728x90 AdSpace

Hot
Menu
Zon-ol na Donate

Latest News

KHUADO PAWI THU. ~ Dr. James Suan Za Dong

AUSTRALIA GAM, BRISBANE KHUAPI AH ZOMI KHUADO BAWLNA
(ZOMI COMMUNITY AUSTRALIA INC. BRISBANE) October 28, 2017
Dr. J. Suan Za Dong



Brisbane khuapi aa om Zomi sanggamte,
Brisbane khuapi aa om Zomi Community Australia panin makai, upate leh pawl mipi-in tu kum Khuado siim ding leh thugen dingin itna tawh nong sapna uh kipaak leh lawptakin kong saang aa tu-in hih lai ah iki muh theih manin Pasian tung lungdam i ko masa hi.

Khuado pen Zomite-in i ngeina sung ah pawi thupipen leh hun nuampen aa i neih khat ahi hi. I Zogam ah tulaitakin tuuk hun beita-in guah zu meikaai nawn lo, zong vot lua nai lo-in khuahun nop mahmah laitak ahi hi. Lo nasep khempeuh kiman khin, tawldam hiithiatin anpal, an thak zong a om zihziah laitak hi aa kuamapeuh lungnuamtakin i-om hun ahi hi.

Khuado kibawl tuung ciaptehna om lo ahih manin mi pawlkhatin AD 1400 kiim Ciimnuai innpipa Pu Tuah Ciang hunin zong kibawl dingin um uh hi. Ka thukim hi, Ciimnuai maa kum 600 lai pekin kipan khin dingin ka um hi. Banghanghaim cihleh Vai  te (Hindu)te- in tangtawng pek aa kipan meivak pawi Diwali puja pawi Khuado hun sung mahin nei uh hi. Kawlte-in zong meivaak pawi, Thadinkyut, Khuado hun mahin na nei uh hi. Sente-in zong hih hun mahin mid-autumn festival, buh lak-khit meivaak pawi mah nei uh hi. A nuai ah i muh ding mah bangin ei Zomite-in zong Khuado hun sungin khuazaangin meilah tawh khua siansuahna inei aa khuazaangin mei taang zeiizaii hi.

I pu i pate Pagan, Nyaung U, Popa kiim ah kumsawtpi na teng uh aa Kawlgam laizang ah Zo kumpi-in kum 800 val ( AD 800 maa-1550  ) sung na maang ngei uh ahih ciangin minamdangte tawh hih hun sungin na kimu kawm uh hi. Hindu, Kawl, Sen leh Zomite-in akibangin hun khat sungin meivaak pawi, kumcin pawi nei ciat ihih ciangin Khuado pen Ciimnuai hun ma kum 600 pekpekin i nei khin ding aa tu-in 1,200 vei bang khua a do khin hihang ci-in ka um hi.

KHUADO: 
Hih ‘Khuado’ kici kammal pen atumdang mahmah kammal ahi hi. ‘Khua-do’ kici kammal 2 te-in apha leh asia khiatna nam nih tuak anei kammal mal 4 kigawmtuah, Khuado ahi sese hi

Khua’ in akilehbulh khiatna nih nei aa, ahoih, apha pasian cihna – Khuasiam(Khuavak) leh a gilo, asia dawi cihna –Khuasia(Khuazing) ahi hi. ‘Do’ in zong akilehbulh khiatna nih mah nei aa, ahoih, apha ki-itna alak, zindo, lenglado’, cihna leh asia, adik lo, gal do cihna zong ahi hi. Tua ahih ciangin khanglui Zo ngeina taktak tawh khua akido lai-in dawisia kausia, Khuazing, gal bangin khuabupin innsung pan khua pua ah kihawl khia, kibeng khia (exorcised) kido in, thupha, cidam, lungnop, daupaina ong pia Khuasiam inn sung ah kisaang (received)  in zin bangin kido hi. Tua baan ah it leh ngaih asisate kha zong Khuado ciangin “zu lim, sa lim ong siim un” ci-in kisam aa zin bangin kido hi.

