728x90 AdSpace

Hot
Menu
Zon-ol na Donate

Latest News

Kum zalom 21 mite khuasakzia ding. ( Being human in the 21st century) Lai gelh ~ Rev. Dr. Pau Khan En

Kum zalom 21 mite khuasakzia ding.
( Being human in the 21st century)
Lai gelh ~ Rev. Dr. Pau Khan En
Kawllai pan Zolai in lailet ~ Lian Tuang


Leitung mihingte khangtangthu thuk takin akikan ciangin a tawntungin kikhelkhel ahihna kimu thei hi. Nidang hunlai in kikhelna pen manlanglua khollo hi. Ahi zongin ahun zui in kikhelna zong ong manlang semsem hi. Nidang lai in thukip thupomzia khat a kikhelna dingin kum 100 val bang a kingak hangin kum zalom 20 bei kuan a kipanin kum 10 sung nangawnin thungaihsutzia thupomzia tamveipi kikhel man hi.

Tua ahih manin abeisa kum 1000, kum 100, kum 10 hun sunga thu omsate hoih tak I khinkhai kikin i nuntak theih ding thupi mahmah hi. Hih thului sungah tu hun kum zalom 21 sungah mihingte nuntakzia ding le thupomzia ding atom in I kikum nuam hi. Kum zalom 21 in mihingte koi lamah ong kalsuanpih hiam cih I tel ding deihna ahi hi.


1) Muhmawh thu santheihna ( Metaphysical concept )
Kum zalom 18 sungin leitung pilna nasiatakin khangto hi. Tua hun a kipan kum zalom 18, 20 sung dongah leitung nate thu ( muhtheih) bek thupi kisa in, huihlak le muhmawh thute kinusia pian hi. Thu khat peuhpeuh a thu a la tawh hoih tak a kigentel theihnakleh thuman hi pah a, thu khat peuhpeuh muh theih in teti bangmah a kilah theih keileh a khial hi pah hi. Tua ahih manin leitung nate a bulphuh pilna ( science ) le sihnung thu le mumawh thu a bulphuh biakna thu pen a tonkhawm thei vetlo hi mai hi.

Hun ong kikhel toto a tua tegel damdam in ong kinai semsem hi. Abei sa hun lai in leitungnate pilna ( science ) le biakna thu pen a kikelki, a ki-elpuak in a kingaihsut hangin kum zalom 20 bei kuan ciangin tuabang hi nawnlo hi. Piansak leitung nate koici bangin piang hiam ( How ) cih pen leitungpilna ( science ) tawh kilakkhia a, bang hangin piang hiam ( why )cih pen biakna lam pan kigenkhia hi. Tua tegel a kido ding hi loin a tonkhawm ding ahihna kisangsiam hi.

Kum zalom 21 hun sungah eite in zong kip takin a kilaktel thei muhtheih thute i pom theih mah bangin muh theihloh( muh zawhloh, muhmawh ) thute zong a sang thei ding ihi hi. Bang hang hiam cihleh leitung vantung nate thu pen nidanglai hunte sangin tangzai takin kikantel theizaw ta hi. Muhtheih van le nate thuk takin a kikan semsem ciangin tuate khempeuh a langkhat ah a kilanglo thuman le kizopna lianpite a om dimdiam lam kimukhia hi.

Muhtheihloh Pasian cih bang om ngeilo ding hi a ci mipil mahmah khat om hi. Mihingte muh theihloh le muh bat lohna ah bangmah om tuan lo ding hi a ci ngiat ahi hi. Zingsang khat a pakhuan sungah apaileh lingpak hoih mahmah khat mu kha hi. Hoih sa lua ahih manin “ Hoih mah si e, Topa” ( My God! How beautiful ) ci kha vat hi. Pasian om taktak hi cih a up loh hangin lingpak hoih mahmah khat amuh ciangin lamet loh pi in Pasian cih kammal lo kha ahih manin tua Pasian pen a om taktak hi ding hi ci in sang kik hi.

Clive Staples Lewis ( 1898-1963 )pen mikhang lai at siam mahmah khat hi a, Pasian omlo hi a ci vilvel khat ahi hi. Khat vei Pasian om lo hi cih a lahtelna dingin lai atat hi. Alai at zong tha ngah mahmah in mai khat khit mai khat at ziahziah hi. Ni tampi a at khit ciangin a lungsim tawngah dotna lianpi khat ging valval hi. Bang hangin a omlo pi khat kitheihmawh bawl lel loin a omlohna thu lahkhiat ding hanciam laizang ka hi hiam cih ahi hi.

Tua dotna pen a lungtang sungah mei bangin kuang semsem hi. Lai maikhat a zawh sim in tua dotna za tautau hi. Atawpna ciangin om lo dinga ka upmawh thu khat hih zah a ka buaipih pen a om taktak man hi zaw hi ci in kikhel vingveng a Christian lai at siam minthang C.S.Lwis ong piang hi. Kum zalom 21 sungah lungsim kongkhakte tangzai takin hongin muhtheih nate thute le muhtheihloh thute zong I kantel ding kisam hi.

