728x90 AdSpace

Hot
Menu
Zon-ol na Donate

Latest News

LAWM THAWNG KIM (Zo Limtui) TAWH KA KIKHOLHNA TENG. Agelh ~ Siapi Hau Siam (TEO-RTD)

LAWM THAWNG KIM (Zo Limtui) TAWH KA KIKHOLHNA TENG.
Agelh ~ Siapi Hau Siam (TEO-RTD)


1.         KA MELTHEIHNA
Lawm Thawng Kim nu Nu Ciang Khaw Niang pen Lailo khua a Pu Ging Th awng tanu hi. Pu Ging Th awng tapa upa pen Pa Vungh Do Pau pen kei Hausiam i ka u numei pasal hi. Zampi khua pan Tedim khua ka unu tawh ka pai uh teh Tuithang khua ah ka taam zeel uhhi. Lailo khua ah zong ka bang zeel uhhi.

Lawm Th awng Kim' nu pen thahoihin nasep uuk khat hi. A inn huan leh a lo ah neektheih mehteh mehgah ciing hi. Tukan khalan tasam lo hi. A huan sungah singgah nam tampi gah hi. Vaitun lim akhin tung pan Singpi gah, Nuunun gah minte ong lakhia in neek ngeingai penin tawl ong damsak mahmah hi. Apa Pa Zel Khaw Kai pen thalian kha hi-in Circle Chairman seem hi. Tedim Sakollam ah inn lianpi lam a ansai, niangtui sai bawl hi. A inn uh atung anuai dei-in Sangnaupang ten sap hi.

1960-64 sungin Sakollam sangpi ah kahin katan uh kibanglo hang Sakollam BYG ah kihel lasa in kikhawmin lungdam bawl hunah makai khawmin nuamsa mahmah hi ung.

2.         MONYWA THONG AH KITHUAHNA (1964-68)
1964 kumin Kawlgam ki-ukna lumlet kumpi makai General Naywin in Dangka lai pawlkhat that in sumbuuk tenng abuluhteh mipi a lian aneu dipkua in, thangpaai in kikhasia mahmah hi. Mipi hehna leh lungphonate kumpi lam pan ngaihsutna a omlohteh anew alian kiho-in "Akno in Sangak tungah a nuphu a paphu la ding pawl a zot bangin" phulaak ding kivaihawm hi. Lamzang khua pan Pu Th ualzen makai-in khangno honkhatin Gamsung beelta uhhi. Tuisanzang Camp ah kha (2) taai in tualo teng kumpi ten manin Monywa Th ong puak uhhi. Tua lakah Lawm Th ang Kim kihel hi.

Kei pen 1964 June kha in Lumbang khua ah Galkap bului khat sam dingin India gam pan ong kisawlin ka kilehkik lamteh nitak 9:00pm in Suah Lim Pu Tunkhai ansai ah ong man hi. Kawlpi ong puak a tuapan Falam ah ka omlaitak Lawm Th awng Kim tawh na om khawm ung. Tedim papi (2) Sangsia khat leh mawtaw hawl khat zong ong lut bet uhhi. Th ongsung ah Politicians tampi na om hi. Lutolte, Mangkang kahbia, Mivomte, Kawlte a om hi. Mizo gam leh Naga gam vai a kiman Khampat khuami Pu K. Man Lian (60), Pu Th ang Hlei (50) leh Insein Lai Siangtho sangkah Nagate khat zong ong tung hi. Mangkam mangpau siam Mizote (2) zong ong tung lai hi. Mangpau in mangla kasa uhhi.

A.        Pasian kammal ngah khiatna
Nisimin Lai Siangtho sinna ka nei uh a Pu K. Man Lian (60) in Genesis pan Revelation dong ong zawhpih hi. Lai Siangtho thuthuk, tangthu muhkhiatna phualpi  ong suak hi. Nipikal kikhopna nite bawl in Sunday ni zong kikhawmin lungdambawl zong ka bawl thei uhhi. Lawm Th awng Kim a kihel akihel tawntung hi.

B.        Zolim tui khaici tang
(1)        Lawm Thawng Kim in vision nei a, ahanciam maw? tua a hih kei leh a vision in amah akaai maw? thei keng "Blessing in Disguise" hi ci-in sang ing.

Zingsang leh Nitak in Th ongkulh dung ah lampai kawmin lasa in awngin a aw bawlden hi. Clift  Richard, Elvis Presley late sa in a sakdan leh a awluan ziate hoihsa mahmah hi. A aw bawl denin Lailote Cin Kap Th ang in "Tu a Sehaal zong hambaihse leh" " Ih zawhngeu zong kamhakse leh" na ci liang hi.

