728x90 AdSpace

Hot
Menu
Zon-ol na Donate

Latest News

BABYLON KHUAPI TANGTHU.

BABYLON KHUAPI TANGTHU.


Babylon khuapi pen tang lai in Mesopotamia gam Akkad mite khuapi hi in Tigris gun leh Euphrates gun kikal ah om hi. Babylon khua pen Bible sung a, Babel khuapi, Nimrod sat leh lam pen hi a, BC 2300 kum hiding in ki um hi.

A kisiacip (The ruins of Babylon) Babylon khua pan km 5 na ah Hillah khuapi om a, Babil Governorate or Babylon Province, Iraq gam, Iraq khuapi(capital) Bagdad panin a khanglam km 85(53 milel) na ah om a, 2015 kum in mi phazah1,729,666 ahihi. Babylon khuapi pen kamsang Ezekiel kivuina ahi hi. A kisiacip Kish khuapi zong Babylon khua mun lui pan km 6 na ah om hi. Khuapi kisiacip mah Alberes khuapu zong Hillah leh Al-Khifil kikal ah om in hih khua ah tausang mamah(tower) khat om hi.

Nimrod khit ciangin Amor mite(Amorite Dynasty) te in BC 1894 pan in Babylon Empire ah ukpi sem uh a, khuapi (capital ) pen Eridu ahihi. Medopotamia gam Ukpi Hunmurabi (1728-1686) in khuapi pen Eridu panin Nippur ah tuah in khuapi siangtho(holy city) ci hi. Nippur pan in Mesopotamia gam khuapi pen Babylon ah kituah kik hi. BC 1770-1670(kum 100) sung teng leitung ah khua lianpen(largest city) hi in mi 200,000 om hi. Tua khit ciangin BC 612-320(kum 300 dektak) sung, Chaldea mi Nabuchadnezzar te hunsung, Persia kumpi Cyrus the great te, Darius I the great, Macedonia mi Alexander the great (330-323) te hun sung zong leitung ah khuapi lian pen leh a vanglian pen a hih hun a hihi.

Babylon khuapi omna Mesopotamia gam pen Babylon minam ih cihte(Amor mite, Kassite mite, Assyria mite, Chaldea mite, Macedonia mite, Persia mite, Elam mite, Media mite) tuamtuam in uk hi. Babylon khuapi a ukte;
1. Amor mite : BC 1894-1530 (kum 364 sung)
2. Kassite mite : BC 1530-730 (kum 800 sung)
3. Assyria mite : BC 729-626 (kum 103 sung)

Neo Assyria Empire kumpi te sung pan Israel gam a sim a, Samaria khuapi a la te Tiglath Pileser III (729-727) leh Shalmaneser V (727-722) ahi uhhi.

4. Chaldea mite(Chaldean dynasty) : BC 626-539 (kum 87) sung. Tua te pen ;
(1) Nabuaplausur (626-605),
(2) Nabuchadnezzar II (604-562), Daniel in Bible.
(3) Amel Marduk (562-560) Jehoiachin in Bible.
(4)Nergalsharusur (560-556),
(5) Labashi Marduk (556),
(6) Nabunaid (556-539) Mesopotamia gam Babylon khua pi a Chaldea mi kumpi sem nunung pen ahihi.

BC 605-562 sung in Babylon kumpipa Nebuchadnezzar in a zi Amytis of Media a dingin Hanging Garden of Babylon a kici lam a, tua hunlai in leitung ah mun minthang pen hipah hi. Ahihangin kamsang te tungtawn in Pasian gensa mah bangin BC 100 kim a nakpi tak a zinling in susia cip hi.

