728x90 AdSpace

Hot
Menu
Zon-ol na Donate

Latest News

A Nungta Kam-mal Khat. Agelh ~ Tuang Za Khai @ Khaikok (101)

A Nungta Kam-mal Khat.
Agelh ~ Tuang Za Khai @ Khaikok (101)

Laigelhpa : Khaikok


“Zuihloh a phamawh ‘hih theihlohna’ lampi zuihna tungtawn in, ngahloh a phamawh ‘hih theihna dinmun’ tuntheihna ahi hi.”
~ Arthur C. Clarke

World war II hunsung British te makai-in, a lauhuai Zarmani (Nazi) galpi sungah a mite kem in ahuai, gam a dingin mi muanhuai leh thu dotpi khat zongh hi-in, British Prime Minister zongh nihvei tak a semkha; a zahtaakhuai a cihtakna, a etteh-huai a hanciamna te leh a manpha mahmah a thugen siamna te’ tungtawn in Noble Prize (1953 kum) zongh a ngah; Time Magazine in zongh kum zalom sawmnih hunsung a dingin a pahtawitaak, mi tuampian khat leh a madawk pen khat in a ciapteh uh Winston Churchill ahih leh a theilo kuamah omlo hi.

Tu hithiat in leitungbup in a theiziau hi peuhmahlo hi. A pian kum (20) aphak aa kipan hanciam in tui galkap lut-theih na ding laiphi hi. Thum vei, lii vei a phikhit-teh a lung-gulh nasep ngah in, gam leh lei a dingin a ki piakhia tangval khat ahi hi. A tup leh asawm taktak ahih leh British Ulian muantaak cing khat suahzawh ding ahi hi. Tua-a lungtup thu nuntaakpih ahih manin ahihna khempeuh ah cihtakna tawh hanciam tinten hi. Thupi-in citak ahih manin minphatna ngah toto hi. A piankum (42) cing nailo in Minister 31 ngahzo hi. Minister a ngahteh amah leh amah zongh kimuang simpian ahih manin, a utut ahi gam leh lei a uk uliankhat suak hak nawnlo ding cih ki lamen hi. Tua bangin amah leh amah a ki muan khinkhian laitak, galpi khatna (World war I) hong piangin, Bristish te in gal hong lelcip mawk hi. Tua thu hangin Churchill a zaa ki kiasak hi.


A zenzen in tua hun laitak Churchill a lungkia hileh leitung bup ah ki theikha hetlo ding hi.

Churchill lungkia in thaneem kha peuhmahlo…        

Naseplian a sem kimlai, a za-a kiat-teh zumhuai mahmah hi napi, zum ding leh lungkiat dingin ngaihsun hetlo hi. Bang cih leng nasephoih ngahkik thei ding cih lungduai takin hanciam hi. A kiim leh apaam te’ gensiatna, neumuhna te buaipih masa lo in, a lung-gulh leh atup asawm, nasep hoih ngah ding bek mah buaipih masa hi. A ipsung ah laidal khat pua tawntung aa, tua laidal tungah amah leh amah tha a kipiakna kam-mal: “… kasin ding aa, ka hanciam ding hi… nikhat ni teh kei’hun hongtung lel ding…”

Hun sawtpi khit-teh galpi nihna hongpiang hi. Zarmani te thakhauh mahmah in leitung bup a ding lauhuai liangta hi. Tua laitak in Nazi te’ kithawi zia leh a thahat zia khempeuh Churchill in theisitset ahih manin, British makai te’ kiang ah agen bangbangin Nazi te gamta lianlian mawk hi. Hih thu hangin Churchill a nasep ki semsak kik hi. Galpi aven’ zawh nading han-ciam in nasem aa, tua a nasep na hang mah in Prime Minister kipia hi. Yalta Conference ah Franklin Roosevelt leh Joseph Stalin te tawh ki mu in, galven’ na ding 32 thusung khawm uh hi. Churchill’ ki piakkhiatna hangin British te in gal-lel nawnlo in, galpi nihna zongh daita hi.

