728x90 AdSpace

Hot
Menu
Zon-ol na Donate

Latest News

MOSES NUNTAK NA LEH A MAKAIH ZIATE. By ~ Jeffrey Lian

MOSES NUNTAK NA LEH A MAKAIH ZIATE.
Devotional message
By ~  Jeffrey Lian
Dec, 20, 2017

Pasian in Moses Israel te makai dingin asaplai takin (Paikhiatna 4:11) “Moses in kakam pau ol-in ka pau awk hi” ci hi. Topa Pasian in dawng a, kua in mipa kam bawl ahi hiam? Kua in amah pau thei losak, bilngongsak, musak, mitawsak ahi hiam? Kei mahin nathu genna-ah kong huhding a, na thugen ding nang kong hilh ding hi” ci hi. Ahih hangin Moses in, Oh Topa aw, hong thum ing, midang khat sawlzaw in” ci lai hi. Pasian leh Moses maitang kituahin akiho uh kammal te i-et ciang Moses a utlo pi Pasian in tavuan hongla ning lunghimawh ken cih na ahi hi. Moses Israelte makai dingin utvetlo ahihna teltakin Pasian mai ah gen hi.

Hih thu, Moses mawhna lianpi, pen lungngai kawmin Piancil-Thuhilh kikna simleteh nangzong dotna lianpi ahih lam na muding hi. Pasian in Moses leh Aaron tungtawnin Israel mite Pharaoh khutsungpan inpai khiatpih in lampi (Sehnel gamsung) ah gilkialna, tuiduhna, launa, leh haksatna tuamtuam nisim in tuak uh hi.


Makai leh Mawhna
“Na gam vaan sung uh ni sawmli, nikhat ciangin kum khat, note in na mawh na uh kum sawmli sung na thuak ding uh a, keima lungkim lohna na thei ding uh hi’ aci hi” (Gam: 14:34). Israel te in Pasian mai-ah mawhna neikei zenzen le uh, ni sawmli sungin’ Egypt pan in Canaan tungding cihna hi. Ahizongin Moses leh Israel mite in Egypt panin Canaan gamdong kum 40 nisa, gilkial, tuiduhna leh launa te a thuak khit uhteh tungpan uh hi. Moses Pasian in Mt. Sinai ah asap (Pai: 19) sungin Israelte in milim biakding in nabawl uh hi. Pasian in Moses kiangah kuamah (Aaron simloh) hongtunpih token cisawnsawn a, amaubek nusia sak napin, milim abiak uhteh (Pai: 32-33) makai Moses mahlungkham sak veve hi. Pasian in hongtonpih token ci ahih leh’ Israel mite tavuan nala leh kilawm hi. Pasian in ci hi, “Tua ahih ciangin tu-in amaute tungah ka sinso-in amaute ka beisak theih nadingin kei guak hong omsak in.” (Pai 32:10)

Pasian in Moses Sinai mualtungah amahbek samto in ama omloh kala Israel te mawhna ah Moses dahin kapin om hi. Pasian in Moses omloh kalin tavuan nala leh kilawm hi ahangpen Pasian in kuamah hong tonpih ken ci hi. Tua ami te mawh na hangin Moses mahin Pasian ma-ah kunin thuum in a omteh Pasian in asutsiatding kimlai susialo sam hi. Egypt kumpi paphal na tawh Israel te apaikhia hilo hi (Pai 14:5) ah, “Mite tai khinzo hi, ci-in Egypt kumpipa kiangah akigen ciangin… tua ahih ciangin amah (Faro) in a leeng kithawisakin ama galkapte… tawh delh uh a, ci hi. Topa’n Faro lungsim khauhsak kik kik in akal ah Moses in luthuak mawk hi.

Moses Mawhna lianpi leh Canaan gam alut lohna
            Laisiangtho thuciam luisung ah atelhak penpawl hidingin, hih Moses mawhna kigen hi. Ahangpen mawhna lian hikei leh kilawm hi. Ama mawhna lianpi bang ahia? Pasian in tavuan kongla ding, kampau nakisap leh dangnal Aaron om hi, vanliatna anei kei na Topa Pasian hi ing ci hilo hiam? Moses ama utna tawh khualzin hilo hi. Pasian in asawl lai inzong a utlo pipi mah Pasian in kong ompihding hi acih ciangin apaipan ahi hi. Tua ahileh Pasian sawlna sunga atuah te amah kimawhsak thei ding ahiam? Cikha ding hi hang. Tua hangin hih Moses mawhna lianpi cihpen biblical scholars tampi takten zongtel haka sak uh thukhat ahi hi.