5. Persia mite(Achaemend Empire) : BC 539-330 (kum 209 sung) Persia kumpi te;
1) Cyrus the great. (539-530) A founder of Achaemend Empire.
2) Cambyses II (530-522),
3) Bardiya (522),
4) Darius I the great (521-486),
5) Xerxes I the great (485-465) (Ahasuerus-Esther in Bible).
6) Artaxerxes I Longimanus (465-424) Ezra & Nehemiah in Bible.
7) Xerxes II (424),
8) Sogdianus (424-423),
9) Darius II Nothus (423-405),
10) Artaxerrxes II (404-359),
11) Artaxerrxes III (358-338),
12) Artaxerrxes IV (338-336),
13) Darius III (336-330),

6. Macedonia mite(Seleucid Empire) : BC 330-142 (kum 188 sung) Macedonia kumpi te;
1) Alexander the great (330-323),
2) Alexander IV (323-309),
3) Seleucus I Nicator Satrop (311-305),(king 305-281),
4) Antiochus I Soter 291,(281-261),
5) Antiochus II (145-142)

7. Leitungah Iran mite(Parthian Empire) te hong hat leuleu uh a, Seleucid(Greek mite) te leh Parthian te kaikal BC 238-129(kum 109) sung gal kido na om a, BC 141 kum ciangin Mesopotamia gam leh Babylon mite pen Parthian te khut sung tungta hi.

8. Leitung ah Roman te hong hat leuleu uh a, Roman te leh Parthian kikal ah BC 66- AD 217 (kum 283 sung) sung Mesopatasmia gam ah gal kido na om hi. Tua banah Mesopotamia gamsungah galkido na bei theilo in Sassanid mite hat mahmah uh a, Muslim te hong hat kumzalom 7 na tawh kizom hi.

Hi bangin Mesopotamia gamsungah kum 500 val sung galkidona bek bek hong om ciangin khuapi tampi kisia cip in bei mang a, tuni dongin a ki lam kiknai lo khua tampi om hi.

BABYLON KHUAPI THU LAISIANGTHO GENNA TE


Babylon khuapi cih pen numei in gen hi. Khuapi in mipi a genna ahihi. Khuapi in leitung kumpi te uk a, khuapi min pua numei pen leitung a kipawlna lian mahmah genna hi a, tua te pen politics leh sum bawlna lam hi lo in biakna ahihi.

1. Babylon pen biakna ah numei paktat tawh kibang hi;
Mangmuhna 17:1-2 Hong pai in; gun tampi gei-ah a kilam a paktat mahmah khuapi gimna a kipiakzia ding ka hong lak ding hi. Leitung kumpite in tua a paktat mahmah nu tawh gamtat hoih lo gamta uh a, leitung mite in ama paktatna leenggahzu dawnin a kham uh hi.

Mangmuhna 17: 5 A taltang tungah, "A paktat numeite le leitung kihhuainate khempeuh a pianna, A Lian Babylon Khuapi," ci-in khiatna tuamkhat a nei min a kigelh hi.

Mangmuhna 17:15 "A paktat numei a tutna gun tuite pen minam tuamtuam, pau nam tuamtuam a zang mihonpite ahi hi.

Numei(mihing) in tua bangte hih theilo ding ahimanin Babylon khuapi pen a genna ahihi. Tua ahih leh numei paktat in bang a cihnopna ahitam.

2. Leitung kumpi te a uk numei paktat;
Mangmuhna 17:18 Na muh numei pen leitung kumpi khempeuh tungah ukna a nei khuapi ahi hi.

James 4:4 A citak lo mite aw, leitung tawh kipawlna pen Pasian tawh kigalneihna ahih lamtak thei lo na hi uh hiam? Leitung tawh a kipawl mite pen Pasian tawh a kigalneih dingin a kibawlbawl ahi uh hi.

3. Babylon pen sum bawlte hauhna;
Mangmuhna 18:3 Bang hang hiam cih leh ama hukna leenggahzu mi khempeuh dawnsak a, leitung kumpite tawh paktat a, ama hukna hangin leitung sumbawlte in a hauhlawh uh hi,"

Mangmuhna 18:9 Amah tawh paktatin a kiphasak khawm leitung kumpite in tua khuapi a katna meikhu a muh uh ciangin dahin a kap ding uh hi.

Mangmuhna 18:10 Hih a vanglian Babylon khuapi in a thuakna, bangzah takin lauhuai-in, bangzah takin nasia! Nai khat sung bekin hih zah gimna thuak!

