728x90 AdSpace

Hot
Menu
Zon-ol na Donate

Latest News

Tuntom lingleng in a Lawhcing Charles Sherwood Stratton @ General Tom Thumb Thu.

Tuntom lingleng in a Lawhcing Charles Sherwood Stratton @ General Tom Thumb Thu.


Thupatna
Tuntom lingleng General Tom Thumb ci-a kithei Charles Sherwood Stratton pen Circus limlak minthang lawhcing mahmah khat ahi hi. Ama tun sanna pen pi thum val deuh bek hi a, ahi zongin mi lawhcing mahmah khat ahi hi.

Pianna le khatkhiatzia
Apa ahihleh khutsiam lettama Sherwood Edward Stratton hi-a, a nu Cyinthia Thompson hi-in January 4, 1838 in Bridgeport, Connecticut, USA ah suak hi. A nu le pate ahihleh a tunsang lua pawl leh a tuntom lua pawl hi loin mi laihawl pawl ahi uh hi. Stratton zong a tuntom pen a pianpih hipah sam lo a, a suah cilin nausuak cil ngeina zah 4.3 Kg. in gik in, naupang dangte mah bangin cidam in a pumpi zong khangto hi.


Zawngkhal thanemna
A suah cilin a cidam leh naungeek dangte mah bangin a pumpi khangto himah leh kha guk a phak ciangin a pumpi khanna khawlcip mawk a, letma 25 (2’.1’’) pha in, 6.8 kg bek gik hi. Tua bangin a tapa un khanlam manawh nawnlo in a omna a nu le pate’n a theih uh ciangin Siavuante kiangah va lak uh a, ahi zongin maban khantohna om mel nawnlo ahihna a thei khia uh hi.

Tua bang tawh hong kalsuan toto a, kum li a phak nangawnin kha guk a phak lai a, a gihna, a sanna cia mah pha lai hi. Ahi zongin amah pen pumpi khangto lo cih lohngal adangte ah genbanna omlo in naupang dangte mah bangin cidamin, thahat lel hi.

Gualzawh lawhcinna
Tua banga Stratton khanlam manawh loin om hi, cih khual gamla a om a tanau uh ahi Circus lahna a makai P.T. Barnum in a theih ciangin a nu le pate kiangah Stratton amah tawh om dingin va ngen hi. Tua ciangin Stratton ama kiangah la in kem a, lasak dan, lam dan, mizia kineih a lah dan(mime) le mi thupite om dan, gamtat dan ciin, cihte ahilh hi.

P.T. Burnam in Stratton lam tampi ah makaih a, Circus lahna ah zong kihelsak hi. Stratton kum 5 a phakin a masapen Circus lahna khualzin kipan hi. Amah pen a tuntom in om lingleng ahih manin a min dingin General Tom Thumb ci uh hi. Tua Circus lah hun sungin, “Cupid and Napoleon Bonaparte lem ciinna a neih banah la sakna, lam lahna nei-in a lawmte tawh a tuamtuam lahna nei uh hi. Hih Circus lahna pen Stratton aa dingin minthan kipatna le lawhcin kipatna ahi hi.

USA gam sungah Circus lahna a neih khit uh ciangin P.T. Barnum in Europe gamah zinpih a, USA gamsung bek hilo, leitungbup ah a minthang, a lawhcing mi khat a suak dingin panpih in pantah hi. Europe a zin sungin Queen Victoria tawh nihvei kimu kha in, kum 3 a pha pan King Edward VII hong hiding Prince of Wales zong va kimuhpih hi. 1845 kum Le petit Poucet of Dumanoir and Clairville mintawh Threatre du Vaudeville (France) ah Circus lahna nei uh a, tua zong nasiatak in lawhcing uh hi.

1847 kum a khualzinna pan a ciahna lamkal a, a khawlna mun khat ah hun tomno khat sung Circus lahna khat nei pakin Ireland gam a kialpi thuakte huhna dingin sum a zonsak hi.