Hih  Khuado hun sungin aki lehbulh thu nih om lai hi. Zu leh sa ne-in gualnuamin lasa-in alamlam a-om mahbangin, kum lui sung aa a-it angaih asihsansate phawk kikna, dai hawhna hun khat  zong om ahih ciangin, lungleng, khuangai-in khitui naptui tawh a om pawl khat zong om uh hi. Hih bang nopna leh dahna kithuah pawi dang om ngei lo hi. Khuado hun sung bekin gualnopna leh khitui luanna ki nei khawm ahih ciangin Khuado alamdanna khat ahi hi.

Tua ahih ciangin hih Khuado pen akhel mahmah, atumdang, atuam vilvel kammal ahi hi. Khuado min aphuak i pu i pate asiam daan uh lamdang hi.

Khuado ni : 
Khuado hun pen an laak khit hi hamtang ding ahih hangin, khua khempeuh kituakin an kila lo hi. Khualzin gamvak zong ki om aa tuate om kim hun zong kingak ahih ciangin, khua khempeuh  Khuado ni kibat ding haksa hi. Ahih hangin khua khat ciat ah siampi, hausa, upate kikumin alempen ding ni teel uh ahih ciangin khua khat ciat ah akibangin khua kido hi. Mailam ah Khuado holiday akibangin i neih ding deihhuai kasa hi.

Zomite-in kum khat sung i ngaklah i lawppeen Khuado ahih mah bangin i khua, i gam bek hi lo-in koikoi ah i om hangin a hun ong tun simin Khuado ding i lungsim sung ah ong suak hi. Zomi li leh nga i omkhop nakleh khua kido hamtang hi. Tuni mahmahin, i pianna i gam i lei ahi lo tuipi gal Australia gam Brisbane khuapi sung ah Zomite-in hih bangin lawptakin Khuado i bawl mah bangin leitung  mun tuamtuam ah zong Zomite-in a omna ciat uah a kilem bangbangin khuado ciat ding uh hi.

Khuado bang hi aa bang deihna hiam?

1. Zomite Kumthak dawn ni ahi hi; banghang hiam cihleh Khuado la kiphuak lak ah ‘kumkhen’ ci-aa la kiphuak tampen hi.  “Kum kidang e, solkha dang ee…”.,  “Kum khen ningzu lunlai ah ee…”, “ Tukawl tawi kum khua i khen aa…”,  “Kum khen lenkhuang ging na zanam aw…..”, “ Lenlai sinthu kumkhen lenkhuang khang zamluangin kei hong phawng lai ee…”., cihbangin ‘kumkhen’ Khuado la tampi om ahih ciangin, kum lui nusia-in kum thak adawn i hihna hih late-in ong gen hi.

 2. Zomite An laak pawi zong ahi hi. An lak maa-in khua kido ngei lo hi. Kum khatsung khawhsa ante kila khinin, tawldam lungnuam hiithiatin, annek tuidawn, zu leh sa tawh kidiah piikpeek hun nuam ahi hi.

3. Zomite meivak pawi zong ahi hi. Pawi dang tampi, Sialsawm, Lawm annek, leh ton, zunun, hihnei, gal aih-sa aih, mo pawi i neih hangin khuabupin meilah kivak ngei lo-in Khuado ciang bekin, innsung, baangkua, innka taangban ah ahi zongin  khuai lak ciangin kizom diudeu-in meilah kide-in khuamual pan, taangsuahna meilah dee-in kilaam hi.  “…………,gual i lenna taang na siilsial ee,” ci-in Thang Ho-in khuasung mei kivaak zihziahte etlawm sa-in, i khua sung meitaang zihziah!” ci-in la na phuak hi.                         

4.   Zomite ki siansuahna pawi zong ahi hi. “Kum kikhen e solkha dang e, ziinin vangkhua zong hen lawm aw,….siansung tui bang siang hen lawm aw e”. Khua sung, inn sung ciat pan  dawihang kauhang hawl khiatna kinei aa, Khuado sung ah akihih thu tuamtuam lak ah hih ‘kisiansuahna’ pen athupipeen ahi hi.

