hi. I sanggam dangte’n Tho, Fanger, Kut, Dawngpui, Kumci.. ci uhi.

Tanglai leh i pu le pate hun ciangciang ah khuado hun in lungdam leh lungzuan kigawm khawm hi- in ngaihsutna tam ahihman, sakibaak, zukitulh in khitui luang pilhpelh in lungdamna leh khansau nading in hih bangin a lunggulh late anasut khawm in thupha dawh uh hi.

  1. Tukawl tawi kum,khua i khen a, ningzukhum leh, aisa aw e.
  2. Ningzukhum leh, aisa aw e, khankumsawt ciam laileeng e.

  1. Anicin a, tutvum khawllo, dam in dawn aw, nuam ningtui hi e.
  2. Gual tatsa bang,  I  zuihna hi, dawn lungsit ken, san muangno aw e.
Khua i do an limci i neektak ciangin hong nusiasa, mual hong liamsante hi in, khual gamla ah om i tu i ta, tanau khuapih tuipihte zong hitaleh kiphawkpha diakin akha amui uh i samthei hi.

I Zola tawh hihbangin i kihehnem thei hi.
  1. Si leh hing aw, lawh zatam tawh, kumkhen lenkhuang, ging nazanam aw.
  2. Kumkhen lenkhuang, ging nazaak a leh, ngaihno keitong, suah na zanam, suah na zanam aw.

Nidang lai-in Zangkong ciangkhong  pen, pupa phaksap Zang dontual naci liang uh hi. Tu in ei Zomite Zangkong genloh gamdang mun 30 val ah teengta ihih manin I tuntunna gam ciat ah  tukhawm khawlkhawm, khuado khawm in, kikawi in zaila sakhawm in, nuamtak-in laamkhawm thei hita hang.

  1. Pupa phaksap, Malay tualnen ah, vabang laam zaideih ikhian, siing na  dildial, luangna dildial e.
  2. Luangna dildial, nunnop paal lawhna, tuan pupate’ laukha’n zong, ahong zo diai, ahong laam diai e.

Khuado ni kibang lo
Khuado ni sehsa omlo hi.  Khua khat leh khat ah kibanglo hi. Siampite leh khua upate kikum in, kha tan hun, anlak a kizawhsiang hun ki-ngim in ani ding ciangtan uhi.  Vaimim le taang ciinna gamte ah  No kha leh Tang kha (September, October) sung hi in, buh ciinna gam-te ah Phal kha leh Kau kha (November, December) sung hi thei hi.

Tuhun ciangin, Zomite sangkah le kumpi nasem tampi ki-omta ahih manin innkuan kimtheih ding deihna tawh Kawlte Thadingyut pawi sangkhak zumkhak tawh kituak in kibawl zaw hi. Kawlgam ah Kumpi masate hun lai-in Khuado pawi pen Zogam ah gazette holiday ding in Thandingyut khaliik ni ama le anung gawm nithum in hong ciapteh sak in hong pia ngei uh hi.

  1. Khuado dan
Khuado pawi pen ahuampi thu in ninga sawt hi. Tuate in: 
(1) Kigin ni 
(2) Pansikni 
(3) Khekleh ni (
4) Khuaisak tan ni leh 
5) A sian nite ahi hi.


(1)   Khuado nikhat ni  ‘Kigin ni’
Khuado ni khat ni pen ‘Kigin ni’ kici hi.  Kigin ni pen ‘Vaihawm ni’, ‘Lamsial ni’, le ‘Meilah lak ni’zong kici hi. Kigin ni in khuasung lutna lamlian khempeuh kihah sianga, khuasung kongzing le innkiim innpam kisiangthosak hi.  Singlam, tuilam le lolam kihah hi. Sep le bawl ding khempeuh kivaihawm hi.  Papite in phit lem uh hi. Khangnote in singtum pua uhi.  Meilah kisat hi.  Meilah cih pen taak kungpite apang kimeet masa a, kha nih kha thum a sawt ciangin a naai luanna naciim mahmah hi.  Tua a ciim mahmah takkung pang hei in ki-eukhia a, tua pen ‘meilah la’, ‘meilah sat,’ kici hi. Khuado hun sungin zat ding hi.

