728x90 AdSpace

Hot
Menu
Zon-ol na Donate

Latest News

Kampau, Lai, Ngeina leh Minam. Agelh ~ Tg. Eddie N. Hang

Kampau, Lai, Ngeina leh Minam.


Agelh ~ Tg. Eddie N. Hang
Pastor of Zomi Baptist Church United States of America

Amaute in Pasian’ na lamdangte a taangko uh ei’ kam ciatin i za mawk hi (Acts 2:11b)

Pentecost Pawi pen Jew mite’ Pawipi hi-a Jerusalem Biakinnpi sung bekah kibawl thei ahih manin a teen’na gam ciat uh pan kum simin tua Pawi siim dingin Jew mite Jerusalem Khuapi-ah hong pai den uh hi. Parthia, Media, Elam, Mesopotamia, Judea, Cappadocia, Pontus, Asia, Phrygia, Pamphilia, Egypt, Cyrenea, Rome leh Crete pan Jew mite Pentecost Pawi siim dinga Jerusalem Khuapiah a zin laitakin vantung pan huihpi nung bangin Kha Siangtho hong kum suk hi. Jew mi vive ahih uh hangin amau teen’na gam ciat zui-in kam nam tuamtuam pau uh hi. Nungzuite ahih leh Galilee kam pau uh hi. Kha Siangtho hong kum suk tak ciangin Pasian’ na lamdangte nungzuite in Galilee kama a gen uh pawi siim mi khempuh in amau kam ciatin za uh hi (v. 6). Lamdang sa-in: “Hih mite Galilee mi vive hi lo hiam? Pasian na lamdangte a taangko uh bang ci-a ei’ kam ciat tawh za thei i hi hiam? ci-in kidong ngeeingaai uh hi (vv. 711b). Peter gen khempeuh amau’ kam ciat tawh a zak uh ciangin tel pah uha tua ni mahin mi 3,000 in Jesu umin sang thei pah uh hi (v. 41).


A nungta Pasian’ thu pen ei’ kam ciata zak ding Pasian’ deihna hi, ci-in kimu thei hi. Pian’pih kam ciat mah kisiam peen ciata ei’ kam ciat mahin Pasian’ thu za le’ng tel baihin saan’ nop hi. I tel lohpi kisang thei lo hi.

Genesis 2:7 pan 11:7 dong leitungah minam khat bek oma pau nam khat bek na pau uh hi. Babel (Gen. 11:8) pana kipan a kam uh hong kitel nawn lo-a kam nam tuamtuam hong pau uh ciangin minam tuamtuam hong piang hi. Tu laitakin leitungah pau nam 6,800 om hi, ci-in pau lam a kante in ciamteh uh hi. Hih minam khempeuh in amau’ pau ciat tawh Pasian thu a zak ding uh Pasian’ deihna hi. Ei Zomite zong Zokam mah tawh Pasian thu i zak ding Pasian deihna hi.

Leitungah nipi nih simin pau nam khat ta mang ahih manin AD kum 2100 ciangin pau nam 3,400 pan 6,120 bang mang thei ding hi, ci-in pau lam a kante in ciamteh uh hi. A mang dekdek zong om khin hi, ci uh hi. Tua banga pau nam khat peuh a man’ theihna hih bangin ciamteh uh hi: Galpi hangin bei thei hi. Minam lian khat in a neu zaw khat peuh tual thah gawp thei-a minam neute a pau uh tawh si mang khawm thei hi. Gam uk kumpite in zawhthawhna tawh minam neu khat peuh a pau uh a zat ding pum kham thei-a a kam uh zong mang thei hi. Ahih kei leh minam neute in a lian zawte’ kam a zuihna lam-in amau’ kam man’suah thei uh hi.