2 )Tangpitangtavai bulphuhna ( Social focus )
Kum zalom 21 sunga nungta mihingte in tangpitangta tawh kisai vai khempeuh limtakin i ngaihsut ding kisam hi. Tangpitangta vai I konlawh nading ong tawsaw thubul 3 om hi.( a) Kizop kithuzakna a khantohman (Information Technology) ( b ) buaina hamsatnate ni dang hunte sangin lianzaw ( bigger issues ) (c) Mihingte phattuamna ding kipawlna tam semsem (more humanitarian agents ) hang ahi hi.

            Mihingte khat le khat kizopna pen nidang bang loin khangto mahmah ta ahih manin Leitung pen khuata khat tawh kibang ta hi ci in Canada mipil Marshall Mc Luhan in gen hi. Pilna siamna khangtolua ahih manin leitung langkhat a thupiang pen tu le tu in leitung langkhat ah kimu thei pah zen hi. Tua ahih manin mihingte in ei tumtak tek in a kimawk om thei phanawnlo suak hi. Khat le khat a kizom dimdiam hi. Mun khat a thupiangin leitung mun khempeuh lawh thei hi. Tua ahih mani kum zalom 21 sungah kuamah kitangtat theilo hi.

Kizopna manlang lua mahmah ahih manin thu ginalo khat pen tawmvei sungin leitungah kizel thei hi. Hih Globalization hangin thusia thupha khat peuhpeuh thakhat thu in kizel thei hi. Ngeina le gamtat lutekzia, thupomzia, natna tuamtuam cih mihing tawh kimemat thute khempeuh zong gam khat minam khat neihtuam cih bang om thei nawnlo hi. Mi khempeuh tawh a kisai tangpitangta vai hi mang hi.

Thusia lasiate hangin khat le khat kizopna a pian mah bangin nuntakna neite phattuamna ding a hanciam mi thupite ( humanitarian activities ) hangin zong leitungah khat le khat kizopna ong khang leuleu hi. Zawhthawh thu tawh khat le khat simawh bawlsiatnate abei nadingin ma apang kipawlna tuamtuam ong khangkhia hi. Biakna bulphuh in kipawlna tuamtuam ong om hi.

Mipi phattuamna ding NGO tuamtuam ong om hi. Tua ahih manin kum zalom 21 sungah khutzep zilzial in kuamah ki om mawk thei nawnlo hi. Mipi ading mapan loh phamawh hi. Tangpitangtavai mapanna bualpi sungah kipek loh a phamawh ahi hi. Hih bualpi sung kipekloh a phamawh sak thu nam nih i gen beh nuam hi.

A khatna ah gamvai ahi hi. Democarcy a inntekna hih kum zalom 21 sungah mi khempeuh pen gamvai ( politic ) tawh kipelh theilo hi. Banghang hiam cih leh gam kiukna vai pen thu khempeuh tawh kizom hi. Gamvai I cih pen mihingte nisim nuntakna tawh kisia hi.” Na huam sunga hawklam na bawl pen gamvai hi pah hi.” ci in Gen Aung San in gen hi.

Bang hang hiam cihleh tua na hawklam bawl pen nang ading ahoih mah bangin na vengte ading zong a hoih ding kisam hi. Gamvai mapanna cih pen thuneihna ding beka nasepna hi lo hi. Nangma nuntakna le na khua na tui na gam na lei a khantohna ding mapanna ahi hi.  Kuamah kipeng theilo hi. Tua ahih manin kum zalom 21 sungah gamvai kinusai theilo dinmun ahi hi. Pilvang tak leh citak takin I kihel kul hi.
           
A nihna ah sum le pai zonna lam ahi hi. Leitung sum le pai hauhna tawh kisia thute thuk takin a kikan tel ciangin sum le pai 80% pen leitung mipil mihaute khut sungah om a, amau pen leitung mi 20% pha hi. Leitung sum 20% pen leitung mizawngte khut ah om a, leitung mimal 80 % in kihawm hi ci hi. Hih thu I et ciangin lamdang I sa hi. Bang hangin hih bang piang thei hiam cihleh a kilekkimlo kalsuanzia ( system ) hang ahi hi.

Zawnna ngauna hangin thusia lasia tampi ong piang hi. Natna satna, guta buluh le tualthahna nangawn piang sak hi. Tua ahih manin kum zalom 21 sungah na nuntakna kilamsangin na khantoh theihna dingin sum zongin na nasep kul hi. Na nasep ciangin ut bangin upmawh sepgawp loin lampi man tawh thuman takin na sem dinga khang tampi kikhom dingin nasep loh phamawh hi. Mi khempeuh nuntak nuamsa in a cihtheih ciangin zawnna ngaunate ong bei dinga tua ciangin mi khempeuh lungmuang takin ki nungta thei ding hi.

3) Kim le pam khuadak in( Ecological focus )
Kum zalom 21 sungah mihingte in neihsa lamhsa hauhte tawh lungkim loin kim le pam( mual le guam, singkung lopa, …) zong hoihtak en in I khuadak ding kisam hi. Banghang hiam cih leh leitungah mihing kibehlah in khang hanhan hi. Ahih hangin leitung le leitung pan a piangkhia nate kibehlap nawnlo hi. An ne kibehlap in logam kibehlap lo tawh kibang hi. Tua ahi manin gamsa vasa le singkung lopa pawl khat cimang ta hi.

