728x90 AdSpace

Hot
Menu
Zon-ol na Donate

Latest News

Khan Kumsawt Democracy (Sustainable Democracy). Agelh ~ Pau Sian Lian

Khan Kumsawt Democracy
(Sustainable Democracy)
Agelh ~ Pau Sian Lian

Myanmar ah lungkim huai ahi naikei zongin democracy cih khat i zat zawh kum thum val bang hong cingta hi. Deih zah ahih nailoh hangin hong nuam tuam veve hi. Tulian laitak in leitung bup leh gammite ngiat in a patauh khat uh in, Kawlgam ah democracy bang dinmun tungta-in, bang tanciang mainawt lai ding cihte leh cikteh democracy kician ngah zo ding cihte ahi hi.
           
Politics pilna lam-ah a madawk diak mipil Francis Fukuyama in democracy pen a koici gamte ah sawtvei kimang-in, bang cih lehang zatnuam hiam, cih thu a kan kawikawi khitteh mipite’ dinmun thupitna khat hong mukhia hi. Ama muhkhiatna-ah nunna laihawl (middle class) a khauhpaina gamte-ah democracy khansawt phadiak in mu khia hi. Huam gen lehang nunna laihawl (middle class) cihte pen thatang nasepna hi nawnlo-in, zum nasem (pilna tawh nasemte) le a diakdiak in University kician pan sang mante (educated) tam semsemna cihtheih hi. Hih ahi ciangkhat tung khin-mipi nunna laihawlte-in thuman lohna tamna, ki-ukna ginatlohna, kizawhthawh luatnate-ah khauh takin langpan zo uh-a, mipite lokzo, makaih zo uh hi.

           
Goldman Sachte’ tuatna-ah 2030 teh leitung ah hih nunna laihawl (middle class) te billion 2 om dingin um uh hi. Europe Union te’ thugil kan pawlte’n 2020 teh nunna laihawl 3.2 billion omin, 2030 teh 5 billion kitung kha thei ding hi, cih tuatkhol uh hi. Amau muhkhiatna-ah 2010 in leitung ah nunna laihawl 1.8 billion om hi. Hihte tung pan a kigen thei khat-in mailam teh pilna, sum-le-pai kinei to semsem ding ahih manin mihingte’ dikna le thu neihna a ultung sak democracy ki-ukna zong hong kizang semsem ding cih kigenkhol thei hi.
           
I Kawlgam pen hih democracy ki-ukna taktak a tung nai lo cih hi peuhmah lo-in, ni dangin democracy a limzat mahmah sa, pilna lam le neih-le-lam ah a khauhpai mahmah sa gam khat ahi hi. Gammite’ laitheihna (literacy rate) bang bel leitungah a sang pen lam pawl hikhin lua hi. U Ne Win in 1960 khit a kipan i gam suang ki-ukna hoihteng hong suksiat dikdekte lak-ah i pilna sinna zia-le-tong hoih mahmah sate khawng a sia theithei-in lumlet gawppat hi. Tua ahih man-in Kawlgam, Zogam ah democracy sawt khom ding i deih leh haina pan pilna lam, zawnna pan hauhna lam, natna-pan cidamna lam i hanciam kul hi. Tuateng kammal khatin gen le hang tangpi kikepna (social welfare) lam i vei kul mahmah hi.

Hih tangpi kikepna (social welfare) icih pilna, cidamna a ultun sakna hangin sum-le-pai nangawn a hauhlawh gam tampi lak-ah Japan gam etteh huai pha hi. Japan gam pen Meiji Restoration cih ki-ukna lam kipuahphatna a neih ma tham, kum zalom 18 ma laipek in a zawn mahmah thilthel uh hang lai theihna (literacy)-ah khauhpai mahmah khin hi. Amau sang a khangto masa zaw, setkhuak tawh nasep (industrialized) a kipan khin, Europe gamte sang tua hun laipek-in lai theihna lamah na sangzaw khin, kici hi. Tua ahih manin leitung bup ah a hau pen nihna gam cih dinmun kum tampi lenzo mawk hi. Sum-le-pai neilo pimah pilna lam na ki tawsawn tantan uh ahih manin, a tawpna-ah hauhloh theihloh, khantoh loh a hithei lo na hi hi.
           
Sen gam leuleu democracy gam ahih nai lian loh hang sum-le-pai lamah hauh ding a ki- gin litlit pian lai, 1970 lam ma pekin, a gam uh ah pilna le cidamna lam, tangpi kikepna nasiat tuak mahmah khin mawk hi. A mite uh ngiat na pilsuah dikdek khol khin ahih manun, leitung bup tawh sumbawl khopna (marketization) ahih uhteh a mipilteng uh zang thei pahlian uh hi. Mipil misiam lawhsam lualo hi.
           
