728x90 AdSpace

Hot
Menu
Zon-ol na Donate

Latest News

Neek leh dawn Thupiit Sak ding AKuul Kha diam? Agelh ~ Awn Lam Khual FPII MBBS

Neek leh dawn Thupiit Sak ding AKuul Kha diam?
Agelh ~ Awn Lam Khual
FPII MBBS, Mgy


            Neek-leh-dawn thupiitsak ding akuul kha diam? Banghang in hih neekleh-dawn thupiitsak ding akuul kha diam cih thulu tawh hong atnuam kahiam cih leh eimi (Zomi) atamzaw te in neek-leh-dawn ding i thupi sakkhol lohna ka naphawk kha hi.Eimi atamzaw in neih leh lam mah ci in inn golpipi lam,ahih kei leh kham leh ngun tawh ih neih ih lam te kemcip in neek-leh-dawn ding ki thupisak khollo thei hi. Eimi te ngaihsutna zong anialnuam, adeih lo ka hituan kei hi . Hoihmah hi. Ahih hang neek-leh-dawn thupiitsak masak ding ahoihzaw kha diam ci in ka ngaihsun kha hi. Banghang hiam cih leh hih neek-leh-dawn ih thupiitsak lohna hangin leitung ah ih nuntakzahding zong ki nungta lo in, ih khanzahding zong kikhanglo, ih ciim ih tei , ih pil ih maangzahding zong ki hi zolo, tuabaan ah ih sepzawh zahding zong kisem zolo ,ih cidam ih gualnop zahding zong ki cidam ki gualnuam zolo thei hi .Tua ahih man in ih khansau ,i cidam i pil , i tei nop leh neek-leh-dawn thupisak in ( ih hih theihzah in) hileng, mizong kibaan in gualtung kituang zopan ding hi. Ahih hang khat om leuleu hi. Neek leh-dawn thupisak ding ka cih ciang tua ih thupiitsak mah bang in,naa zong sem pah ding cihna ahi hi. An nene in, lumlum ding ka cihna hilo hi.

Hih tawh kisai in kawlte thuciin khat hoih ka sa hi. “စား၀တ္ေနေရး” na ci uh hi. Amau te in neekding mah nathupisak masa uh hi. Tuabang mah in neekding na thupisak ahih manin , zong semzo pah uh hi. Eimi te ih hih leh neekding na thupisak khollo ih hihman in mun pawlkhat ah amau te sang na kisem zolo zawthei hi.Tua ahih man in amau aa pen maanzaw theiding hi ci in ka ngaihsun kha hi. I neekzawh loh man maw? Ahih kei leh ih neek ngamloh man maw?ahih kei leh ih thupiitsim loh man maw?Tuabang a ih neek dawn lohna bangin  mun pawlkhat te ah amau sang ki sang zolo zawthei hi.Eimi te i hih leh amau aa tawh ki lehbulh lian hi. Eimi te aa pen ေန၀တ္စားေရး “ cih hizaw pianmawk hi. Neekding dawnding pen anunung pen ah ih koihkha thei mawk hi. Tua ahih manin neek leh dawn thupisak kawmin nasep hanciam leng ih gam ih lei bek hi lo, ei mimal khatciat aa ding zong hamphatna tampi omzaw ding hi.

Ei gam lam pen haksa phadiak, zong ki ne zolo phadiak in, zong bangmah piang, suak mel lo hi.Hih mah tase leh tua apiang sunsun, asuak sunsun te sungpan neeksiam kiaukiau hileng ahoihkhop mah om veve hi. Nisim sa meh ahizong ,mehlim nono meh dending ka cihnopna hituan lo hi. Sa ih meh zawh kei leh zong tua tawh aki bang ,adang ih neeeksiam ding kisam hi.