Kum thak sung ading mailamthu aisaanna, etkholhna zong kinei hi. Khuasung kicidamin kihau ding maw? ahih kei leh natna, sihna, tuahsiatna tam ding? cih khuai note om daan, tat daan enin mailam thu etkholhna kinei hi. “….sim ngalthen, zo ngalthen, nangin kumkhua na thei aa, kong dong ee… ……………., ningzu a ke’n dong, aisa a ke’n dong ee.” Kici hi.

Zo ngeina i kepcing nading kihanhotna zong Khuado la-in kisa hi. “Tuan pupate khan ki guizopna, khangsawnte’n kumkhua i dodo nuam ee…., “Mei bang theng kuan pupa pianzil, nah zu bang puah dih ni gual aw ee.”., “Pupa phuhsa kum Khuadona simsing bang gilden hen aw…….khangsawn momnote’n gia bang zuun leng e”

Zomite unau khat i hi aaki itin kithuhual diamdiam ding lunggulhna zong khangluite-in la tawh ong vaikhak uh hi.“Tun sungkhat piang tang laizomteng sinthu khatin tui bang luanglengee……”.

Hausa, siampi leh upa teng kikumin khuaphat, solkha taan hun teelin Khuado ding hun ong tun peetpeet ciangin taangkopa-in “Khuazaangin nangai un... Zing ciangin khua ki do ding hi ei …” ci-in daktal tum kawmin mikim zak dingin awng kawikawi hi. Azing ciangin kiginni kipan tading ahi hi.

Kigin ni,  (Ni khat ni) : -in khuasung kihah siang hi. Khuasung lampi teng leh innkiim innpaam teng ki hahin, tuilam singlam leh tuinaak zong kipuah siang hi. Nungak tangvalte-in pawi sung aa zat ding meilah la dingin nuam kisa uh aa aciim theithei atam theithei vazong uh hi. Khuaimei, datmei kinei lo ahih ciangin meilah pen zan khuamial ciangin kidee hi. Khuado pen ‘meivak pawi’ zong ahih zah khatin, meilah tampi kisam hi. Meilah late ong tun uh ciangin ‘aapee chauk’, ngakeu bangin ten silselsa-in kiging khol uh hi. Papite-in pumpeeng (mau) phiit bawlin phiitlem uh hi. Nupi pawlkhat lo lam pai-in, asisate kha sam uh aa “ asi ahing kha na om uh leh ong ciah un, zu leh sa neding hi hang” ci-in lobuk aa suangthute sawnpai uh hi. Upate-in Khuado sung gamtat nading vai kikumin lawmzu luupin tukhawm uh hi.

Kaubeng : Nidanglai-in innsung ah ong nasak, ong sisak thei dawi leh kausia om hi ci-in um uh aa, Khuado simin dawi hawl khiatna kinei hi. Inn lusihin pasal athahat khatciat kiteelin, akhut khat ah tuga, heiga, molhtum khat pepeuh tawi-in alang ah meilah lom khat dee-in tawi hi. Anung ah thau tawi khat, khuang pua khat leh daktal pua khat in zui uh hi. Siampipa-in thau a lot khit ciangin, tua pasalte-in a inn sung tek uah tuga, heigate tawh inn nunglam panin inn khuam, sual tung, kawm tung, bemkawm, gulhtawng teng satin, “ Dawi hang-kau hang ciah ta ou! Na zun na ek namsia ei !, Na ni na kha cingta, na zi na tate aang zuan ou, nazi na tate-in ong ngaklah uh ei, na khua na tui zuan ta ou!” ci-in awng gawp uh hi.  Mipite-in tum thei khempeuh, aging theithei daalpeek, bung hawm saatin awng uh aa khuabuppi kigamlum ziazua hi.

 hawlte kongbiang a tun uh ciangin atuga, aheiga, amolhtum uh inn pualam lawn khia-in,” Awi ! tai ei-tai ei, ciah taktak ei, a kawngbuuk, a khukbuuk, a ngaltaak kha ing ei”ci-in awng gawp uh hi. Thau zong kilawn hi. Tua ciangin ameilah alang tuakin khenin kong sak leh kong khang ah nahtang kuak aki bawlsa sung ah akuangsa-in koih hi. Hih meilah kivak pen dawite inn sung ah ong lut kik ngam nawn loh nading cihna ahi hi. 