            Tuate hangin khuahun kikhel hi. Hamsat dongtuahna le kialpite ong tung hi. Gilkial dangtakna le natna satna tam semsem hi. Hih thute a pianna hang taktak I kan ciangin mihingte in kim le pam singkung lopate I thudonloh man na hi gige hi. Tua ahih manin kum zalom 21 sungah mihingte in kim le pam hoihtak I kep loh phamawh hi. Biakna, kipawlna le kumpite in kim le pam khuadak in hoihtak I kep ding ahi hi.

4) Ahoihzaw sanzia ( New concept )
Abeisa kum zalom 20 hun lai in thuman thutak cih pen kikhel ngei loin kip ngiungeu hi cih sanzia ahi hi. Thu khat peuhpeuh thuman in a kiciapteh nakleh tua tawh kisai ngaihsutna dang om khempeuh a khial hi pah hi. Ama biakna man hi a cih nakleh adang biakna khempeuh khial sak pah uhi.
           
Kum zalom 21 ciangin tuabang lanlan hih huai nawnlo hi. “ Ka cih sa ka cih” cih thupomzia panin hunthak le ong pailaiding ( Postmodenity ) khuahun luanziate hangin thuman I cih pen a mite muhna le ngaihsutna tawh kisai zaw a, aman khawmkhawm ( relative truth ) thopomzia pen kum zalom 21 ading thusanzia ahi hi. Hih bangin kisang theikim peuhleh biakna, thu le la khat peuhpeuh hangin langlekluatna ( extremism ) ngongtatnate om nawnlo ding hi.

5)Kilemna lunggulhna ( Peace loving human )
Kum zalom 21 mite pen kilem ding a deih a hanciamte I hih ding kisam hi. Abeisa hunte ah a lipkhaphuai a cizekhuai gal kido tampi kituak khin ahih manin kilemna pen hanciam loh aphamawh thu ahi hi. Biakna khempeuh thuguipi taktak pen kilemna mah hi a, biakna kim ciatah picing semsemna panin leitungbup dongah kilemna akizelhkhiat ding thupi mahmah hi.

Kum zalom 21 mite pen kilemna a deih ( peace lover ) ciang bek hi loin kilemna a piangsakte ( peace makers ) ahih ding kisam mahmah hi. Huaihamna, gitlohna, hazatna tawh kidim hih leitungah itna, mawkmaisakna, kilemsiamna, thuman thudiknate khahksuah loin mihingte in nopna daihna kilemna a lam ding I hi hi.

Atunga thulu 5 tawh kum zalom 21 mihingte nuntakzia ding a kisam thute I gen khin hi. Mi khempeuh in a kimu theilo thute late I up I sanloh phamawh hi. Tua tungtawnin biakna khat peuhpeuh tawh ong kizom ding hi. Tua biakna in gamtatzia ong kilamdangsak dinga akilawm bang gamtatna (ethic) kinei thei ding hi. Tua tungtawnin mi khempeuhte lunggulh mahmah kilemna ong piang dinga vangam malep nopna ong tung ding hi.

Biakna pen a kimu theilo vantung ading bek hi lo a, leitung mahmah ah hamphatna I ngahna ding ahi hi. Mikhempeuh in gamtatna pha ( ethic ) tawh manpha takin I nungtak ding kisam hi. Biakna tawh kimakaihna pen thupi mahmah hi. Tuate hangin gamtathoih gamtatphate ong om thei pan hi.

Tangpitangta bulphuh in gamvai( socio-politic), nuntakzonna (socio-enonomic) te ah lungmuanna lawhcinna ngah in vangam hamphatnate I mu ding hi. Kim le pam singkunglopate hoihtakin I puah I zun dinga Eden huan bangin anim dildial leitung hamphatnate I ngah kik ding hi. Pawlpi masate lutangpi ahi Irenaeus (c.130-c.200) in “ Topa Jesuh mi bangin ong pianna pen mihingte Pasian I pian theihna ding ahi hi. ( God has become man to make man become God ) na ci hi. Ahi zongin Lai Siangtho thukan mipil Scot mi John Macquarrie ( 1919-) in “ Topa Jesuh mi bangin ong pianna pen mihingte mi taktak ( Authentic human) I bat theihna ding ahi hi” ci hi. Kum zalom 21 sungah mihing taktak bangin I nuntak theihna dingin a tunga thu 5 te phawk tawntungin nungta ciat ni.

Source :

( Myitta Taman , vol 55. No 4, Nov 2017)
  • Blogger Comments
  • Facebook Comments

0 comments:

Post a Comment

Item Reviewed: Kum zalom 21 mite khuasakzia ding. ( Being human in the 21st century) Lai gelh ~ Rev. Dr. Pau Khan En Description: Rating: 5 Reviewed By: cinpuzomi
Scroll to Top