Hih a tunga thute i et ciangin Zokam zong limtak i kepcing kei leh mangthang thei taktak ding hi. Zomite, mi lakah i om ciangin i pau, i ngeina leh i minam mangngilh baih phadiak hi hang. Ei leh ei kineumuh gawpin midang peuhpeuh thupi muh zaw den le’ng kilawm hi. Pasian nangawn kam dang tawh phat le’ng a lungkim zaw ding sa hi le’ng kilawm hi.

Pilna, siamna, sum leh paai zonga paikhia i hih manin i tun’na gama mite’ pau ahih leh i siam ding hanciam ding mah hi. Ahi zongin Zokam zong mangngilh sese kei le’ng deih huai hi. Zokam mangngilh lianga kam dang i pau ciangin a lauhuai mahmahna a nuaia gentehna tawh gen nuam hang.

Uiphuk khat tui vot kuang khat sungah koihin a kuang damdamin satsuahin sosak le’ng uiphuk in tui sat lam zong phawk lo-in tui so tawh si khawm hi, ci-in scientist-te in gen uh hi. Uiphuk i bat ding lauhuai mahmah hi.

Kampau leh minam kikhen thei lo hi. Kampau in minam keemcing hi. Minam khat i hih lam hong theisaka khat leh khat hong kiitsak tuam mahmah hi.

Geneva Woomayoyah Navarro pen ei’n Red Indian i cih Native Indiante sung pan Comanche nam hi-a a neu lai-in Oklahoma Khuapi-ah kiteengsak miikmeek hi. A gol ciangin pilna hong sin toto-a Comanche kam zong damdamin hong mangngilh hi. A sawt ciangin a pian’pih kam hong thei nawn lo hi. A pi, a pu, a nu, a pate tawh hong kiho thei lo hi. Comanche kam a pau mi 900 khawng bek nungta lai, cih a theih ciangin a  kam uh zong a man’ ding lam phawka Navarro in a kam uh itin hong puah kik hi.

Cornish zong nidangin England gam Cornwall a cihna-ah kizang ngei-a AD kum 1777 khawng ciangin kizang nawn lo hih tuak hi. Henry Jenner a cih pa khat in a kam uh mah itin puah kika tu-in Cornish mite in a innkuan sung ciatah kam dang zang lo-in Cornish bek zang ta uh hi. A tu, a tate uh Cornish kam hong pau kik uh hi.

Ei Zomite in zong i kam ita i bangkua sung ciatah i zat tangtang ding thupi mahmah hi. Bang hang hiam cih leh Zomi i hihna Zokam in hong gen hi. Zokam pen midangte tung pan i ngah hi peuhmah lo-a i nute ang-a i theih ngiat ahih manin ithuai mahmah hi. Leitung bekah i zat ding hi leh, “Tua Zokam peuh”, ci thei ding hi hang. Ahi zongin vantung dongah Honpa i phat nading kam ahih manin ithuai seem hi.

Mangmuhna Lai Siangtho pen ni nunung ni cianga a piang ding thute Topa Jesu mahmah in nungzui John tungah a na pulaak thute vive hi (Rev. 1:1). Gam khempeuh, minam khempeuh pana a kikaikhawm sim zawh loh zah donga a tam mi honpi in vantung tokhom leh Tuuno mai-ah dingin kam namcin’ tawh Pasian’ Tuuno phat uh hi (v. 9), ci-in kigelh hi. Tua minam khempeuh sungah Zomi zong kihela, pau namcin’ sungah Zokam zong kihel hi. Zokam mahmah tawh vantungah Honpa phat ding hi hang.

America tung Zomi pawlkhat in tua bangin i pian’pih kam ka itna uh tawh America pana hong khang ding i tu i tate in Zokam a mangngilh loh nadingin Zomi Baptist Church na dingin Zokam ngiat tawh Nipi simin Pasian ka na bia uh hi. Zokam pen midangte tung pan i ngah hi peuhmah lo hi. Koi pan pianga koi-ah khang khia ka hiam, cih i kam in hong theisak hi. Ithuai mahmah hi. Thupi mahmah hi.