Kaubenna
Kiginni nitak in kau kibeng hi. ‘Kaubeng’ ahihkeh ‘kaudeng’ ahihkeh ‘kauhawl’ zong kici hi. Khanglui i pu i pate in dawi le kaute pen innsung, innnuai, innkuun, gultawng, beemkawm le sumtawng khawngah a om dingin ngaihsun uhi. Tua dawi le kaute a bengding meilah asau zilzel-in kiten in alomlom in kihen cinten hi. Kongsak leh kong khang ah meilah suan nading  nahtangkuak kikoih hi. Kaubet hun tatak pen khuazin phet hilo in, zankim dektak ahizaw hi.  Tualtek (Siampi) pa in a inn pan thau a lot ciangin mi khempeuh in a-inn pan un kau kibeng khengkhang hi.  Tumtheih tummawh tuamtuam teng tumin, thau lawnin kiluum ngeingai hi.

Innkuan sung pan pasal muanhuai pen khatin a khut langkhat ah meilah de hi. A khut langkhat tawh tuga-heiga peuh tawi-in innsung tawng panin inntung innnuai innkawm leh innkhuam teng bansat kawikawi hi.  Tua kaubengpa mi thum in zui-in, khat in khuang, khat in daktal le khat-in thau tawi hi.  Tua pa in:
 Dawi hang ciah ou, kau hang ciah ou,  Inndawisia ciah ou,  
Gamdawisia ciah ou, Nam hang ciah ou, Kauhang ciah ou,
Na zun namsia ei, na ek namsia ei,
Na ni cingta ei, na kha cingta ei, Na zi ang zuan ou, na ta ang  zuan ou,  
 Na khua, na tui zuan ou,
ci-in hangin, awngin, kiko gamgam hi. Kongbiang atun ciangin a tuga-heiga tawh kong pua lam deng phei-a,
            “A khe buuk kha ing ei, a ngaltaak kha ing ei”
ci-in tangko hi.  A meilah tawi khen nih suahin, lom khat kong-khang ah, lom khat kong-sak ah a kuangsa in suang-in nusia hi. Dawite honglut kik ngamloh nading in meilah kuangsa kinusia hi.

Numei naupang, nungak tangval, nupi papi khetawi thei khempeuh in meilah de kawm-in, amau innciat pan-in khuanawl lam ah dawi le kau hong hawlkhia ngeingai uhi. Khua sung lampi khempeuhtang zeizai hi.  Khuanawl kiciamna mun a tunkim uh ciangin, a meidette uh nusia uh a, dawite in hong zuih kik nonloh nading ci-in khuazingpi sungah ciahkik uhi.
            Hih pen kaubeng kici hi-a, khua siansuahna ahi hi. A kum cingta akha cingta, dawi le kaute in a khua atui uh zuan hen. Khuasung innsung siangtho tahen ci-in a nuai a bangin khangluite in la in sa uhhi

  1. Kum kikhen e, solkha dang e, ziin in vangkhua zong hen aw.
  2. Ziin in vangkhua lam zong hen aw, Sian sung tui bang siang hen aw.

(2)   Khuado ninih ni ‘Pansik ni’
Khuado ninih ni pen ‘Pansikni’ kici hi. ‘Khuado pini’ ahi hi. Ulenau ahihkeh beh-le-phung inn nga inn sawm ciangciang ahihkeh sawm (tangvalte giah khawmna mun ahihkeh haam) neite in asawmte uhtawh kipawl khawm-in innpi ah pawi bawlkhawm uhi. Khua sungah a pawlpawl in ki-om in khawlkhawm uhi. Kum bul in a banban-a kiseh, kum khat tawntung akikhawi vok kigo hi.

Zingsang vaihamsan ciangin papite in vok go in, sa bawl uhi.  Nupite in tuitawi uhi. Naupangte in sazunbu mut in inntual ah bawlung sui uh hi. Mi khempeuh in na kisem in nuam kisa mahmah ngeingai a, khuasung khempeuh kigamlum henhan hi.  Khangnote in khuang le dak tumin, a sisate phawkna-in mualte hahsiang uhi.