Khanlam manawh
A suah khit kha guk a phak pan khanlam a manawh nawnloh himah leh 1847 kumin khanlam hong manawh kik hi. Ahi zongin khang hanhan hiaulo a, tawm kha cik bek ahi hi. 1851 kumin a tun sanna 2’5’’ (74 cm) sang hi. Ama kum 18 cin Birthday ni-in 2’8.5’’ pha sam hi.

Zi neihna
February 10, 1863 kumin amah banga tuntom liingleeng Lavinia Warren tawh kiteenna mopawi bawl uh hi. Mopina pawi pen Grace Episcopal Church ah bawlin Mokhakna pen New York City’s Metropolitan Hotel ah thupitakin bawl uh hi.

Nupakop tegel mipite muh theih dingin piano lianpi khat tungah ding uh-a, leengla mi 10,000 valte zin a do uh hi. Tua mopawi ah pasal lam pan moliah in a Circus lahpih a lawm George Washington Morrison zang uh a, numei lam pan Lavinia sanggamnu Minnie Warren in sem hi.

Amau tegel mopawi pen leitungah minthang mahmah a, thukizakna laihawm tuamtuamte laimai masapen mun luah hi. Mopawi bawl khit ciangin nupa thakte President Lincoln in White House ah sam a, ankuang umpihna le lungdampihna pawi a khaam sak hi.

A nupa un Circus lakin Europe, British India le Bangladesh gam dongah zinkhawm kawikawi uh hi.

Barnum’ makaihna nuai panin Stratton pen mi haupi khat le mi lawhcing mahmah khat hong suak a, New York khuapi ah a etlawm mahmah inn le huang a neih banah Connecticut Thimble Islands ah zong inn le huang nopci mahmah nei hi. Barnum tawh sumbawlna lamah zong semkhawm uh-a, Barnum cihmawh hun ciangin zong huh hi. 1878 in a nunung pen mipi mai ah kilaakna le limlahna nei hi.

January 10, 1883 in Milwaukee a om Newhall House ah a zintun laitakun tua hotel meikaang hi. Tua meikaang nasiat dan pen Milwaukee tangthu kan John Gurda in a genna ah, “America gam tangthu ah a nasiapen hotel meikatna hi,” ci liang hi. Tua meikaang ah mi 71 valin a nuntakna uh bei lawh uh hi. Ahi zongin a lawmpa uh Sylvester Bleeker huhna tawh Stratton-te nupa suakta in bangmah cilo uh hi.

Sihna
Tua meikatna pan a suahtak zawh uh kha guk khit ciangin lamet lohpi in stroke natna tawh Stratton si hi. A sihin kum 45 pha a, 3’3.5’’ (102 cm) sangin 32 kg gik hi. Mountain Grove Cemetery ah kivui a, sihvuina hunah mipi 20,000 val bangin va kha uh hi.

P.T. Barnum in Stratton ii lim suang milim suisiamte suaisak a, Tom Thumb han ah a koihsak hi. Ama sih zawh kum 35 khit ciangin a zi Lavinia Warren si a, ama kiangah kivui-in a han suang tungah, “Ama zi” (His Wife) cih kigelh ziau hi.

Source:
https://en.wikipedia.org/wiki/General_Tom_Thumb

(Note: GUAL TAWH TAN BANG KIM laibu sunga nambat masa pen hi. Hih laibu sungah mimal 35-te nuntakna panin thalak theih ding lunggulhna tawh amaute tangthu tomkimcing hong kigelhkhia hi. A laibu na muh khak ciangin na lei inla, na sim hanmtang in. Bless Publishing House Facebook pan zong kisim thei ding hi).

Laibu gelh : Cing Lek Le Dong Za Mung

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Tuntom lingleng in a Lawhcing Charles Sherwood Stratton @ General Tom Thumb Thu. Description: Rating: 5 Reviewed By: Cinpu Zomi
Scroll to Top