728x90 AdSpace

Hot
Menu
Zon-ol na Donate

Latest News

CIIMNUAI INNKUAN THU. Agelh ~ Dr. Khup Thang

CIIMNUAI INNKUAN THU.
Agelh ~ Dr. Khup Thang


 Thumasa
Kawlgam, Vaigam leh Bangladesh gama om eimite pen i ham i pau, i ngeinate in, innkuankhat i hihlam hong phawksakin, suulkhat ah a kualkhawmte i hi hi. Pu Songthu, Songza, Zahong, Zakhai, Songkip, Songmang, Songhen, Lunkim leh Lenthang taangthu nei a, khul, chinglung pan kipiang hi aciteng innkuankhat hihang. A zawdeuhin, mintap (minpu) neite, Dawibom (pusa) abiate, Leng Tong Hoih leh Khalvompu, Ching Khup leh Ngambawm, Thang Hou leh Lian Do, Gal Ngam leh Hang Sai, Benglam(Penglam), Neino leh Nantal, Temtatpu tangthu aneite khempeuh, papite pau leh zangkhatsuan i hilel hi. Khatveivei kampau i awkaih tawmcik-khat a kilamdan manin, minamtuampi kisakha in unaukhatkimlai khatlekhat kisimmawh in, kisutuah, kihawlthawh in, i omkhazeel a, gal in kinei in, i na kisimngei hi. Tudong ciang i innkuan (community) sung damthei nailo hi. Bangzahin i kituamgen in, melma (gal) in i kido zongin tunin Tun (Chun) sung khatpan apiang unau sanggam i hih lam phawkciat veni cih pen keima deihna ahi hi.

Ciimnuai Tangthu 
I pu i pa te’n khuasatna thu agen uh ciangin, “Khul ah kipiang a, Zawm ah kikai hi. Khawlkip ah kikhawl masa a, Tete suangphuhna pan in, Ciimnuai ah kiteng hi.”ci-in khang kivaikhakna in na nei uh hi. Hih Ciimnuai i cih pen khamtung gam i tuncil a i teen masakna khuapi i khuapi masapen hi ci-in i thei siangta hi.1420 AD kum pawl hi kha dingin kiseh thei hi. “Mikang hong khan hun in, Ciimnuai ah inn 30 om lai a, Twel Nin in hausa sem hi ci-in Mikangte’n ciamteh hi.” Ciimnuai mun pen, Tedim pan saizang zuan a i pai ciang saizang khua lutmadeuh mual a kidawh iueu na munkhang, tualmual nuaiteng hi. Tuhun saizang gamlim dung zui-in cileng, “Ciimnuai i cih mun pen Saizang leh Phaileng kikal Meiteigun ciang leh Tedim-Saizang mawtaw lampi khangsiahteng hi. 

Ciimnuai khua-ah pu Songthu in hausa semin a zitawh ta aneih pahloh ciangin azi i naunu Pi Nem Nep (Nem Neh) tawh tapa khatnei hi. A tapa pen Guite ahi hi. Pu Songthu in azipi tawh tapa hong neikik veve hi.


Kampau Thu Theihhuai
Ei unauteng Ciimnuaikhua i teenkhop lai-in kampau namkhat bek mah kizangin ki-um a Thado pau ahikha tammaw acizong omkawikawi hihang. Banghanghiam i cihleh Multi-language Dictionary vai a linguistic survey a bawlte in, Zomi/Chin/Asho/Mizo pau a tamzaw pen Thahdo-Kuki pau sungah na kihel ahih manin, kampau lakpan a luipen hikha dingin ummawh uh hi. Carey leh Tuck in, kampau tawh kisai hibangin naciamteh uh hi. “Thahdo pau pen a kizatcil hun kiciamteh zolo hun apat (since times immemorial) kawlgam sungah nakizang khinta hi… a maute’n mibup taangin min a neihloh hangin a kampau uhpen Thahdo pau naci uh hi. Tawlkhatkhit ciangin khlangkhlang kici uh hi. Kampau pen, mikhat in tapathum nei-in, a u pen in Laamzangpau, anihna pa in Thahdo pau, a thumna pa in Vaiphei pau leh pawl khat in Manipore pau na zang uh hi.”1 Thahdo pau pen paului ahi nak leh nidangin Thahdo pau kicilo ding hi. 

Ciimnuai Innpi pa Pu Thahdo ahi maninleh Thahdo minthanna tawh Thahdo pau na kicikha hithei ding hi. Falam gam, Hakha gam, southern Chin hills, Mizo gam a tengte leh Ciimnuai Zomi i kikhenma i zat pau hikha thei ding hi. Paului pen i omna munciat a pau thak tawh akipsak pawl leh tualgal hang-a paukhem, pausim (secret word) zanga kampauthak azang pawlkhat ki-om kha theih ding hi. Paukhem tamzatte in, pau lui tawmzat ding, paukhem tawmzatte in, paului tamzat khathei ding hi. Paukhem a zanglote in paului zanga pauthak tawh kipsak ding hi. Paului tamzatte pen Chin/Zomi/Kuki kampau adang zang te’n zong, paului azatlai uhleh telpah ding hi. I zat kampau, paului tammaw athak tammaw cih eimau ciat in i ciapteh theih ahi hi.