Khuado sa kihuan a min phetin sanam teng themno khat ciat eukhia-in, tua kum sunga misi a nei innkuanpihte kipuak hi. Tua sanam kikholhte pen misite a dingin kituamkoih hi.  Nikai ciangin nupite in zu khaihsa leh taaksih tawh sanamte kengin han-ah va pai uhi. A sisa a innkuanpihte’ luguh pen sathau tawh zutzut uhi.  Zu tulh-in sa le taaksih lui uh hi. Hih pen ‘Si-ansiah’ kici hi.

Khuado ni pen si leh hing kikhakna hun in kingaihsun ahih manin mi pawlkhat lungleengin kapkap uhi. Thang Ho in anau Lian Do a ngaihluat manin laphuak a,

a.  Do na ling ling, do na ling ling e, gual in kumkhua  do na ling ling e.
b. Gual in kum khua do na lingling e, Do han ah nau bang va kap tang e.

na ci ngeungeu hi.  A nung ciangin Zomite’ khuado lapi hong suak hi. Hici bang-a han paina pen ‘Daihawh’ kici hi.

Khuado ni-in a om theilo khualzinte le hanmual hong liamsan ulenaute kingai phadiak hi. A sisate’ kha a sam dingin lolam ah kipai a,‘Lo lamah asisate kha a om uhleh, zu le sa neding hi ung, hong ciah un’ ci-in sam in , suangthu khempeuh va sawnpai uhi.

Nupite’ daihawh kikal-in, inn-a om papite’ in dak tum in na lam uhi. Dai hawhte hong tun uh ciangin papi dak tum a lamte zong tawlnga uh-a, ankuang lui in, nitak an kinekhawm hi.

Khuai kila hi
            Khangluite in khuaipheeng en-in kumsaan uhi.  Tua a etding khuaipheeng pen, Ngaltun, Ngalthen, Khuaithuum, Tuunpi cihbang khuaikaite hi-a, hawikhol uhi. Tua khuai kihawi pen Khuado nitak in kila hi.  Khuai la ding a gamkuante in ‘Khuaisah zu’, Khuaikhau le naang lukhu’ keng uhi.
           
Khuaikai alakkhit uh ciangin khuaipheengte lak pan ahoih, ataksa penpen khat kumsaan nadingin ciamteh uhi.  Khuainote tungah a tuam dildel a paan pen damtakin hawkkhia uhi. Tua khit ciangin khuaipheeng tungah  khualu lam, khuataw lam git-in ciamteh uhi. Khuaino zawngkhal khempeuh hemkhia in a etlawmlo khempeuh hahsiang uhi.  A kisia lo dingin  naang lukhu sungah kang takin koih uhi.
           
Khuai lakna pan khuaipheeng koihna naang lukhu tawi in  hong ciah uh ciangin a sau mahmah khuaikhau lamdung zui-in khung uhi. A kigamlatna kikim dimdiam in kigual uh a, mikim in khuaikhau lensa in meilah deciat uhi.  Phittum in awn kituak diamdiamsa-in khuasung hong zuan uhi.  Khuasung pan-in, nupi papi, nungak leh naupangte in lawptak-in nadawn uhi.  Numeite in zu-um sungah zutaak (khaihsa) lim penpen thun in a lawmte uh va tulh uhi.

Tua khit inntual zang hong tun uh ciangin lamvui kipan in zan tawntung phialin kilam hi. Thang Ho leh Lian Do te la kisa hi.

Khua pawlkhatte ah khuailak omlo in annekhit ciangin khuanawl ah sapi beng kineih in puanza tawh napateh tun in sapi man bangin hong lut uh a kidawn ngeingai leuleu hi. Amau hong tun ciang in I pawlpawl ciat ah lamvui kipan ngeingai pah hi. Khuado la sa-in kilam pah ngekngek  hi.

(3)   Khuado nithum ni,’Khekleh ni’.
            Khuado nithum nipen kheklehni kici hi. Hih ni in khuai tawh ai-kisan in ni-tak ankuang ki-um khawm leuleu hi.
           
