728x90 AdSpace

Hot
Menu
Zon-ol na Donate

Latest News

KHUADO THU LAIGIL Agelh ~ Dr. Pum Khan Pau

KHUADO THU LAIGIL
Agelh ~ Dr. Pum Khan Pau


Tukum Khuado hun hong tun tawh kituakin Zomite in i pu leh pate’ lungtang leh lungsim puakzia Khuado Thu Laigil nam sagih bulphuh in lungngai kik ni.

Kiginkholhna (Preparation):
Khuado pen kumkhat in khatvei bek kibawl ahih bangin pu leh pate in nidangin hih pawi pen mawkzat lo-in limtakin kigingkhol masa uh hi. Kum bul tung akipan Khuado cianga gawh ding ganvul uh a, tua pen pawlsa zong kici hi. Tua banah meidet ding meilah a kicingtakin la khol uh hi. Tua mah bangin ann zong la kholin khuado na ding a kisam khempeuh kigingkhol uh hi. Kiginkholhna limtakin a neih manun Khuado hun ciangin nek leh dawn kicing takin om a lungdam takin zang uh hi.

Minam pawi ading bekin kiginglua lawmlawm leng lah mimal leh innkuan a dingin hoihlo a, kiging het kei leng lah minam it zawh lohna lim a suak hi. Pu le pate in Khuado ading limtakin a kigin kawmun amau nisim nasep khiam tuanlo uh hi. Minam ading in a pan mah bangun amau innsung ading zong a kicingin sem veve uh hi. Kiging khol uh ahih manin minam a itna uh kilang hi.


Kikupna/Kithuzakna (Discussion/ Consultation):
Khuado ding vaihawmna kician nei hamtang uh hi. Vaihawmna ah upate leh makaite kisamkhawm liailiai-in kikumthei uh hi. Kidong, kiho, kithuza uh hi. Khat bek ngaihsutna sangin upa makaite ngaihsutna lakhawm diamdiam uh hi. Tangtat loin kikum uh a, semkhawm uh hi. Kikup leh kidot ding thupisak uh hi. Zomi tangthu ah hausa leh ukpi kiukna a thahat lai nangawnin upa vaihawm na om in kithuza/kikum in vaihawm uh hi. Minam vai thupite ah ngaihsutna kidong diamdiam uh hi. Nidang in a thei/tei zaw khat peuh leh thunei zaw khat peuh in a deih bangin vaihawm ziauziau leh zong mipi in khuamu nailo ahih manin kizui diamdiam lel ding hinapi tua ci loin vai thupi khatpeuh ah na kidong/kikum tangtang uh hi. Tuhun teh pilna a khan tawh kituakin thutheihna zong sangta ahih manin kikum lopi leh kidong lopi in minam vai thupi hawm khak ding pen kidophuai hi.

Kihuhtuahna/pankhopna (Unity/Cooperation):
Pu leh pite in Khuado ding hun a nai ciangin ann lakhin nailote lakpih in kihuh diamdiam uh hi. A thanemte panpih uh a, a zekaite kingakin kihuh uh hi. Amau nopsakna ding ahihnak leh midangte don nawnlo cih bang peuhmah neilo uh hi. Nasep man kim nai lopi-in Khuado bawlsan lo uh hi. Kihuh nopna lungtang (they have a heart for others) nei ngiat uh hi. Ki-it kikhual mahmah uh cihna hi. A manlangte’n a zekaiten gak/panpih in, a theizawte’n a theilozawte hilh leh theisakin, a siamzawte’n a siamlozawte sinsak nopna lungtang pen I pu le pate lungtang ahi hi. Tuate tuni in Zomite in mansuah loin I zatzat ding hi a, tua pen minam itna taktak ahi hi. Alang khat lamah Mangkam tawh gen ni ci le’ng: Your success or enjoyment should not be at the cost of your fellow-community.