            Tha om nang ahih kei leh , tha apiangsak nisim neekding akisam (6)te in
(1) Carbohydrates
(2) Proteins
(4) Lipids
(3) Vitamins
(5) Minerals
(6) Water

A tung aa (6) te ei pau in omthei tuanlo ahih manin mangpau mah in ih theih ding himai hi. Tuate koi pan, bang pan kingah thei cih ka hihtheih zahin kong gensuk ding hi.

(1) Carbohydrates
A khum a paa neektheih te (ah) pan kingah thei hi. Gentehna in nisim ih neek ann (buh /buhsih) ,vaaimim,akhum ahi kawltuu , thangkhuai cikhum cihte  neekna pan in kingah thei hi. Tua ahih manin ( buhsih /ann) ih neekna tawh carbohydrates akicing in kingah thei hi. Tua ahih manin tu lamlam ciang mi atam zaw in buhsih vive kine zo talel ahih manin pumpi aa ding akisam carbohydrates pen ann pongman neekna hangin kicing mahmah lel hi.


(2) Protein
Atamzaw saa pan kingah thei hi. Bawngsa , voksa, aksa ,ngasa te leh aktui, vatawt tui , sa sungkua ( sasin ,salung ) leh be ( be nam tuamtuam / eilam aa apiang be nam tuamtuamte pan kingah thei hi).Tua ahih man in sa ih neekzawh kei phial leh zong be ih neekna tawh ih pumpi aa ding akisam protein kingah thei hi.

(3) Vitamins
Vitamins nam tampi om hi. Tua nam tampi lak ah  athupi leh atheihhuai pawlkhat khat anuai ah ong gualsuk ning.Ahuampi in nampi ( 2) om hi.

A nam khatna (Fat soluble)
 1.(i) vitamin A  
(ii) vitamin D  
(iii)vitamin E   
(iv) vitamin K leh A nam nihna (Water soluble)

2. (i) vitamin C   
(ii) (vitamin B, ( B1,B2,B3,B6,B12)

Hih vitamins te pen sasin, salung , bawngnawi , keelnawi , aktui , mehteh mehgah ( eilam apiang mehteh mehgahte pan kingah thei hi) leh aktui, vatawt tui, sa ( bawngsa voksa, …) leh singgah atuamtuam pan kingah thei hi. Tua ahih man in eilam a apiang mehteh mehgah te leh singgah atuamtuam te ih neekna hangin hih vitamin tuamtuam te kingah thei hi.

(4) Lipids
Atamzaw pen thaau(ganthaau or bethau..) pan kingah thei hi .Thawhbat, sathau , niciathau, mi-pe-thau cih te pan kingah thei hi.

(5) Minerals (gtn. magnesium, calcium, etc.)
Eipau in omtuan lo hi .Bawngnawi , keelnawi , aktui, ngasa, mehteh mehgah a tuamtuam , singgah atuamtuamte pan kingah thei hi.

(6) Water (Tui)
Atung a nam (6) te pen tawmtawm ta ih nisim nuntakna ah kisam hi.Tua ahih manin ih neek zong ongkul hi. Atung aa te tawmtawm ta ih neek ih dawn ah akihel theih nading in bangcih neekding ih hi hiam?

            (a) Carbohydrates
(b) Lipids,
(c) Proteins                 
(d) Vitamins
(e) Minerals
(f) Water        
  
- Ann ( buhsih , vaimim,…) ih neekna tawh carbohydrates kingah hi.
- Sathau ( bangthau bangthau kingah lel hi.) ih meh/neek zawhna tawh lipids kingah thei hi.
- Saa ( baak khat atawmpen ) ahih kei leh aktui, be ih neekna tawh proteins kingah hi.
- Mehteh mehgah ( eilam aa apiang, ahunhun a apiangte) leh singgah atuamtuam                      (eilam aa apiang te) ih neekna hang in vitamins leh minerals kingah hi.
- Nisim in mikhat in tui atawmpen thawl (1) dawn ding kisam hi. Hithei leh tui tampipi (tui minsaa) dawn zoleng hoih hi.