Kheklehni in naang lukhu sunga kikoih khuaipheeng pen khuaitawipa in khuatual manawh in paipih hi.  Tua mun-ah upate in na ngakkhol uh-a,
           
“Sanno na hih leh na kik in, miim leh sawmtaang na hih leh hong lut in’ ci-in na kal uhi.  Khuaitawipa in, “Sanpi sanno hikeng, mim le sawmtaang hiing” ci-in na dawng hi. Tua banga thumvei akikalh akidawn khit uh ciang-in  tualsung lutsak pan uhi.  Sanpi sanno cih ciangin natpi natneu cihna ahi hi. Tual a lut uh ciangin vial khat kimkot in hih bangin khuaila sa uhi.

a.     Ka lo nawl a khuai aw e, sim ngalthen zo ngalthen maw, nang in kumkhua na thei a kong dong e.
b.    Nang in kumkhua na thei a kong dong e, ningzu a ke’n dong, aisa a ke’n dong e.

Nitak lam ciangin khuasung upate in khuaipheng vel uh a, khuainote in akhuhna a paan a na lamkik uh leh mimbeemtaangbeem alamlam hi, kumkik ciangin an kihau ding hi, ci-uhi. Khuaino a si a om leh kumkik sungin a si a mang om ding hi ci uhi.  Numei nupang leh naupaaite ki-ensak lo hi.  Khuaipheeng pen sia taleh pha taleh, mipi lungnop theih nadingin  “Khuai Hoih Hi” ciden  uhi. A nitak ciangin sawm nungak tangvalte kikawi in nuam kisamahmah in lam uhi.

(4)   Khuado nili ni, “Khuaisak tanni”
            Khuado nili ni pen “Khuaisak tanni” kici hi.  Khuaisak tanni in khuai ki-ai hi.  Khuai-aih ciangin vok tawh ahizongin, keel tawh ahizongin, aak tawh ahizongin ki-ai thei hi.  ‘Keel tawh khuai a-aite pen asih khit uh ciangin aluang bawm ding thote khuai in hung hi’ci-in ngaihsun uh ahih manin  keel tawh khuai aih ding thupingaihsut mahmah uhi.  Nitak ciangin nungak leh tangval   lamtual mah ah kituntuah-in geelzu lup in lasa in, lam liailiai  leuleu uhi.  Khuaisak tanni in pawl omna inn ciat-ah khuai-aihna sakuang ankuang umkhawm-in gualnuam mahmah uh hi. Ak tawh a kheklehte in akkhai cih kidong uh hi. Akkha teng zong gual diudeu in  guamung ah kikhai in inntualzang ah kiphut dep hi.

Geelzu
            Geelzu pen ‘Taang sawmnih zu’ zong kici hi. Taang seu 20 tungsiah a nei an haute in alup uh zu ahi hi.  Khuasung tangvalte in khua mite’ an neihzah ciamteh uh-a, taang seu sawmnih anei peuhmah geelzu lup dingin gam pah uhi. Tua ban-ah taang seu sawmnih aneilote ading in  zong lawh ahoih bekkhat bawl-in a banban in dong uhi.  Mai kum ciang an ahau nuam peuhmah in zong geelzu lup thei hi.
           
Tualteekpa in zu teep in khual-lam nga-in phih kawikawi hi. Tua khit ciangin taangpi taangta in teep thei pan hi. Khuangtumpa in mipite cimdong lampih, la sakpih khit ciangin mipite a inn ciat uhah ciah in kikhen uhi.

(5)   Khuado ninga ni “ A sian ni’
Khuado zawh ninga acinni pen ‘A sian ni’ Kici hi.  Utna peuh-ah kihawh, kiciahtheita hi. Mipite en geelzu lupna lamtual mah ah kituahkik uhi.  A nunungpen gualnop ni ci-in la sasa uhi.  Lam lam uhi, Khat-le-khat ki-aam in nuamsa mahmah uhi.  Pawl khatte zanhak lai uhi.  Nuam kisa in ki-aam nuamlai tale uh a hun cing-in khuado pawi khengta ahih manin utlai pipi mahin innlam zuantek in , Khuado pawi akizo hita hi. Nungak leh tangval bek thamlo-in, mi khempeuh aading-in  khuado pen kum khat tawntung a gualnop pen hun uh ahih manin, kumkik khuado kal ding kingaklah thei mahmah hi.