Tua khit ciangin, sawm tangvalte-in guatawn dawn aa meilah heenin, dee uh aa hausapa inntual ah thumvei kilehin dawi hawlkhiatna kammalteng awng in hawl khia leuleu uh hi. Tuapan thau lawnin, tual biakna mun ah pai-in thumvei mah kiimvelin dawi hawl khiatna te mah kiko-in awng uh aa thau lawn leuleu uh hi. Tua panin dawite khua pualam ah hawl khia uh hi. Azat uh meilah sumbaangte khuasung ah kilutpih kik thei lo hi. Meilah teng gawm khawmin mun khat ah meiphual sehin hal uh hi. Meikhu a tam nadingin sawlbawk khuhin meikhu suah nading vangsak uh aa, meikhu zaam na enin siampipa-in “Sim kum pha hen nacih leh sim lam kaai-in, Zo kum pha hen na cih leh Zo lam kaai-in, sim kum kong ngetna hi, zo kum kong ngetna hi. Miim beem kong ngetna hi. Taang beem kong ngetna hi. Cidam kong ngetna hi, ludam kong ngetna hi. Cidam khansau kong ngetna hi. Tu sawn ta sawn kong ngetna hi. Khi-awh pha, taubulh pha kong ngetna hi. Gal maang lu, sa maang lu kong ngetna hi.” ci-in phuisam hi. Khuasung lam ah meikhut a zaam leh kum pha ding hi ci-in khanglui mite-in um uh hi. Tu-in dawite kihawl khia zo ahih manin, khuasung kisiansuah khinta aa alung uh zaangin navaak uh hi.

Hih pen Khuado bawlna sung ah athupipen innsung bangkua aa kipan khua bup dawi gilo hawlkhiatna leh kisiansuahna hi aa, Pasian asaang mite-in dawi biakna pan “ ïnn phiat” in kisiansuahna lah khiatna lim tawh kibang hi. Dawi apai khiat khit ciangin ‘khuasiam pasian’ ong lut hi ci-in ki-um hi.

Pansiikni, Khuadopini (Ni nih ni) ahi hi. Dawite kihawlkhia zo ahih ciangin, ong lut kik loh nadingun, zingtuungin nupite-in kong gei ah zubel khat tui leihsa, peeng siatsa-in koih aa, agei ah zasan haalbaang khat leh meihol koih uh hi. Pawipi annek ni ding ahih ciangin, annekna ah dawite-in gilnat lainatna ong bawl loh nading kidaalna ahi hi. Apawlpawl, abawng-abawngin unau sanggam teng a innpi ciat uah omkhop ni ahi hi. Nidangin ‘sawm’ ci-in tangval pawlkhat inn dang khat ah giak khawm uh hi. Tuabang aa sawm neite-in asawmte uh tawh zong nekhawm uh hi. Nupite-in kum tawntung a tuam aa akhawi uh vok kigo hi. Bawng, sial leh lawi a kigawh theih hangin Khuadona ah ki tamzat lua lo hi.

Daaihawh : Sa go-in sagil bawlbawl tawh, sa huanhuan tawh zu ne, la sasa, khuang tawh alaamlaam tawh ki om aa ciamnuih genin mi anui saksak tawh, nuam kisa mahmah uh hi. Sa amin ciangin, asin, alung, atuap leh akal tawm ciat aatin tua kum sung aa misi neite ki puak aa han ah misi an puak “si ansiah”  ding in kizang hi. Nidangin misi luang leisung ah kiphum lo-in han ah tau kidawh tung ah aluang ki tu sak hi. Nupite-in tangho ahihkeileh taaksih, zu leh tua sa sungkua namcin teng tawh han ah vapai uh aa, misite luguh sathau nilh sakin, zu tulhin sa luui uh hi. Tua bang ahih kawmkawmun va kapkap uh hi. Hih pen “daai-hawh” kici hi.

