728x90 AdSpace

Hot
Menu
Zon-ol na Donate

Latest News

KAWLGAM A HONG PAI BETLEN ZEISU. ~ Rev. Dr. Simon Pau Khan En

KAWLGAM A HONG PAI
BETLEN ZEISU.
~ Rev. Dr. Simon Pau Khan En


“… naungek puan tawh kitun a,bawng
annekna kuang sungah kisial a om
na mu ding uh hi (Lk.2:12).

            Leitung mite i mawhna sung pan hong honkhia ding Topa Zeisu (Mt.1:21)pen hong suahma kum 700 lai-in a min ding kiphuak khin hi. Ama min pen “Lamdang, Thulakpa, Vanglian Pasian, Tawntung Pa, Nopsakna Kumpi” (Isa.9:6) ahi hi. Zeisu cih pen Hebia kamin Jashua hi a, Honkhiapa cihna mah ahi hi.

Lamet Messiah:        
Judah gam pen Kumpi Davuih in (BC.1000) a phuh lai-in ki-hauin nuam kisa a, lungnopna om hi. A tapa Solomon sih zawh BC 922 pawl a ki-panin Judah gam pen saklam le khanglam ci-in khen nih kisuah hi. Tua huna gam uk kumpite in a nungta Pasian bia loin milim pasian bia uh ahih manin a galte khutsung ah tungin gimna tawlna le lungkhamna tampi thuak uh hi. Galte khutsung panin a honkhia dingin Me-ssiah hong pai ding cih pen a lamet lianpen uh ahi hi. 

Messiah le Khazih:
 Zawma kumpi Augustas uk hun sungin a lamet uh Me-ssiah pen Betlen khua ah hong suak a, puan tawh kitun hi (Lk.2:7). Hebiapau tawh Messiah kici-in Mikangpau tawh Christ kici a, a khiatna pen Honkhiapa cihna mah ahi hi.


Zeisu le Khazih:       
Betlen khua ah hong suak naungek Zeisu pen puan tawh kitun hi (Lk.2:12). Puan tawh kitun cih in khiatna lianpi nei hi. Lungdamnathu hong puak Topa Zeisu pen amah guakin kikoih thei lo a, na khatpeuh tawh tun kul hi. Lung-damnathu pen puan ahi minamte’ ngeina le ziate tawh tun kul hi.

            Betlen khua ah hong suak a, puan tawh a kitun Topa Zeisu pen gam tuam-tuam minam tuamtuam lakah va lut kawikawi hi. Zeisu pen a tunna munmun ah mite in amau ngeina le amau’ ziate tawh a na tun ding uh kisam hi.

Puan tawh a kitun tapidaw ngeinate:         
Topa Zeisu pen Betlen khua ah hong suak a, hih Lungdamnathu pen Greek mite tungah va tungin AD 313 ciangin Zawma gamah va lut hi. AD 433 pawl ciangin Europe gam sungah, AD 1620 ciangin America gamah va lutin 1792 ciangin hih Lungdamnathu pen leitungbup gam tuamtuam minam tuamtuamte tungah hong kizel a, amau ngeina le amau zia tek tawh na tun uh hi.

Kawlgam a hong pai Betlen Zeisu:
Betlen khua a suak Zeisu pen 1722 kumin Kawlgam ah khatvei hong hawh ngei a, 1813 kum ciangin sangmang Judsonte nupa tawh hong tonin Kawlgam leitang tung    hong sik ta hi. Tua Betlen Zeisu pen Kawlgam ah hong tun zawh tukum 2005 ciangin kum 192 bang hong cing ta a, tuni-in eite in tua Betlen Zeisu, koici bangin i dawn hiam cih pen a kidothuai mahmah thu khat ahi hi.

Betlen ah hong suah lai-in puan tawh a kitun mah bangin Kawlgam ah Kawl-zia le Kawl ngeina tawh (Zomite adingin Zo ngeina le Zozia tawh) i tun ding kisam hi. Tuni i dinmunte i et ciangin tua Betlen Zeisu pen nitumna lamte’ ngeina le ziate tawh tun lai ihih manin tua Betlen Zeisu pen Kawlgam leitang tungah hong maingal thei loin hong tektang thei nai lo hi.
           
Betlen khua ah puan tawh a kitun Zeisu pen Kawlgam ah hong maingal a hong tektan theih nadingin nitumna lamte’ ngeina le ziate suahkhiain Kawl ngeina le Kawlzia tawh tun ni. Tua Betlen Zeisu i gam i lei ah hong maingalin hong tektang  leh i mawhnate pan hong hotkhiat banah i haksatna i buaina tuamtuamte panin zong hong suakta sak lai ding hi. Tua Betlen Zeisu in minthanna ngah ta hen.

(Kawllai tawh kigelh Mittha Taman Dec/2004 pan kitomlak hi,  Ed. ~ Zangkong Awging)

Source :
ZANGKONG AWGING
            KHOL 16, HAWM 178                             DECEMBER, 2005


  • Blogger Comments
  • Facebook Comments

0 comments:

Post a Comment

Item Reviewed: KAWLGAM A HONG PAI BETLEN ZEISU. ~ Rev. Dr. Simon Pau Khan En Description: Rating: 5 Reviewed By: cinpuzomi
Scroll to Top