  1. Khuado tawh kisai in bangin do leng thuphateng santheih ding lungngaih huai hiam? Bangci zuun tohtoh ding ihihiam?
  1. Ngeina kepcing siamna’ng
1.     Tu a i sutpakteng pen i ngeina hoih lak ah I ngeina pawi a lian pen leh anuam pen Khuado pawi thu theih nading hi. Khuado cih thulaigil leh thu hoih nonote eikhang hun in zong telin, kemcing in, zuun tohtohna tawh bawldet na hangin i ngeina zopna leh i minam tawisanna lianpen khat ahihna i omnana ah kimitsak lo in i tu i tate, i suan i khakte in a theihtel nading uhleh akepcing zawh nading uh, khang kiluahsuksuk zote ihihzawh nading i deihna bulpi hipi pen hi. I ngeina I kepcingzawhna tawh I minam tawisang den hih ni.
2.     Ei Zomite in khuado ikipatcil pen Ciimnuai ah i tunma in ana neikhinta phial-uh zongin kiciamteh khalo hi. Khuado la atamzaw pen Thang Ho leh Lian Do te la vive hi. Tua ahihman in Cimnuai leh Geeltui aa i teenlai akipan in Khuado kician pen hi cih i ciamteh pah ding hi. Tangthu sutte ngaihsutna ah Ciimnuai i tun pen AD 1420 kim hidingin kilam-en in kiseh hi. Tua hileh khua i do kipat pen 1420-1500 kikal hiding leh I do zawh kum 600 val bang upakhin hi cih ciaptehin ciin ding hi.

  1. Biakna leh Ngeina Tonkhop sak siam ding hihang
3.     Khristian Biakna ei gam ah hong lutcil in amakai masa pawl khatte in i biakna thak leh i Zo ngeina hoih omsate bangci tonkhawm sak thei mawkding ihiam cih khentat theizawk lo-in sawtpi kum kivei in i ngeina hoihte zomlo, i la ngaihte salo leh i laam siamnate zuunlo-in i mansuah khin dektak hi. Tuhun Biakna makaite leh akuamah peuh in thu muhsiamna thak adik tawh iki makaihta hi. Kuamahpeuh in zuunsiam  semsem theih nading un hih late dawng nih tawh ki- tawsawn dih ni.

a. Sian sinthu leh, pupa sinthu, khangdamtui bang, gawm thei leeng, hong kilawm pen e. 
b. Hong kilawmpen ei, pupa sinthu zong, tung Sianmang in,  nibang awi hi e.

a. Pupa tuan sin-thu lah zilvawi, tung Sianmang sin-thu lah zilvawi e.
b. Sinthu phateng, kaitui bang gawm vawi, momno eikhan, sang kitawi vawi e.

            Biakna omlo Ngeina in amawknapi ahihmah bangin, Ngeina tawh akitonlo Biakna zong a   gui zam zolo in a kuitung zo tuan kei hi. Biakna leh ngeina pen akikhensiang ding ahikei a, agawmtuahdan siam zawkna tawh akitonkhawm sakding bek ahizaw hi.