Tua mah bangin Zolai zong thupi mahmah hi. Ei Zomite banga minam neute in i ngeina hoihte kam bek tawh i ciapteh ciangin i man’suah tam mahmah khin ta hi.

Pasian’ Kammal Lai Siangtho nangawn a mangthang lo dingin lai tawh  na kiciamteh hi. Lai Siangtho Luite Hebrew tawh na kigelh masa-a 400 BC khawngin kiman khin hi. 250 BC khawng ciangin Greek tawh  kitei-a Septuagint kici hi. Daniel, Ezra leh Jeremiah sung pan pawl khat zong Aramaic tawh na kigelh hi. Lai Siangtho Thak ahih leh Greek tawh  kigelha AD 400 ciangin Jerome in Latin tawh na tei hi. AD 1382 tak ciangin John Wycliff in English tawh na tei hi. Tua-a kipanin kam tuamtuam tawh kitei-a Wycliff Bible Translators bang in leitunga kam om khempeuh tawh teikhiat sawm uh hi.

Dr. Joseph Herbert Cope in zong Zolai hong bawlsaka Zolai tawh Lai Siangtho leh Pasian Phatna Labute i nei khin zo hi.

Ahih hangin Khamtung sangte-ah Zolai a kisin loh zawh kum sawm pha ta, cih thu a kizaak ciangin i tu i tate Kawlkam peuh pau mawlmawl khin, Zolai khawng hong thei kei lailai leh i minam mangthang thei taktak ding ahih manin minam itna leh Zolai itna tawh Zolai Sim Bu Commttee’ bawl sa Zolai Sim Bu, Zomi Baptist Church in k’ong khenkhia uh hi. Hih lai k’ong at laitakin a khet ding kiman khin zo-a hawmkhiat ding bek kisam lai hi.

Zomite aw, Zomite mah Zokam i pau kei leh midangte Zokam hong pau lo ding uh hi. Midangte neih loh ngeina hoih tampi zong nei hi hang. Tua ngeina hoihte Zomite mah in i it kei leh midangte in hong itsak zenzen lo ding uh hi. Hong kepcingsak zenzen lo ding uh hi. Zolai zong Zomite mah in i puah kei leh midangte in hong puahsak zenzen lo ding uh hi. Zomite mah in puaha Pasian thu ahi zongin, leitung thu ahi zongin, i ngeina hoihte ahi zongin Zolai tawh gelha i hawmkhiat zawh ding hanciam ding kisam mahmah hi. Khamtungah i om zongin, Kawlgamah i om zongin, gam dang mun tuamtuamah i om zongin, i omna peuhah a tunga ka gen Geneva Woomayoyah Navarro leh Henry Jennerte banga i kam, i ngeina, i lai leh i minam i it ciat ding k’ong hanthawn nuam peen hi. I innkuan sung ciatah Zokam pau-in i tu i tate Zolai zong hilh zawh nading hanciam lai ding hi hang.

Minam, Zokam, Zomite ngeina a hoihte leh Zolai itna lungsim i neih theih nading khat leh khat kihanthawnin mailamah i minam khan’toh nading hanciam ciat ni.

A tunga ka gelh thute hoih a sa ahi zong, hoih a sa lo ahi zong, i om leh hih e-mail <enhang@bellsouth.net> tawh hong kuppih le uh cin nuam mahmah ding hi’ng.

Zomi, Zokam, Zomite ngeina leh Zolai ita a keemcing nuam, na sanggam uh, Eddie N. Hang

[Hih lai, 18 AUG 05 THU ni-in  kingah hi.]

Source :
Page  52  of  200
Vahui Magazine 2006


  • Blogger Comments
  • Facebook Comments

0 comments:

Post a Comment

Item Reviewed: Kampau, Lai, Ngeina leh Minam. Agelh ~ Tg. Eddie N. Hang Description: Rating: 5 Reviewed By: cinpuzomi
Scroll to Top