Hih tangpi kikepna tawh kisai-in namnih kikhen thei hi. Nam masate-in sum-le-pai khantoh ma pek-in neih zahzah tawh pilna, cidamna lam mah ultung sak masak hamtang ding (support led) cih hi-in, Asia gam sungte lakah, Japan, Sen, Korea gamte hi phadiak uh hi. Nam nihna-in sum-le-pai i neih zah dandan-in kikep kikhoi ding hilo dia a ci (growth-mediated) cihte ahi hi. Kawlgam-in a nam nihna sungah kihel hi. Kum tampi sung i gambup ading kumpite’ sumzat lakpan 1% pen cidamna lam, 4% pen pilna lam ading kizang hi. Tu kum lamteh cidamna lamah 3% zangta-in pilna lam 6% hita hi. Hih bangtawh i ki-uk hangin minung-ah i om thapai hi. Mihing muanhuai (human resource) a omlo cihtheih phial ahi hi. Germany gam bang ah tukum a kipan university i kah nopleh a mawkna hita ngial zen hi. Aung San Suu Kyi mahmah in zong hih pilna lam leh cidamna lam mah parliament ah tut phetin pulak masak-in nei hi.
           
Hih tangpi kikepnate kin bawl lehang i mimal manneihna, mimal thuneihna, mihingte’ suahtakna a ultung sak democracy kician takin kizangthei-in, sawtvei kimang zo ding hi. Tu laitakin democracy i cih hang Kawl lutol uangtat honkhat buaipih, minam bup hong nawngkai sak tadih thukhun hi lolo namte dan peuh tawh kibuai-in mazan vai ngiatlo hi. Khantohna lam-ah a pil mahmah Stiglits Kawlgam hong zin lai-in, na leisung van manphate pan na ngah uh sumte mihingte’ khantohna ding lamah vawhkik tangtang un aw, cih gen phapha hi.
           
Hih thu-ah kumpite peuh a tawntung-in mawhsak thapaih ding zong hituan lo leuleu hi. Ei zawh khopkhop in i kipat kul hi. Bangladesh gam ah micro credit tawh mi tampi zawnna pan a honkhia Muhamed Yunus in a zawng pen naupangte nangawn in leizo-in cidam thahat tuam nading uh veina tawh nawitui ki-umsa (yogurt-??????) limci theithei a man tawm thei pen-in pil sinna sangte ah puak kawikawi hi. Eite-in zong tum taktak, vei taktakin sawm taktak le hang ei zawh khopkhop ding vai tampi om lel ding hi. Hih tangpi kikepna tawh khantohna-cihin zan khat thu-in a gah kimu pah nam hilo leuleu hi. Lungduai, kuhkal, cihtak kul hi. Ahi zongin a gah i lawhteh kumsawt tampi kimangin kisik om ngeilo namte ahi hi.
           
I Zogam pilsinna a niam luat manin tan 10 a kheng zolo, zo na pi’n sum-le-pai hamsat manin university a zom zolo mimal kitam pha mahmah hi. Kuamah mawhsak theih hilo hi. Tuate ading phadiak-in hih kivakpah theihna pilna (Vocational Training) kinak sap mahmah hi. Anhuandan-sinna, puankhui, sammet, inn lam khutsiamna pilna cihte neu-et theih hi peuhmah lo hi. Gamdang a zin uh hileh zong nasep ngahpah zaw lai ding uh hi. Aung San Suu Kyi-in kum tampi a innah a kikepcip khit a zin masak penna Thai gam Leitung bup thu kikupna pi (World Economic Forum)ah Kawlgam khangnote kinawhsap mahmah thu-in hih vocational training hi, ci-in leitung bupah na tangko-masa hi. Ama’gen man in a thupi hilo-in, ahi mahmah khat a genkhia ka cihnopna hi. Europe gamah 2008 economic crisis khit sum tawm bei-pen le muibun pen kivak nadingin hih vocational training thupitna limgen mahmah san uh hi.
           
Tua ahih manin i gam ah mihingte’ manneihna a ultung sak democracy ki-ukna sawt khom ding i utleh nunna laihawl i tam semsem kul a, tua dingin mizawng, mipoi, mi haiteng i neih zahzah mah tawh mi cidam, mi pil suahsak masak kul hi. Khantohna lam tawh kisai mi minthang Amartya Sen-in democracy ukna kician taktak gamte-ah kial tungngei lo hi, cih mukhia se hi. Democracy (properly function) ukna kician cih gam i tun nangin tangpi bup mah mi kician i suah kul hi.Tangpi kikepna hong khauhpai limlim masa photleh democracy cihciang bek a hilo, a sum-le-pai mahmah zong i hauhlawh ta ngial ding hi.

Source :
"Bucing khantohna leh Picing ki-ukna" Laibu.

Laigelh Pau Sian Lian in Zomi eLibrary/Laibusaal ading in Phalna hong piak ahi hi.


  • Blogger Comments
  • Facebook Comments

0 comments:

Post a Comment

Item Reviewed: Khan Kumsawt Democracy (Sustainable Democracy). Agelh ~ Pau Sian Lian Description: Rating: 5 Reviewed By: cinpuzomi
Scroll to Top