Pa Awn Za Pau, Saizang (Deputy Superintending Engineer) in hibangin gen hi, “Saizang khua pen i khuapilui ahi hi. Thahdo khan, Thahdote innmunlui, pupa ngeina vanzatte tuni dong ciangin leisung pan kimukhia thei lai hi. Kaphungtong upen Thahdo pau vive ahi hi” (10.3.2003). A paisa kum 400-500 hun lai-in Tedim pau, Tedim mi, Tedimlai cihzong na om selo hi. Prof. Thang Za Tuan in, “Tedim pau, Tedim mi cihzong omlo in,… I pau teng kigawmgawm vek ahih manin Tedim pau (Kamhau pau), Tedimmi i cihkhak hilel hi” ci hi. Tedim gam thu lamdang khatin, ‘Tedimpau om a, Tedim mituam omlo hi,’ omlo cihthu a hihi.

Migration Leh Minthak Ngahna
Ciimnuaikhua-ah suanlekhak nei-in, gam khamzo nawnlo ahih manin, gamhoih, gamnuam zong dingin kuankhia uh hi. Pu Suantak bawngin sih omna munzang a teng uh ahih manin, “Sihzang” kici a, Pu Songphut leh Thawmte behteng gamsai pona munah teng uh ahih manin “Saizang” te kici pah hi. Pu Hang Hill leh a naupa Milun makai-in Balzang zotulak (a votna gam) ah, a teen manun “Zote” a kici hilel hi ci-in Pu Thang Tuan, Mualpi in gen hi (Sang gam Zote’n bel Pu Zo suan hi-ung ci uh hi). Tua mah bangin mual vaiphei a tengte “Vaiphei”, sim (khua lumna gam) lam a tengte “Simte,” teipi pona zang atengte “Teizang,” Khumvumnuai a tengte “Khumnuai mi” kici pah hi. Tulaitak i kilawhna i beh, i phung i bawng minte pen Ciimnuai ah i teenkhoplai-un, a vengminte hi a, tua minte minammin, behmin peuh i sakkhak ding ka lauthawng hi. Ciimnuai pan i paikhiat ciang kimkhat Tripura leh Bangledesh (c. 1725), tu a Mizoram (c. 1765), Assam leh Manipur (c. 1810-37), Southern Manipur (c. 1870) khawng na tungin, kimkhat Tripura lam tung te’n “Cuci” or “Kuki” ki cih minthak na ngah dep uh hi. Manipur tung masate’n “Khong Jai (Khongsai) ci-in minthak naphuak uh hi.2 I theihloh kalin Mikang leh Vaite’n  Kuki kici minthak hong pia sawnsawn in, International level ah Kuki zong i hi veve hi. Dorothy Woodman in, “Manipur phai (plain) a, a teeng Chin minamte pen Kuki ki-ci-in kilo hi”3 ci-in na ciamteh hi. A nungnung lama Manipur paikhiate in “Paite” ci-in min kilo hi. Tua ahih manin Ciimnuai-mite pen sak leh khang ah teng kawikawi i hih manin Zomi, Kuki, Chin hikeng acih aleh, thu kankhollo, lai theilo tawh i kibangkha ding hi.

Beh Leh Phung 
I teenna mun zui-in i pau, i awkaih a kilamdang hibek a, i mi, i beh, i phung a kilamdang i hi kei hi. Sanggam laizom i hihnaleh beh leh phung te tungtawn in tomcik enkik dih ni. 

Guite beh sung pan Thahdo-Kuki, Zote, Hualngou, Lushei, Ngawn, Paite kam a zang om kawikawi-in, tua in unau ahih lam hong laktel hi. Mipawlkhat in Samte beh pen Zote hici napi-in, Falam gam aom Samte beh khempeuh in, taangtawng a kipan Thahdote mah na kici ung cileuleu uh hi. Sia Sawm mate/taithul, (R.C Khampat), in Mangtuang leh Manlun simloh Zo asit taktak omnawnlo hi ci-in kigen kawikawi ta hi” ci hi (29.7.2000), tuakhit ciangin Haokip te’n zong amau tawh behkhat in ci-in ciamteh leuleu uh hi. I phung pen milui mimasa Ciimnuai tuul sung aluah masate Pu Songthu, Songza, Zahong, Zakhai, Songkip, Songmang, Songhen, Pu Lunkim, Len Thang te suanlekhak vive hihang.

Thukhupna 
Taangthu i cih pen kheltheih leh behlaptheih a hikei hi. Bangzahin i kituam gengen a, kidangbawl in gal leh sa in i kido zongin unau kitawng unau kido i hilel hi. Tu a  kipan hong it Topa Jesu sisan in i pu i pa a kipan i mawh i khelhnate maisakin, innkuan lungtang neiciat in, i omna peuhah tuibang luangkhawmin, kipumkhat na tawh kantohna lam mainawt ciat veni. 

(Hi ci paper hi Galngam paper (8.2.2004) sunga kalak a tamzaw ahi hi).

Source :
Ciimnuai Khuavak Volume (2)
(Laibu).


  • Blogger Comments
  • Facebook Comments

1 comments:

  1. For your information, we are the Chin from China, and Jahong Jakhai Songkip etc are not with us

    ReplyDelete

Item Reviewed: CIIMNUAI INNKUAN THU. Agelh ~ Dr. Khup Thang Description: Rating: 5 Reviewed By: cinpuzomi
Scroll to Top