728x90 AdSpace

Hot
Menu
Zon-ol na Donate

Latest News

TATE PANTAH NI. Agelh ~ GS Pau

TATE PANTAH NI.
Agelh ~ GS Pau
Hunkhat laai laigelh Sia GS Pau'te Innkuan

1.         Pasian' thu tawh pantah ni
            Topa in, "Tu ni-a no kong piak hih thute na tate uh tungah limtakin na hilh ding uh a, na inn sungah na tut uh ciang, lam na pai uh ciang, na lup uh ciang leh na thawh uh ciangin tua thute na gengen ding uh hi." ci hi (Thkna. 6:6-7). Topa in tate a pantah dingin nu leh pate mah tavuan hong pia hi.
           
Jews mite in a tate uh a neu tung mah panin ni simin nai khat sungta Synagogues pan na pantah pah uh hi. Tate kum 4 a phak uh teh "Shema" ci-in thungetzia na hilh masa pen uh hi. Tua khit ciangin Lai Siangtho hilh uh hi. Tua zomah inn sung nuntakzia ding, kizep kipuahzia ding, khat leh khat kilawmtakzia ding, nuntak hoih tawh nuntak theih nading, mi' lak omzia ding, cihte hilh uh hi.

            Naupangnote' lungsim pen lai bangmah a kigelh nailo laigelhloh, aw bangmah a kikhum nailo tape, leh khaici bangmah a kiciing nailo leihoih tawh kibang a, siangtho mahmah hi. I gelh bangbang, i khum bangbang, i pawi bangbang a sia, a pha amau' sungah hong pokhia hi. Hihte pen zakna leh muhna pan vive-in a ngah uh ahi hi. Tua ahih manin naupangte lungsim sungah laihoih bek mah gelh ni, thuhoih bek mah khum ni, khaicihoih bek mah vawh ni.


             Faro' tanu in Jokhebed kiangah, "Hih naupang la in la, kei' adingin hong khoisak in, na thaman kong pia ding hi." ci hi (Pai. 2:9). Jokhebed in a tapa keem kha si, kep thaman zong ngah lai hi. Jokhebed in Moses a neu tung mah panin Pasian' thu tawh limtakin na pantah hi. Tua hang mahin Moses a gol ciangin Israelte makaipi hong suak a, a mipihte Izipt mite' khut sung pan hong honkhia hi.

             Tate pen Topa' kiang pan hong pai thupha lianpen ahi hi (Late 127:3). Tua ahih manin a neu tung mah pan lampi maan tawnsak pah ni. Tua hi peuh leh a teek dongun lam hong pial nawnlo ding uh hi (Pau. 22:6). Innkuan sungah pate pen zumkah, khualzin, sum zongin vakkhia den uh a, tate pen inn ah nu tawh tam ompen uh hi. Tua ahih manin innkuan sungah nute thupi hi. Leitung ah nute' hangin a khuasuak tate tampi a om mah bangin, nute' hang mahin a kisia tate pawlkhat zong om leuleu uh hi.

            Hannah in a tapa Samuel a neu tung pan mahin Pasian' thu tawh hoih tak na pantah pah ahih manin a gol teh Saul leh David te Israel kumpi dingin sathau a nilh kamsang lianpa hong suak hi.

            Timothy zong a pi Lois leh a nu Eunice te in a neu tung pan mahin Pasian' thu tawh hoih tak pantah uh ahih manin a gol teh khangno hoih khat leh Pasian' mizat lian khat hong suak hi.

            Susanna Wesley (1669-1742) in tanu tapa kigawm (19) nei hi. A pasal Samuel Wesley pen Pastor ahih manin pawlpi vai tawh manlah den a, ama'n inn pan a tate Pasian' thu tawh limtakin na pantah hi. Tua ahih manin a tate sungah Pasian' min a daisak leh nu leh pa a maizumsak cih bang na omlo pah hi. A tapa John Wesley (1703-1791) bang England gam khan'lawhnapu hong suak a, Charles Wesley (1707-1788) in Pasian phatna la bekbek dawng (8000) bang phuak hi.

            Jonathan Edwards (1703-1758) zong a nu pen Pasian a zahtak Rev.Solomon Stoddard' tanu hi a, a nu in a neu tung pan mahin Pasian' thu tawh limtakin na pantah ahih manin Great Awakening kici US gam khan'lawhna lianpi a pian' nadingin Pasian' mizatpa hong suak hi. A zi Sarah Pierpont Edward (1710-1758) tawh tanu tapa kigawm (11) nei uh hi. A zi Sarah Pierpont Edward (1710-1758) in a tate Pasian' thu tawh limtakin na pantah ahih manin a vekpi mahin na khuasuak leuleu uh hi.

            John Wesley (1703-1791) in, "Thu ngen den nupi khat in a ang ah a tawi naungeek pen Satan' khut in ban zolo hi." ci hi. Tua ahih manin i tate a kisiat ma-in Pasian' thu tawh lim takin pantah pah ni. A kisiat khit nungah camp khawng ah puak pan, thunget sansan pan, sian'suah sansan pan pen zekai ta thei hi.

            Zanin tho themthum in la, Pasian' tungah kiko in. Na tate in hehpihna a ngah nadingin na lungsim khempeuh pia in (Kahla 2:19). Nu leh pa' pattahna guak bek kicing lo ding ahih manin i tate' adingin nakpi-in thungetsak ni.