Daaihawhte ong tun kik mateng an kine lo hi. Ong tun uh ciangin uhaampeen khatin zu kam khat teepin vanlam phih aa aphuisam khit ciangin zu gualteepin an nek kipanin uh hi. Tu-in Zomi tampi-in zing leh nitak sa vive i nek hangin nidangin kum khatin Khuado ciang bekin sa ane zo mi tampi om uh aa, Khuado pansiik ni kingaklah mahmah ciat hi. Kum kibengletin angakngak uh sa lim zu khum anekzawh zahzah uh duh bangbang ne-in lamgui laam uh aa nuam sa mahmah uh hi.  

Thang Ho zong a-it mahmah anau Lian Do’ han ah khuamial kuanin daai vahawh aa, ong tun kikciangin, khuasung khempeuh mei taang zihziah leh taangsuakte mei tang zeiizaii amuh ciangin hih la na phuak hi.“ Dona lingling-do na lingling ee, gualin kumkhua do na lingling. Gualin kumkhua dona lingling e, Do han ah nau bang va kap tang e. Nau bang kap khau bang va ciah ta’ng e - gual i lenna taang na siilsial e” ci-in la  na phuak aa tuni dong Khuado simin i sasa lai hi. Ahih hangin hih“ Naubang kap khau bang vaciah tang ee, gual i lenna taang na siilsial e “ pen mi tampi-in kithei kim lo-in amasa taang nih bek kisasa zaw hi.( Amicih Pau) . Khuado meilah kidee a etlawmna la kiphuak hih Thangho la bek om aa thupi mahmah hi.

Khuai kila : Nidangin sih leh nat tamin kikihtapen ahih manin, ong pai ding kum thak sung ah bangci ding cih ki khalau pen hi. Tua ahih ciangin, mailam cidam ding, kaamphat ding mah ki thei nuam ahih ciangin, khuai lak pen athupi khatin kingaihsun hi. Tuunpi, ngalthen, ngaltun, khuaithuum cihbang, khuaizu nei lo, khuainote omdan enin mailam thu ding theihkholhna aisanna nam khat ahi hi. Khuai pen tangvalte-in zon kholhsa-in nei uh hi. Khuamial ciangin khuai kila aa, khuainote asih loh nadingin meikuang, meikhu zang lo-in khuaipite gua taiteh tawh teplum uh hi. Khuaipheng ahoihpeen la uh aa, khuai note omna asiin, apaan dildel pen siampipa sawl pa bekin hong khia hi. Asia lo dingin naang lukhu sung ah koihin kaangtakin ong la uh hi.

Tua pan ong ciah uh ciangin gamkhau, veihnam khau, aki gamlatna akikimin lenin khatkhatin meilah dee kawmin phiit tumin ong pai diudeau uh aa gaal-et leng muhnop mahmah hi. Khuazaangin innka taangpan ki gaal-et ngeingai hi. Khua mual ah ong paipih masa uh aa singkung tung khat ah koih uh hi. Khua panin kidawn ngeingai-in zu apuakte kitulh, sa kibak uh aa nuam kisa mahmahin zan kim dong lamlam uh hi.

Khekleh ni (Ni thum ni) :  Khuaibu tual bawlna mun ah ong paipih uh hi. Tua lai ah kong bawl uh aa, siampipa leh upate-in na ngak hi. Siampipa’n, ”Sanpi sanno nahih leh kileh in. Miim leh sawmtaang nahih leh ong lutin” ci-in thumvei dong hi. Khuai tawipa-in “Sanpi-sanno hi keng Miim leh sawmtaang hing” ci-in thumvei adawn khit ciangin lut sak hi. Sanpi-sanno pen natna lian natna neu cihna hi aa, mim leh sawmtaang pen vaimim, taang, an, cihna ahi hi.

