728x90 AdSpace

Hot
Menu
Zon-ol na Donate

Latest News

I KHANGNO LAI-IN KIGINGKHOL NI. Agelh ~ GSPau

I KHANGNO LAI-IN KIGINGKHOL NI.
Agelh ~ GSPau

1.         I kha ading kigingkhol ni
            Eite pen hih leitung ah tawmvei sung a peemta pak bek ihi a (Late 39:12), i nuntakna bang hun teh bei ding, cih kigenkhol theilo hi. Tua ahih manin a kiging kholsa-in i om den ding kisam hi.
           
Leitung ah kumpi minthang, mipil, milian, mihau tampite in leitung khangkhat ading kigin'kholhna nei ciat uh hi. Ahi zongin a kha adingin kigin'kholhna nei kha lo thei mawk uh hi. Italian politician Cesare Borgia (1475-1507) in a sih ding ciangin, "Na khempeuh kigingkhol mah hi veng, sihna tawh kituak dingin kigingkhol kha het kei mawk ing." ci kawm sa-in si hi.
           
Galpi nihna ma deuhin Germany kumpipa Adolf Hitler (1889-1945), Piantit gam-a Napoleon Bonaparte (1759-1821) ii han ah va hawh hi. A lukhu suahkhia-in, a awm tungah koih a, kunin zahtakna pia hi. Tua khit ciangin a gei-a ding Himmler (1900-1945) kiangah, “Nang zong kei’ adingin hih dan-a hoih han hong bawlsak in." ci-in vaikhak hi. A han ding lunghimawh napi, a kha' ading lunghimawh kha lo hi.

           
Topa Jesu in, "Mikhat in leitung khempeuh a ngah hangin a kha mangthang leh bang phattuamna ngah ding hiam." ci hi (Mk.8:36). Pasian zong manlo liangin sum bekbek a zong niloh mihaupa kiangah Pasian in, "Mihaipa aw, tu nitakin na kha a kila ding hi. Na kholsa nate kua in luah ding hiam?" ci hiau hi (Lk.12:20).
           
Paunak ah "Oldmen go to death, death comes to youngmen" (Khanghamte in sihna kiang zuan uh a, sihna in khangmoite kiang zuan hi) cih a om bangin i khangno laitakin zong kisi thei veve, cih phawk ciat ni.
           
Benjamin Franklin (1706-1790) in, "Work as if you were to live 100 years, pray as if you were to die tomorrow" (Kum 100 nungta den bangin na seem in la, zing ciang a si ding bangin thungen in) ci hi. Tua ahih manin i khangno lai mahin i kha dingin a kigingkholsa, a piangthak sitset sa-in om ni.

2.         I nuntak nading kigingkhol ni
            Pasian in eite tuah bangbang a seem, muh bangbang a ne dingin hong deihlo a, mikim' adingin geelna hoih hong neihsak kimciat hi (Jer.29:11).
           
Lai Siangtho in, "Pilna deih in, milianin hong bawl ding hi." ci hi (Pau. 4:8).  Pasian leh pilna lo tawh kikhuasuak zolo hi. Tua ahih manin i neu tung mah pan pilna deihin, pilna tawh nuntak zawh sawm ni. I khangno lai, i khuak hat lai mahin pilna sin ni. Pilna i sinna ah hih pen ka khan'tawn ka nuntak nading hi, cihna tawh sin ni. Khutsiam khatpeuh i sin leh zong hih pen ka nuntak nading hi, cihna tawh hanciam tak mahin sin pah ni.
           
Abraham Lincoln (1809-1865) in a neu lai-in lai deih mahmah hi. Zawnglua ahih manin a inn ah electric mei nei zolo hi. A inn pan tai 4 a kigamlatna mun ah electric meikhuam khat om ahih manin nitak simin tua meikhuam nuai-ah laisimin va pai den hi. Tua dan tawh US President a suak ahi hi.
           
Galpi nihna ma-in Falam ah sang a kah mi masate in lai deih thei mahmah uh hi. Tua lai-in Tedim leh Falam kikal ah motor lampi om nailo ahih manin khe mah tawh amau' anguai ding ciat pua kawm sa-in sang na kah uh hi. Deihna takpi tawh pilna sin uh ahih manin gam makai leh milian vive na suak khin phial uh hi.
           