Kisiansuahna (Santification):
Khuado cih kammal taktak in dawi leh kaute do in hawlkhiatna, tuate pan kisiansuahna ahi hi. Khuado ni-in inn sung leh khua sung panin dawi leh kaute not gawp uh hi. Dawi leh kau panin kisiansuah uh hi. Pu leh pate in dawi leh kau lau mahmah napi un Khuado ni-in tuate pan suahtakna dingin hangsan takin delhin not gawp ngam uh hi. Pu leh pate in Khuado ni-in dawi le kau lauhna amau lungsim pan lakhia nuam uh hi. Tua pen cidamna ding, gualzawh matut zawhna ding pan a dalte nawlkhinna hi. Damlohna, zawnna ngauna leh kamsiatnate a do na hi gige uh hi.

Tuhun Zomite in zong I pumpi, innsung leh minam hong thazawmsak thei tuamtuamte I hawlkhiat zel ding ahi hi. I lungsim mahmah ah lungsim neuna, a tangzai zaw ngaihsut theihlohnate zong ni danga dawi leh kau zah in hong siasak thei natna ahi hi. Muh theih leh muh theihloh natnate I do ding ahi hi.

Kipawlkhopna (Organisation/ Association):
Khuado hunin a pawlpawl, a vengveng in lawm anne khawm uh hi. Annek khop cih pen Zomite sungah a thupi mahmah itna kilahna ahi hi. A taktakin a ann sangin a nekkhop, um khop liiliai thupisa zaw uh hi ding hi. Annkuang um khop theihna pen kithutuahna,ki-itna leh kideihsakna lim hi. Tua ahih manin kumkhat sung a khawi uh pawlsa pen khuado ciangin go-in lawm ann nekhawm uh hi. Kipawlkhopna leh nekkhop dawnkhop ding thupisak uh hi. Individualism sangin cooperation / collaboration thupisak zaw uh cihna hi.

Kizahtakna (Respect):
Lawm ann nek ciangin a uhamte nek masiah khangnote in ne ngamlo uh hi. Khuavak mu masate nakpitakin zahtak uh hi. Khangthakte in khangluite khuamuhna nelhsiah dingin ngaihsun lo uh hi. Kizahtakna thupisa uh hi. Minam liante lakah uzaw kizahtakna thupi mahmah hi. Khangthak Zomite sungah tua pen pu le pa zatsa I zuih zawh nawn loh pawl ahi hi. Uzaw zahtakna a kisap bangin,u zawte lam panin zong khialhna a om leh amau a kiniamkhiat masak zawh ding thupi veve hi.“Listen to your elder’s advice not because they are always right but because they have more experiences of being wrong”.

Ki-itna/kideihsakna (Love/Charity):
Khuado in ki-itna limlak hi. Khuado ni-in sa kibakin, zu kitulh uh hi. Amau a nek masak ding sangin midangte in ne masa leh deihsak zaw in kimasak se uh hi. A sisate nagawn deihsakna leh itna lakin si ansiah koihsak uh hi. A ki-it ngaungau minama hihna uh hong lak hi. Tua hangin ki-itna leh kikhualna lim vaphual na etteh uh hi. Tuhun Zomite in pu leh pate lungtang leh lungsim puakzia I ban zo kei zaw hi. A tunga i gen K-7 te tuhun khangthakte in zong I zop tohtoh ding thupi hi. I Christian upna tawh zong kituak mahmah sawnsawn hi. Pasian thu sungah I kisiansuah kul hi.

Jesuh hong itna mah bangin khat leh khat ki-it ding kisam hi. Midangte deihsakna leh huh nopna lungtang i kisam hi. I sepna ah kikumin kithuza leng kithutuakin kimavang ding hi. Mailam adingin kiginkholhna kician I neihkul hi. I ngeinate it in tuamah bangin ei leh ei zong ki-it ding kisam hi. Nationalism is not about culture or politics, it’s about both. It involves ‘culturalization of politics’ and ‘politicization of culture’.


(Hih Thului (Article) pen Zomi Innkuan Tennesse, USA makaihna tawh kibawl Khuado Pawi 2016 ah Dr. Pum Khan Pau ii thugenna pan tom kim akilakhia kik ahi hi).

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHUADO THU LAIGIL Agelh ~ Dr. Pum Khan Pau Description: Rating: 5 Reviewed By: Cinpu Zomi
Scroll to Top