Churchill a kumtam simta, a samte kaang in, a elkul khiukheu ta-aa, amit na ngawn in khua muthei mel nawnlo hi. Tua hun laitak in Britain te’ Prime Minister masa-ahi, Robert Walpole in buaih a ngahna, Eton College ah Speech pia dingin Churchill ki sam hi. Hih College pen 1440 kumpek in a kiphut ahih manin, tul ngiungeu in lui gemgam ta hi. A kiim apam aa singkung lopa te zongh hamsuah in vulningniang uh-hi. Tua-atul gipgiap innpi sungah sangnaupang te, sia/siamah te, leh mipil ulian pawlkhat in Churchill’ kamgen ding ngaklah in na tu dimdem uh-hi. Leitung bup ah a minthang vangvang Churchill in bangh thu hong-gen zentam? Ci-in a ngaklah mahmah uh ahi hi.

Churchill ahih leh Ciingciang khat ciangkhut in zangh in, a samkang thingtheng huih in mut in leengsialsial aa, a khut langkhat ah tangtawng pekpan a khuk theih tawntung lukhu khat-tawikawm sa in, College lutna inn kongvang pipan a tutna ding mun zuanin hong lut khiankhian hi. A lukhu leh a ciangkhut-te tutna tung khat ah akoih khit-teh, mipi te’ mailam hongnaih phei-in, a thugen na ding mun hong zuan hi.

Mi khempeuh a lungsim uh lawp thei mahmah in, “… aw hunkhat lai aa ih gam leh ih lei a ding a nuntaakna-a-ap, a lauhuai galpi sung mah ah a mite thapia in a nungkik lo; gual-lelhna leh pampaihna athuak laitak mah in zongh lungkia lo in a hanciam, cihtakna nuntakpih in, gam leh lei a ding tupna hoih tawh nungta in 33 lungkia hetlo in a hanciam ma apang tawntung, a et-teh huai leh a zahtaakhuai, mi gualzo pa in thu hong gen ding hizen!” Ci-in a cimul uh bangh tho keei uh hi.

Churchill thugen dingin hong ki panta hi. Mipi te’ lamet na sang’ in a thugen hong tom mahmah mawk hi. A tom mahmah hangin tua a thugen ahih leh tu ni dong nungta paisuak lai hi. Tua-a thugen na hangin cihtakna leh gualzawhna-a ngahlawh mitampi tak om hi. Tu ni dong mah in tupna kician anei mita’ ding a manpha mahmah kammal ahi hi.

Mipil misiam tampitak a kikhopna mun tua College innpi sung ah, a thugen ding angak mipi te maingat in a-awneih khempeuh tawh kam-mal khat bek lian Churchill in tangko khia ziau hi.

“Never, never, never, never, never, never give up!!” Ci-in mipite’ maitang themvei sung a et gega khitteh a tutna mun zuankik hi.

Tawlpi khat sung mipi khempeuh apau aham omlo in dai khipkhep uh-hi. Them veipi khitteh khut beng ziahziah uh a, tua kikhopna hialbawl ta uh hi.

Tua kikhopna a ki hialbawl hangin, tuni dong a ki hialbawl theilo, a nungta tawntung Churchill’ kammal ahih leh:- “Cikmah hunin lungkia ngei ken!!” Cih ahi hi…

Nisim na nuntaakna sungah
na gamtat khelhna leh na sepkhelhna te’ hangin
maizum ding leh dahluat dingin ngaihsunkha kei-in.
Nuntaakna ihcih limlim pen kisinna-ahi hi.
Kisinna tampi na tuahkhak khitteh,
tua kisinna te’ hangin apicing semsem ding nahi hi.
Na tuahkhak thuhaksa te’ hangin na lungsim leh
na pumpi ninsak in ki siasak ding nahi hiam?
Hilo hi…
Supna leh guallelhna tawh kidim in lametna khempeuh
ki siacip-phial mah leh,
na puukna munpan thokhia in!
Dingto in!
Ki puahphat theihna leh kipat kik theihna dingin,
khatvei, nihvei sang’ a tawmzaw lo
hunpha naneih lam phawk in!
Thala in! Kalsuan khia photphot in!
Pukna leh khelhna ihcih te pen lelhna hilo hi.
Tuate ki zosak kha peuhmah kei-in.
Haksatna, sepkelhna leh buaina cih limlim pen
nuntaakna hizaw cih phawk tawntung in!
~ Ralph Waldo Emer

Source :
A hizolo Omlo (Laibu).         



  • Blogger Comments
  • Facebook Comments

0 comments:

Post a Comment

Item Reviewed: A Nungta Kam-mal Khat. Agelh ~ Tuang Za Khai @ Khaikok (101) Description: Rating: 5 Reviewed By: cinpuzomi
Scroll to Top