728x90 AdSpace

Hot
Menu
Zon-ol na Donate

Latest News

Laisim Thu Pit Na. Agelh : Lia Dim Boih

Laisim Thu Pit Na.
Agelh : Lia Dim Boih'


Laisim na pan in pil na tampi tak ki ngah aa, muh na zong khang in theihna zong khang sak hi. Leitung ah mi hau mizawng te ki deidan lo in a hih theih uh pen laisim hi. Mipawl khat te aa ding in a lungkham mahmah lai tak un lungnop na a ngah na, pawl khat te aa ding in a lunglen hun uh ciang alungsim uh a la pen lai hi. Laisim na in nuntak na ah sia hoih pen ci leng zong ki khial lo ding hi. Laisim leh laisim lo a nuntak na uh ki bang lo aa, agam tat zia uh zong kikhai mahmah hi.

Mi pil te in a sim uh laimal khat pen a nuntak na uh ah sin pah uh aa, a nuntak na uh zong ki lamdang pah hi. Scholastic te in a gen a gelh na uh ah, laibu om inn sung pan a khangkhia naupang khat leh laibu omlo inn sung pan hongkhang khia naupang a et kak uh ciang in laibu om innsung pan hong khang khia te mah sang lai zong hat zaw aa, zong tel pah pah zaw hi ci hi.

Sangnau pang te aa ding in a sanglai (textbook) uh bek sim ding hi lo aa, a dang laibu te zong sim ding thupi hi. Sang lai a hi lo adang laibu te sim na in, sang aa na sin khak loh theih huai thutam pi hong lak aa, na zak ngei lo laimal te hong mu sak in, khuak zong manlang sak hi. Laibu sai ka pai ciang naupang vive ka mu zaw deuh hi. Tuhun ciang technology khang sem sem in, nu leh pa a tam zaw in nau pang khem baih na ding in phone ki pia den thei hi. Zomi nu leh pa te ka han thawn nop in na inn uh ah na tate deih theih ding, uk theih ding laibu koih in. Phone, TV, Game cih ten a koih sang in laibu koih zaw in. Na tate laisim ding na kam tawh ban sawlsawl ken la, na tate’n laibu a sim theih na ding in na inn ah laibu koih zaw in.

Ka neu lai in textbook mu leng lotngah ding  bek in ki ngaih sun hi. Tam lotngah zo leh sangah mat tam ki ngah ding cih bek ki thei hi. Tu  panpan ciangin  laibu sung ah thukhempeuh ki gelh te pen lotngah ding na hih het lo aa sim in, sin ding ahih lamka tel panpan hi. Laibu sim dan a thei te in laibu a sim mawk mawk te sang a zahtampi in laibu sim na ih a manphat na tam la thei zaw aa, pil na tam ngah zaw hi. Laibu a sim siam te laibu a sim na sung pan pilna tampi ngah uh aa, pawl khat te in laibu a sim khit uh ciang in a sim khit ciang in bangthu ki gelh hiam cih thei lo uh. Laisim dan a siam te in a sim na sung pan in na dang khat mu khia thei hi. Gtn: Mangpau pau thei nuam in, ahih hangin  manglai na sim nop kei leh mangkang khempeuh  tawh na ki ho thei kei ding hi.

Tuhun ciang in laibu tam ki len non lo aa, online ahih kei leh e-book pan in tam ki sim zaw hi. Tua mah bang in facebook pan zong  sim ding lai na om zel hi. Lawm te’ status zong ki sim zel hi. Nisim na sim ding lai hoih tak na tel theih kul hi. Gtn: Facebook sung ah mi te status vive sim ding na tel leh nang a a ding phattuam na om lo ding hi. Laibu a telsiam te in a nuntak na-ah sia hoih a ngah hi aa, laibu na tel khialh leh na muh na le na up na  in zong hong zui paisuak ding hi.

Laibu ih sim ciang in mi khat ih khuak sung ah a ki guang hi aa, mihing khuak pen ih nguan zah zah a ta hi. Ih khuak pen tu hun aa computer technology bang kasa hi. Bang hang hiam cih leh genteh na in, mual tawh ki sai a thei nuam na hih leh , na laibu sim khak ngei a hi zong na zak thu te ahi zong na muh ngei te pan in mual tawh ki sai na khuak in hong kaikhawm hi. Laisim na na neih kei leh na sung hawm ding aa, database om vet lo cih na hi. Na memory sung ah bang tawh ki sai thu te nguang nuam na hiam cih pen nang na teel siam a kul ahihi.

Tua bek tham loin, laibu sim na in na lungsim hong tawldam sak zo hi. Mi pawl khat in laibu pen lungnop na zon na uh, aih kei leh na lungsim sungkhiat na uh hi aa, a mau aa ding in laibu pen lawmhoih khat bang in ngaihsut uh hi. Hih mangkang gam ah a tam zaw pitek putek te in laisim tang tang uh hi; a cil in lamdang ka sa hi. Bang hang hiam cih leh laibu pen sangnau pang leh college, sum leh paii bawl te, sia te bek ih sim ding ka sa ngei hi. Khangno pawl khat in lawm nei lo in, laibu sim in a mau bek om thei uh hi. Amau aa ding in laibu pen a lawm uh hi aa, lai a sim uh ciang in a lunguh kim in kuamah phawk lo hi. Laibu pen pil na, lampi hong lak bek hi lo in tawl dam na zong hong pia thei lai hi cih nak ki mu khia mahmah hi

A tawp na leh a thupi pen kong gelh nop in, na nuntak na na lungkim thei lo in, kal suan ding haksa sa in, na lung kia in na hih ding lah na theih tuan kei leh- kum tam, kum tawm tawh ki sai lo hi-kong gen nop khat in “Lai sim inla, sin dih in.” Na nuntak na ki lam dang ding hi! Gtn: Mel Robbins ih laibu “5 seconds rule” lai bu na sim in la, sin pah in.

Laibu pawl khat in sim in ciap teh ding om aa, pawl khat in lungnop na ahi zong hong nui sak zo aa, pawl khat ciang in na nuntak na-ah na sin khiat ngiat ding ki sam hi. Laibu siam theih na ding in laina sim kul ding hi. Na nuntak na na khel nop leh lai na sim kul hi. Na gual zawh nop leh lai na sim ding a kul hi. Nasep hoih na ngah nop leh laitam pipi na sim a kul hi. Mi tampi tawh na ki theih nop aa, mithu pi te tawh na ki zop nop leh laisim in, na hopih na ding kammal na sung ah khol in.

************************************************************

Laigelh Lia Dim Boih pen Zolai, Zopau avei mahmah khangno liapaal khat hi in Tulsa, OK USA ah a innkuan un teeng uh hi. Apa pen Sia Khual Khai Naulak beh, Laibung khuami hi. Amah pen tulai tak collage akah laitak zong ahi hi. Ka kithuzakna leh ka ngetna tungtawn in "laisim thupitna" hong gelh khiat ahi hi. Ama tungah lungdam mahmah hang. I biak Pasian in hong zatsak semsem ta hen.....

Cinpu Zomi

www.laibusaal.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Laisim Thu Pit Na. Agelh : Lia Dim Boih Description: Rating: 5 Reviewed By: Cinpu Zomi
Scroll to Top