Tualmun aa mawngkung tung ah khuai bu kikoih aa, khuai bu tung ah khualu, khuataw lam ciaptehna bawl uh hi. Hih khuaibu pen numei, adeuhin, nupi naupaai lai leh naupangte et ding kiphal lo hi. Tua lai ah, khuai la “Ka lo nawl aa khuai aw e, sim ngalthen, zo ngalthen aw, nang kong dong e. Nang kumkhua na thei aa kong dong e, ningzu a ken dong, aisa a ken dong e” sa in laam uh hi. Siampipa leh upate-in khuai bu veel uh aa khuai note-in a siin apaan dildel abawl kik, ahuk kik leh cidam in an kihau ding aa khuai note asih leh sihna, natna tam ding cihna hi ci-in um uh hi.

Khuai Saaktan ni (Ni li ni) : Hih ni-in khuai ki ai hi. Mundang ah pai lo-in sawm ciat, inn ciat  ah sa go-in ki-om ciat hi. Khuai aihnadingin vok, keel, ak cih bang kigo thei hi. Keel tawh khuai ai zote asih uh ciangin aluang ‘tho-in a bawp loh nangin khuai-in hung hi’ ci-in upna nei uh ahih manin keel taw khuai aih peen kithupi ngaih sut hi. Nitak lam ciangin nungak tangvalte laamtual ah kisutuah kik uh aa nuam kisa-in zan thapaai laamlaamin kikawikawi uh hi.

Geelzu : Tanglai-in Zomite-in akhawhsa sung pan athupi ngaihsutpeen uh taang ahi hi. Tang seu sawm nih anei pepeuh tangvalte’n gaam uh aa geelzu luup sak uh hi. Anung lam ciangin taang sawm nih aneih kei uh leh zong sawm khat aneite leh vaimim haute zong geelzu kiluup sak veve hi. Tang tuazah a neih loh uh hangin mai kum ciangin a hau nuamte-in geelzu luup uh aa zu diil keei hi.

 Asian ni (Ni nga ni) : Pawi ven ni pen i theih ciat mah bangin ki lungleng ciat hi. Hih ding dang om lo-in kingai lai tek, ki lungleeng lai tek ahih ciangin geelzu omna mah ah ki sutuah uh hi. Kingai ki aamin atu khawm, akhawl khawmkhawm lai zong om uh aa la sasa uh hi.

“Lenlai sinthu kumkhen lenkhuang khang zam luangin kei ong phawnge. Khang zamluangin kei ong phawng lai lenkhuang tawi maimit ah tuang lai ee”
ci-in adiakdiakin maimit kisuansuan nungak tangvalte-in kigen zo lo zahin Khuado anopna ngil thei lo-in lungzuan lawh, vul lawh ningniang uh hi. Bangbang hitaleh lung zuang lai pipi, bilkha ah khuang le zam ging ciiaiciiai lai mahin Khuado ong bei ta aa “nikum Khuado ding ngak ngiungeau tave hang! “… ngaklah pipi-in.

Thukhupna :
Khuado thu i ngaihsut ciangin, anuai aa thute i phawk ding thupi hi.   

a/  Kum khat sung i khawh i tukna pan Pasian ong piak anpalte ne-in i lungdam mah bangin Pasian kiang ah lungdam i ko masa khial kei ding hi.

b/  Zomite-in kum lui-kum thak khenna, kum khen pawi taanglai pek aa kipan  anei ihi aa “minam thupite tawh tan bang ikim teeiteei hi” ci-in ong phawk sak hi.                          

c/  Kum thak dawn i hih mah bangin, alui, khuazing, ngaihsutna hoih lo, gitlohnate gal do bangin do-in hawl khia-in, athak, ahoih ngaihsutna, ki-it kikhualnate Khuasiam bangin saangin i lungsim sungah zin bangin i dotawntung ding hi.

d/  Khangsawn momnote, sin thu kikhatin tui bang luang khawm un. Zomite kithuhualin, thu kikum khawm diamdiam ding, mi nampite bangin kizahtak-kithupi bawl siam ding, namneu lungsim ahii kikoko, kitottot, kikhenkhennate  nusia-in mailam saupi i khual ciat ding aa i ngeina hoihte i keemcing ding hi.   