(2)        Mivom nam Th ongcingte tangvalno khat deihsakna tawh Guitar khat kalei thei a Th ong ukpa in zong tum dingin ong phal hi. Hun ngahsialin kitum a ken nei-in a siamna ka lawm Th awng Kim in ong ngah hi. Zolim Tui khaici tang hipan ong kipan ahihi. Hih hun pan Kha Siangtho in lawm Th awng Kim sungah mun ongla hi (gaaisak). Topa minthanna hita hen.

3.         THONG PAN SUAHTAKNA LEH SANGKAH KIKNA
1968 January ni-in Monywa pan kaciah uhhi. June kha sang honteh amah leh kei sang kazom kik uhhi. Tan 10 zawh teh a mah RASU University (Yangon) ah kei MASU (Mandalay) ah kah hi ung. University man hi-in phatna la phuakin sa in Kha sungah nuamsa hi. Khanlawhna la dawng tampi kizeelsakta hi.

4.         TUIMUI KHUA AH KUM (1) KITHUAH KIK UNG.
1978 kum in Tuimui ah Siapi Mang Za Lian makaihna tawh tan 10 hong in sia seemkhawm ung. Tua hunlai in zong la tampi phuak khinzo hi. Tua pan kikhen in amah Post and Telecommunication ah sem hi.

5.         TONZANG AG PAWLPI SUNGAH KITHUAHKIKNA (1988-2002)
1988 June kha ni 9 ni-in SAT tawh Tonzang tung ing. Lawm Th awng Kim in Post and Telecommunication ah nasem in a zi atate tawh na om hi. A zi pen melhoih, kamtam lo, nunneem khat hi. AG Pawlpi makai khat na hi ahih manin biakna sungah khangto khawm nuam ka hih manin zong AG ah ka lut uhhi. Phatna leh biakna ah lamna diannate ong tun cil hi-in nuam kisa mahmah hi. La tampi phuakkhia hi. Nipi sim khangnote tawh phatna leh biakpiakna hun sung pan a ngah zong om in tua hunteh amah la gelh in manlah peuhmah hi. Sermon ngaih laitak khawngin zong ngahlai hi. A la puak teng sungpan gentehna in ong pia leng;
1.         Lam hoih a hilamluite dongin la zui-in
2.         Beel tampi ong paipih un cih late pen Rev. Kam Hau sermon pan angah hi-in
3.         Vangam anopdan hici laileh cih omlo cih la pen Dr. Khualno sermon pa na ngah ahihi.

Tonzang om sungin kikhawmkhawm, thungen khawm, lungdam khawm, an kikumkhawm, innkuan haksatnate kipaupih khawm, Leilum ah a sungteng zong hawhkhawm, puan (suit) zong akibang a neikhawm in innkuan vai kipaupih khawm ung.

Tonzang pan ka kikhenkhit uh teh kithuah kha nawnlo in kimuhna zong om nawnlo ... kimuhkikteh kikhen om nawnlo ding.

6.         LAWM THAWNG KIM ZIA LEH TONG PAWLKHAT
(a)        A kam neello, a lungsim neel.
(b)        A kam tampaulo, a ngaihsut tam.
(c)        A man a lasiam na zanglo, A lasiamna in amah zang.
(d)        Pawlpi vai leh a zum vai kikai awksak ngeilo.
(e)        Pawlpi sum sazian kikaiawk sak ngeilo.
(f)         Amah tawh direct kisailote awlmawh lo.
(g)        A ma hamphatna dingin mi mai et sepsoap cih bang neilo.
(h)        Hanglua lua cih omlo neilo.
(i)         A mel a sa tawh miko ngeilo.
(j)         Neihlohnate ah thumthum lo.

A ma kammal (Status) zat ka zi-in a ciapteh pawlkhat;
"Leitung sum zang leng beibei, kholleng tam semsem. Pasian thu pen kholleng beibei, zangzang leng tam semsem. by Rev. Thawng Za Kim


Siapi Hau Siam (TEO-RTD)

Hausiamgualnam@gmail.com
  • Blogger Comments
  • Facebook Comments

0 comments:

Post a Comment

Item Reviewed: LAWM THAWNG KIM (Zo Limtui) TAWH KA KIKHOLHNA TENG. Agelh ~ Siapi Hau Siam (TEO-RTD) Description: Rating: 5 Reviewed By: cinpuzomi
Scroll to Top