Kahla 3:27 ah "Na khangno lai-in thuakzawh hat ding kisin le teh hoihpen hi." ci hi. Mikaang paunak ah "There is no rose without thorn" (Ling in hong sut lohin lingpaak kilo theilo) cih om hi. Biakna thu ah zong "There is no crown without cross" (Singlamteh thuaklo pi-in kumpi lukhu kikhu theilo) cih om hi. Pilna, hauhna, lawhcin'na leh gualzawhna cihte pen olno tak leh baihno takin kingah ngeilo hi.
           
Mailam nuntak nading kigin'kholhna hoihpen in biakna sungah khan'khiatna ahi hi. Biakna sungah a khangkhia mite Topa in a mailam ding uh a hoihpen na geelsak den hi.
           
Pasian in mikim tungah nuntak nading lampi a tuam ciat hong koihsak a, khat leh khat kibang kim khollo hi. Tua ahih manin Pasian in ei' adingin hong sehsak nasep in bang hiam, cih Topa mah dong ni.
           
3.         Zi leh pasal ding kigingkhol ni
            Pasian in mihingte pen suan leh khak nei-in, ei' tungtawnin khang kizom dingin hong pian'sak ahi hi. Khang a kizop theih nadingin numei in pasal neih kul a, pasal in zong zi neih kul hi. Tua ahih manin i neu tung pan mahin zi leh pasal a nei ding mahin kiging khol pah ni.
           
Na khempeuh in hun nei a, zi leh pasal neih in zong hun khat mah na nei hi. Tua ahih manin a hun mahin zi leh pasal neih sawm ni. I zekai luat leh kival theikha ding hi.
           
Pasalte in i neu tung p[an mahin i zi ding khuadak kholh ding leh hawi kholh ding hoih hi. A hun ciangin zon'tawm biangbuang pen deih banglo thei hi.
           
US mipilpa Benjamin Franklin (1706-1790) in, "Zi leh pasal ding na zon’ ciangin na mit tawh zong ken la, na bil tawh zong zaw in." ci-in gen hi. Hih pen a meelhoihna khat bek en lo ding, ama' pian'zia mite'n koici gen uh, phat maw, gensia uh, cih zong ngai zek ding, a cihnopna hi.
           
Tangvalte in lawm i ngaih ciangin khat mah ngai pah cinten a, mai-a tuah peuh ban ngaihloh ding hoih hi. I ngaih pen mah teen'pih takpi ding hoih hi. Lawm ban ngaihte amau' pumpi leh a tate in thuak thei uh hi.
           
Nungakte in pasal ding i teel uh ciangin hauhna khat bek et huailo hi. Nupi khat in, "Pasal hau ka teen'pih leh lungkhamna hau pah ing." ci-in gen hi. Min leh vaang, mindawk (popular) khawng zong et huailo hi. Min kidawk pian, a meelhoih, lasiam, kimawlsiam, tumging siam, cihte sungah mi citak ding haksa, kici hi.
           
Pasian a zahtak mihoih, zu ne lo ahih ding uh thupi hi. Mihoihte Pasian in anduh gilkialin koih ngeilo hi (Pau.10:3). Amau bek hi lo-in, a tate ciang dongin khutduh ngenin koih ngeilo hi (Late 37:25). Pasian a zahtak mihoihte in a sungah sumkhuk nei gige uh hi (Isa.33:6).
           

Rev.Dr. JM Paupute nupa in, "Ka tapate a suah cil pan mahin a zi ding uh thu ka ngetsak pah uh hi." ci-in gen uh hi. Tua hi a, i neu tung mah panin "Topa aw, zihoih, pasal hoih hong pia in." ci-in thu ngen pah ni.
  • Blogger Comments
  • Facebook Comments

0 comments:

Post a Comment

Item Reviewed: I KHANGNO LAI-IN KIGINGKHOL NI. Agelh ~ GSPau Description: Rating: 5 Reviewed By: cinpuzomi
Scroll to Top