  1. Zomite in Khuado thupha dawh siam ni.
4.     Tuhun ciangin, nidang lai a ngeina te teekteek kizangthei khin nonlote ahun leh Biakna paizia zui-in ahoihzaw in i zuun totota hi. Tua hi-a Zomite Khuado pen kum khat sungin  i sep i bawlna tungtawnin i ngah thuphate sim-in, hong siam Pasian tungah  lungdam kohna in kizang ta hi. Innkuankuan leh beh leh phung zui a ankuang umkhopna bek ban-ah Pawlpite’ leh Zomi bup in I omkhopnana ah Pasian biakkhopna, i vekpi in kipawlin khanghamte tung ah zahtakna leh Tel piakna tawh  bawl in  thupha dawhna in i zangta hi.  Khanghamte in khangmoite tungah thupha piakna hunhoih pen hi. Khangthakte aadingin Zo ngeina hoihte upate kiangah thudotna leh kigen thu-ngaihna, lasak siam kidemna, lamsiam kidemna, cihbangin siamna kidemna lahna leh thuhoih kikup, kidemna, khangno pahtakhuaite kipahtawina leh thupha kipiakna in zat huaitektek ta hi.
5.     Malaysia aa ikivaanna leh ikihuaina ahi ZAM in hong makaihna tawh khua i dona ah abeisa hun in lawhsapnate lungsim siangtho tak-in kikum ngiamngiam kik-in kipumkhatna leh masawn theih nading thumuhsiamna tawh geelkhawmna  athakthak neini cih kong zawn nuam se toto  hi.

a.  Hong kikawivuau, lia leh taang aw, pupa pianzil, meiibang thengkuan e.
b. Meii bang thengkuan, pupa pianzil,  nahzu bang puah,  dihni guai aw e.

Thukhupna
Hih i khuado ii athupitna pen atom in pulak kik pak lehang:
  1. Khuado icih in kumkhat sungin  i khawi-i vulh sa limci leh i khawh i tuk anthakte tawh cidam in ankuang umkhopna, leengla kidona, asisate nangawn tawh an nekhawm in I iklungnopsakna hi.
  2. I dah ikahte leh hatsatna, gentheihnate nelhsiah in khua asiasakthei adawi, akaute do khiatna leh khuasiansuahna ban ah ahoihlo igamtatnate dokhiatna zong hi.
  3. Zomite ngeina hoihte, lasak leh laamnate kepna, lahna leh khangthakte muhsakna hi. Hilhna zong hi.
  4. Mailam aading lam-etna leh I Biakna paizia thak tawh thupha dawhna, khanghaamte Tel piakna leh khangthakte sungah kipahtawina zong hi.
  5. Tuhun in ei Zomite kipumkhat in  mapankhop theih semsemnading leh ikisap bulpi thuthumte ahi (1) Ei kua? (2) I kimakaihna bang leh (3) Mailam ah bangci kalsuan in Makai hoih leh nungzui siam hih nading cih  akipan kikup theihna hunhoih zong ahihi.

LST kammal khat ah, “Sanggamte aw, note khat leh khat  kithutuak-in, pawl kikhenna omkha lo-in, na lungsim, na ngaihsutna uhleh  na ngimna uh nakikhat sak un”(1Kaw.1:10) ah acih bangin  Biakna makaihna tawh ngeina kepcingna-ah kithutuahna-in deihna bulpi ahihman-in akuamah peuhin maitai tak-in tukumakipan in mapangkhawm thakna  neiciatni.

       Bangbang hitaleh kumkhat sung cidam inTopa in hong kem a, maikum Khuado ah zong kimukik ding ilam-etna in hih Zola tawh khum dih ni. (Sakhawm zuaizuai dihni ei.)

a .Kum khen ningne, seino gual aw, Siansiam taangbang, damciat leeng ciing e.
b.Sial zatam leh, lung i zuan teng, nuaciang siahin, kumkhen tawh sen, leh  
   khawm tani e.

I biakTopa Pasian in akuamahciat lungnopna, lawhcinna leh maitaidetna tawh mazan daupaina tuni akipan in kumthak sung athakin I biak Topa in Thupha hong piakkim ciatna hi tahen!

PS. Malay ateen October 16 ni in do in Singapore aate in 22 ni in do uh hi
                                   
Prof. C.Thang Za Tuan & Nu Cin Khan Lun
2017 kum Malaysia gam Zomi Khuado ah Zinmangpi

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: 2017 KUM MALAYSIA GAM KUALA LUMPUR KHUAPI LEH SINGAPORE KHUAPI AH ZOMIBUP KHUADO KHOPNA AH KHUADO THU PULAKNA Description: Rating: 5 Reviewed By: Cinpu Zomi
Scroll to Top