Mangmuhna 18:15-17
15 Tua khuapi sungah sumbawlin a hauhlawh mite in ama thuakna a muh uh ciangin lau-in a gamlapi-ah dingin kapin thum ding uh a, 16 "Hih a lian khuapi in a thuakna, bangzah takin lauhuai, bangzah takin nasia! Puan hoihnono, a dupsan le a sante silhin, kham, suangmanpha, le kepte tawh a kizem ngei khuapi! 17 Nai khat sungin a hauhna khempeuh maimang ta!" a ci uh hi.

4. Babylon pen mikhem(dawisiam) te hi;
Mangmuhna 18:23 Bang hang hiam cih leh na sumbawlte, leitungah a thahat pen hi a, na ai tawh leitung mi khempeuh na khem hi.

Mangmuhna 18:2 "A Lian Babylon khuapi kicim, kicim!
Tu-in dawite' kua suak khinta-in, kha gilote' omna suak khinta a, a kihhuai, a muhdahhuai vasa namkim in omna-in neita uh hi.

Thuhilhkikna 18:10-12 Note lakah a tanu ahi a, a tapa ahi zongin biakna-in a zang, ai a saan, khong a khai, mailam thu a gen, ai a tawi, bum a zang, van a kah, sikhate tawh a kiho, sikha thu a dong kuamah na om kei ding uh hi. Bang hang hiam cih leh hihte a hih mi peuhmah Topa a dingin a kihhuai ahi hi.

5. Babylon pen kamsangte leh misiangtho te a thatpa;
Mangmuhna 18:24 Nang Babylon khuapi, hih bangin gim hong kipiakna pen kamsangte le mi siangtho a kithatte' sisan le leitungah a kithat mi khempeuh' sisan nangma sungah a kimuhna hang ahi hi,

Mangmuhna 17:6 Tua ciangin mi siangthote le Jesuh tungah a cihtak uh manin a kithat mite' sisan dawnin zukham a batna ka mu hi.

7. Babylon khuapi a siatna
Isaiah 13:19-20
19 Khaldea mite' hoihna, a kiphatsakpih, kumpi gam a minthang bel Babylon khuapi pen Pasian in Sodom le Gomorrah a siatsak lai hun bang ding hi. 20 Khang tawntungin tua lai-ah kuamah teng lo ding a, tua lai-ah kuamah om ngei nawn lo ding hi.

Isaiah 14:12-14
12 Nang Khuavak' ta, Zingsol, Babylon kumpipa aw, vantung panin nang bangci kiat na hi hiam? Minamte a niam koihpa ahi nangmah leilak dongah hong bangci kiphukpai ahi hiam? 13 Nang in na lungsim sungah, 'Vantungah ka kahto ding hi. A sangna mun, Pasian' aksite' tung pekah ka kumpi tokhom ka koih ding a, leilu lam peka kikhopna mualtungah ka tu ding hi. 14 Meiite' tung pekah ka kahto ding a, Sang Pen pa bangin ka kibawl ding hi,' na ci hi.

Isaiah 14:22-23
22 Vanglian Topa in, "Amaute' langkhatah ka pang ding a, Babylon min le a omlai mite' tate le suanlekhakte ka susia ding hi, Topa in ci hi. 23 Saphulipte' om nadingin tua khuapi bawlin, bualtui ka suaksak ding a, siatna munphiah tawh ka phiatkhia siang ding hi," Vanglian Topa in ci hi.

Jeremiah 51:61-62 Seraiah kiangah, "Babylon khua na tun ciangin hih thute khempeuh na sim ding a, tua khit ciangin, 'Topa aw, hih munah mihing hitaleh ganhing hitaleh bangmah teng loin, a tawntungin a kinusia a suah nadingin na suksiatna ding na gen khinzo hi,' ci-in thu ngen in.


Agelh ~ Pa NK Nangtawng

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: BABYLON KHUAPI TANGTHU. Description: Rating: 5 Reviewed By: Cinpu Zomi
Scroll to Top