2.         Pilna lamah pantah ni
            Khatvei lai-in Japan gamah papi khat in a tate khuallua ahih manin ama' sih khit ciangin a tate' neek ding ngasa tampi matkholhsak hi. Ahi zongin ama' sih ma-in tua ngasate muat ahih manin bua uh hi. A veengpa in a tate ngasa matsak lo-in, ngamat dan hilh hi. A pa a sih khit ciangin a tate ngamat tawh na nungta zo lel uh hi. Tua tungtawnin "Na tate ngasa pia ke'n la, ngamat dan hilh in" cih Japan paunak hong piangkhia hi, ci-in kigen hi.

            Nu leh pa pawlkhat in tate sum, inn, dolcial, motor, motor cycle cihte kiguan hi. Ahi zongin pilna kiguan kha lo hi. I tate in tua van leh nate na keem zolo uh a, tawmvei sungin na bei ziau thei hi. Pawlkhat in thadahna leh kisiatna peuhin na nei zawsop thei lai uh hi. Tua ahih manin nu leh pate in i dam sungin i tate pilna lamah pantah ni. I sih ciangin i tate pilna gamh nusiat ni. Tua hi leh amau a khan'tawn uh na khomzaw ding uh hi.

            Rev.Khup Za Go (1944-2005) in, "Midangte in a hauhna uh pilna zon'na-in zang mah ta leh, Zomite in bel i hauhna kisiatna peuhin i zang hi." ci-in gen hi. Khangno kisia a tamzaw pen sum a nop zat zo, mihaute' tate na hi zaw pian uh hi.  Zomite pen sagawh kihat a, i sa kigawhna sumbei teng tawh i tate pilna sinsak zen le'ng,  mipil vive suak khinzo taktak ding uh hi.

            A beisa hunkhat-a kipan Zomite in pilna sangin sum thupi kisa zaw hi. Mihing' manphatna pen hauhna tawh kiteh hi. Nu leh pate in tate gina takin pilna kisinsak lo a, sum kizongsak zaw hi. Sumnei tata in tate tan 10 a zawh uh ciangin "Day" kikahsak lo a, "Distance" peuh tawh kisinsak thopthop hi. Hih pen hun khat peuh ciangin i kisikkik kha ngelngel ding hi.

            I tate pilna lamah i pattah zawh nadingin nu leh pate mahmah in pilna i neih masak ding zong kisam hi. Nu leh pate in pilna na nei photphot peuh leh tua in tate na to (challenge) pah lel a, amau leh amau in, "Ka pa' tun'na ciang, ka nu' tun'na ciang peuh mah ka tun' zawh ma teng" ci-in hong hanciam pah lel ding uh hi. Midangte sangin mipilte' tate mah in pilna deihzaw uh a, mipil zong suakzaw uh hi.

            Kawl mihaute in pilna thupi sa uh ahih manin a tate uh pilna sangpipi dong sinsak uh hi. Tua hang mahin a tate uh a vakthap leh a kisia cih bang na om lo a, a hauhna uh zong kizom paisuak pah hi. Zomi sungah sumnei pian pawlkhat in a tate uh sang kahsak lo-in, inn-a motor peuh hawlsak uh a, sumbuk peuh ngaksak uh hi. Nu leh pate in a dampih lai teng tate in khua phawk lo uh a, nu leh pa in a nusiat khit teh khua hong phawk pan uh hi. Ahi zongin tua pen zekai lua khin ta a, kibawlpha kik thei nawnlo hi. Tua hang mahin mihaute' tate sangin mizawngte' tate peuh hong khuasuak zaw thei uh ahi hi.

            Tate in pilna a ngah nadingin nu leh pate lam pan zong nakpi takin panpih ding kisam hi. Lai pil lualo pawlkhat pen nu leh pate in a laptoh zawh manin na khuasuak veve thei uh hi. Tua mah bangin laipil pawlkhat zong nu leh pate in a laptoh zawhloh manin khan'gual na banlah thei veve uh hi. Tua ahih manin tate in pilna a zon'na uh-ah nu leh pate' dinmun thupi mahmah hi.

            Tate in pilna a ngahtheih nadingin nu leh pate in sumtha tawh panpih ding kisam hi. Cil tentan tawh i tate in pilna ngah zolo ding uh hi. Tate' pilna zon'na ah sumbeite pen sumbul kiphum (Investment) hi a, a beimang hilo ahih manin pammaih sak khak hetloh ding kisam hi. Ei' neihsa in a daih kei zenzen leh, lei zong bat ngam mai lel ding kisam hi. Pilna zon'na hang-a leiba pen kiloh lah sam lo, kici ciat hi. I tate kiangah, "Tate aw, na lai uh hong hanciam un. Sum leh paai i cih pen dam peuh le'ng, kizongzong thei lel hi." ci-in hanthawn ciat ni.

            Nu leh pa pawlkhat in inn gina zong nei zolo, niikhoih puanhoih zong silh zolo, anlim tuilim zong ne zolo napi, a tate uh pilna guan kim uh hi. Nu leh pa pawlkhat in zingsang simin niangtui leh moh ne zo den, ni simin sa meh zo den, inn hoihnono nei, motor khawng nei, kham khi leh kham zungbuh khawng neizo lel napi, a tate uh gina takin sang kahsak lo mawk uh hi. Hih pen nu leh pa' mawhna ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

Item Reviewed: TATE PANTAH NI. Agelh ~ GS Pau Description: Rating: 5 Reviewed By: Cinpu Zomi
Scroll to Top