728x90 AdSpace

Hot
Menu
Zon-ol na Donate

Latest News

Thupha Naak Itna Hi. Agelh ~ En Khat Thang

Thupha Naak Itna Hi.
Agelh ~  En Khat Thang


Hun khat lai-in, Sengam khuata khatah Yin kici nupi khat om hi. Tanu khat nei-in a pasal zong tawh nisim nasemin omuh hi. Ni khat, a Inn mai lampi geiah puteek thum hong paiuh Yin in a muh ciangin, Puteekte hehpih ahih manin va delhin “Pute aw! Inn sungah hong tum unla  tuisa beek hong dawn un” ci-in va kho hi.

Puteek thumte zong lungdamin "Hong khawl nuam mah ung, ahi zongin na pasal Innah a om hiam?" ci-in donguh hi. Yin in "tulaitak om kei nasem hong tungkik dek inteh" ci-in dawng hi. Puteekte in "Na pasal hong tun ngak nung in, tua khitteh Innsung hong lut pan nung, na pasal om lopi ko puteek thum kong lut dinguh kilawm lo hi" ci uhin lampi geiah khawl uh hi.

Asawt lo-in, Yin' pasal hong tunga, puteek thum sam dingin Yin inn pualam hong paikhiat leh puteek thumte a meluh na kikhelin Vantungmi na suakuh hi. Vantungmi khat in “ka tanu aw, nong zindo ka nuamuh hi. Tua ahih manin thupha kong pia nuam ciatuh hi. A mah pen itna le kithutuahna hong pia thei Phuu ciki vanmi hi. A mah leuleu pen hauhna neihlelam hong pia thei Liu kici vanmi hi. Kei ka hih leh minthangna hong pia thei Shou kici vanmi hing” ci-in vanmi khat in gen hi. "Ka tanu ko teng thum lakah kua hong deih pen na hiam? Nong deih penpen na Innsung vuah hong lutin thupha hong pia ding hi na pasal tawh va kikum un la hong zasakkik in" ci-in sawl hi.


Nupi Yin zong lawp luain inn sungah tai paha, a pasal va kuppih hi. "Lawm aw ken leitungah i nuntak sungin hauhna neihlelam mah thupisa ing tua mah tel ni" a cih leh, a pasal in "minthanna i tel buang kei de lawmlawm, leitungah mi minthangte mah hampha pen hi" ci-in, a nupa un hong kisel, hong kitawng tadih uh hi. NulePa kitawng inn sung pan a za sim khinkhian tanu neu in  Innkuan sungah a kisam pen itna le kithutuahna ahih lam hongphawk ahih manin "Nu aw, Pa aw, Itna kithu tuahna tel zaw lo ding i hi hiam? Hih bnagin kitawt kiselna tawh innkuan nuam ka sa kei hi" hong ci hi.

Nupate zong a khialh lamuh kiphawk thakin, Itna kithutuahna ahi Vanmi Phuu hong teluh hi. Vanmi Phuu zong innsung lam zuan dingin hong ding khia pah hi. Vanmi Phuu nungah a dang vanmi nih in zong hong zui uh a, Nupi nu in "Vanmi Phuu bek ka tel hilo hiam? bang cia na vek vua hong zui na hi vua? Na thum vua hong pai sawm veve lah nong telsak sese vua" ci-in hopih hi.

Vanmi Phuu in zong "Inn sung khatah Itna le kithutuahna a om nak leh hauhna neihlelam, minthangna cihte in zong a nung zuih ngeina hi lo maw!" ci-in dawngin a thumun Innsungah lutin thupha pia uh hi.

Innkuan sungah itna, kithutuahna hong om limlim peuh leh tate hong khamuangin nophong sa dinguh hi. Itna a omna ah Pasian na ngawn in nopsa hi. Pasian mahmah zong itna tawh kidim Pasian ahi hi. Thupha ngah minam, Innkuan, Nupate i suah theihna dingin itna Pasian i telmasak ding thupi mahmah hi. Itna a omna ah thu hoih thupha khempeuh in nung zuih tawntung hi. Mate 6:33 "Pasian gam le a dikna zong masa in, tua hipeuh leh a dang nakisap nakhempeuh zong hong kipiak thuah ding hi" ci hi.

Laisim kong it ulenau, Itna le kithutuahna ahi Pasian i nuntakna ah, nupa sungah, Innkuan sungah minam sungah i deih masak, i tel masak hi sak ni cih tawh kihan thawn nuam hi hang.

Source :
Hih Thute Manpha Sa Lua Ni Teh’ Laibu.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Thupha Naak Itna Hi. Agelh ~ En Khat Thang Description: Rating: 5 Reviewed By: Cinpu Zomi
Scroll to Top