I biak Pasianin mailam ah zong Khuado  nuamtakin ong do khawm sak zeelzeel tahen. Amen.                     
                                                 ………………………..

KHUADO : Ngaihsutna thak khat:          Dr Dong No
Khangluite-in Khuado tawh kisai-in ong vaikhak uh, athupi mahmah thu khat om hi. Lai nei lo ihih ciangin hih late tawh ong vaikhak uh hi. “Meiibang theng kuan pupa pianzil nah zu bang puah dih ni e./…. khangsawn momnote’n gia bang zuun leng e” ong ci uh hi. I ngeinate beikuankuan ahih ciangin, kemcingin i ahoihzawin puahphat ding nasep khat ong nusiat uh hi.  

Zomite tu-in i nuntak zia tanglai pupate hun sangin kikhaisaangzaw ahih ciangin, mailam ah Khuado a etlawmzaw, athupi suahzawk nadingin i puah i zuun ding mawhpuak anei ihi ta hi. Anlim ne-in gualnuam bek hi lo-in midangte-in Khuado ong theihpih leh ong zahtaak sak nadingun puahin i zuun ding, i pusawnte-in ong vaikhak uh hi.

Khuado sung aa kihih thu atuamtuamte lak ah dawi leh kau hawlkhiatna (exorcism) tawh kisiansuahna (spititual cleansing) pen athupi penpen ahi hi. Hih kisiansuah ciangin“kau beng” ci-in, khuazaangin meilah kidee-in dawi-sia inn sung pan khua pua ah hawlkhiatna kinei hi. Dawi hawlkhiat khit ciangin, baangsak - baangkhang, taangban teng ah meilah dee-in nahtang kuak sungah ki siat in khua sung teng taang pempam aa etlawm mahmah hi. Khuabup siang khin cih lahna hih meivakna athupitna i phawk kha kei aa nek leh dawn bek i thupi sak kha hi. Tua ahih ciangin ahoih mahmah hih i ngeina, siansuahna meilah detna limtak i kepcing, i puahphat ding thupi hi.

I phuahtawm, akilawm ding aa i bawltawm hi lo-in taanglai-in meilah tawh khuasung taang zihziah hi.(.…gual i lenna  taang na siilsial ee,… Liando la ) Tua ahih ciangin i khanglui ngeina hoih, meilah det pen tu hun tawh kituakin daatmei, khuaimei vaakin nopcitakin i innte zeemin tee sak zihziah leng (a) i ngeina thupi khat kepcingna, (b) thu-um mite i hih mah bangin Pasian khasiangtho tawh kisiansuahna lah khiatna leh (c) I pu-I pate-in ong vaikhak thute zahtaakna tawh azui ihi ding hi.

Ko innkuanin tu kumin Friday, Oct. 20 pan Tuesday 24 Oct. 2017 ni dong meivaak tawh ‘meivak-Khuado’ ka kipan uh hi. Ka veengte-un ong dong aa, Zomite kumthak Khuado meivaak thu ka gen ciangin zaknop sa uh hi. Khuado meideet na hangin midangte-in i ngeina thupi sa-in thei nuam uh aa lungdamhuai kasa hi.

Ka veeng khatte’ atapa neu khatin apa kiang ah “Pa, en zong inn ah meivaak ni” ci-in kibawl keei hi. A ciah ding uh ciangin a pa-in, a tapa kiang “ Happy Khuado New Year” ong ci sak hi. Etlawm bek lo-in kimeet kasa lai hi. Mei vaak kei le ung kuan’n ka Khuado lam uh ong theih sak ding hiam? Maikum aa kipan meivaak in Khuado dawn ciat ni ci-in kong zawn hi.     

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHUADO PAWI THU. ~ Dr. James Suan Za Dong Description: Rating: 5 Reviewed By: Cinpu Zomi
Scroll to Top