            Hih atung ateng dan in( ahih thei zah in ) ne zo hileng i ci zong dam ding aa, ih pumpi zong hat ding hi.Tua ahih man in ahi thei zah in atung aa teng ( tawmtawm ta) aki hel zawh nang in hanciam ciat ni.

Atung aa teng aki hel khit baan ah ih neek ih dawn hun amaan ding zong kisam hi.

A cidam pumpi , a thahaat pumpi ih hih theih nading in atung aa te baan ah anuai aa bang aa ih zuihding kisam hi.

(i) An neek hun ding mang ngilh kha ken. Zingann , sunann , nitakann hun mantak in ne in.Tuate lak pan khat peuhpeuh ih mangngilh khak ciang ih pumpi in azat ding tha omlo ahih manin ih pumpi sung a aom sa tha te zang in tua te abei ciang ih tha ding om nawnlo in lung aam thei hi. Ann manman in ne peuh hi leng adang tampi kisam lua nawnlo hi.

(ii) Tui dawn in. Tui pen ih pumpi aa ding aom loh apeelmawh khat ahi hi .Cidam nading in apeelmawh khat zong ahi hi. Ahih hang soda aki hel ,akhum aki hel tui te tamdawn ding (dawn ding ) hoih khol lo hi.Nikhat  Pasal ten –Litre (3) ( haai 12 – 13 ) leh Numei ten litre 2 ( haai 8-9) bang dawn  zoleng hoih hi.

(iii) Saa (Proteins) a ki hel ann te ne in. Tui (water) baan ah saa ( proteins) akihel ann te in ih pumpi leh i cidam nangin kisam hi. Saa (proteins) akihel ann te neekna hangin lungtang tawh kisai natnate (Cardiovascular disease, heart disease) dal in ih ci ih sa ,adiakdiak in pumpi sung a ih satak te, ih tha haatsak hi. Bee, saa ( bawngsa, voksa, ….) tuate pan kingah thei hi.

(iv) A zang (fibre) akihel an te ne in. Mi tampitak te in a zang(fibre) akihel an te nikhat ih neekzah ding ii alang zong ki ne lo hi. Tua a zang (fibre ) akihel an te ih neekna hangin sungkhak (constipation) Gilpi cancer(Ca stomach ) leh lungtang tawh kisai natna ( Heart disease) te pan dal hi.

(v) Singgah tampipi ne in. Eilam aa apiang singgah tuamtuam ( hai , piat , lingmaw, nuu nuun ,….) tua te tampipi ne zoleng hoih mahmah hi.

(vi) Ki mawl in (Exercise bawl in) Nikhat minute (20) ahih kei leh nipi khat in nithum kimawl (exercise) bawlna in sikhum zunkhum ( DM –Diabetes Mellitus), lungtang tawh kisai natna tuamtuam ( Coronary Heart Disease) te pan dal in ih khan zong ong sausak hi. Lamsiauhna (walking), siksakol tuangna ( cycling) ,tuipeek (swimming) , ki zansuk ki zantohna (aerobic) kimawlna in ih cidamnang in hoih mahmah hi.

Hih atung ateng bang in ih hihzawh ( ih zuihzawh zah in ) hihleng ih cidam baan ah na zong kisemzo, ih lungsim , ih khuak zong hatding aa, ih khan zong sauzaw ding hi. Tua ahih manin mimalkim khatciat in ih zuihzawh nang hanciam in ih nisim nuntaknate amanpha leh a ettehhuai nuntakna asuah thei nading in hanciam ciat ni.

Source :
Ciimnuai Vontawi Siamsin, Magway - 10th Anniversary Magazine, 2013

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Neek leh dawn Thupiit Sak ding AKuul Kha diam? Agelh ~ Awn Lam Khual FPII MBBS Description: Rating: 5 Reviewed By: Cinpu Zomi
Scroll to Top