Pasian in ama mi, Moses tungah teltakin genkhol hi. (Thuhilhkikna 32:48-52) vs 49 “Jerikho gallam, Moab gam sungah a om Nebo Mual, hih Abarim mualtungah kahto in. A neih dingun Israel mite tungah ka piak Canaan gam gal et in.” “A neih ding uh” cih ciang ama ading hilo cih kitel lua mahmah hi. Vs 50 “Hor Mual tungah na sanggampa Aaron si-in a mite kiangah a kigawm bangin, na kahtohna mualtung ah si-inla, na mite kiangah pai-in kigawm in.” vs 51 “Banghang hiam cih leh Zin gam, Kadesh khua gei-a Meribah tui phual, Israel mite lakah keimah nong upna na siasak a, Israel mite lakah a siangtho-in kei nong zahtak kei hi.”

Pasian in Moses Canaan gam alutsak lohding zahin bang mawhna nei hiam icih leh Zin gam, Kadesh khua a nongzahtak kei hi” ci hi. Tua Zin gam Kadesh khua ah bangthu piang hiam cih lunglut huai kasa a kei mimal lunglut natawh Laisiangtho sungah kasim kik kik ciangin Pasian hehna alianlua hiding hiam? Kaci zel hi. (Gam 20:1-13) sung i-et teh Israel mite tuidawn ding neihloh nahang na hi hi. Tuidawn ding omlo in a omna khua, Kadesh lah sehnel gam ahihteh tuilak nading omlo ahi hi. Tuabanglak ah Israel mite in Moses leh Aaron kiangah dawnding tui hongpia un’ acih takciangun vs 10 “Moses leh Aaron in suangpi mai-ah mihonte kaikhawmin amah in amaute kiangah, “Tu-in za un, a lehdo mite aw; hih suangpi panin note ading tui hong phulkhiasak ding ka hi uh hiam?”- Moses in suang sungpan in tuiphul khiadingin umlo hi. Hoihtakin observation bawlleteh, question mark tawh Moses leh Aaron in Israel te dawn hi. Hibang thupiang thei ding ahi hiam? Suangsungpan tuiphul khiangei ahi hiam? Hihbangin nong khelbawl uh ci a, Moses leh Aaron aheh na uh ahi hi. Hihpen Pasian in Piancil pan Thu hilhkikna dongah gen kikkik ahihman in Pasian lung kimhet lo hi.

Moses makaih ziapen a olhet lo makaihna ahi hi. Ahangpen tulai hun a makai te tawh ki-enkak leng, Moses makaihna ah bangmah resource (vanzatding) omlo pi a makaih ahi hi. Tuhun makaih na ah resource kicingin kipia mahta leh kilawh cingzo lo zaw mawk hi. Moses Canaan gam atan’lawh napen ama khialhna hang hilo zaw in Israel mite khialhna ahih kei leh uplahna hang ahi hi. Israelte’ adingin zong mawh na lianpi kicithei lua lo hi, ahangpen tui-omlo a, dangtakna pen mihing, ganhing te kisap ngeina hi a, tuiduh napen mawhna zong hiding hiam? Cih huai mahmah hi. Moses leh Aaron inbel tuiduh nailo hileh kilawm hi. Bangbang aizongin Moses te unau Israel mite hangin angah ding uh hamphatna, Canaan gam alutzo lo suak mawk hi.

Zomi leh Makai
Thu-um, ei Christian te adingin Laisiangtho sungah etteh ding makai siam Pasian zat mitampi om hi. Tuate lakah alawhcingpen, sawt amakaih pen, leh akilim gen makai pen Moses hikha ding hi. Moses makaih Israel tebel Pasian teeltuam ngiat minam ahihman in angtanhuai leh zong Pasian mi ahih uhteh Pasian in tavuan laksak zawdeuh ahihman in tulai thu-umlo, minam tuamtuam kigawm khawm makaih dingbel awllo ding hi. Moses makaih na ah resource bangmah kipia lo makaih na hi a, ahizongin minam khat, Israel mitebek ahihteh kilungtuah na, unity bel omleh kilawm kasa mahmah hi. Ahizongin Pasian mihi napi’n milim biaklam ah taidek zel uh a, uplah nahangtawh haksatna tuakzelzel uh hi.

Minam makai khat adingin Moses makaihzia etteh ding tampi omleh kilawm kasa hi. Keibel minam makai ngei hikei ing’ in ahizongin Moses pen Israel minam te makaih ahihteh Canaan gam Israel te atuntheih nadingun Moses leh Aaron tungah kinga hi. Pasian in Moses leh Aaron kiangah genkhol a, nobel kongciam sa gam lut kei nucin’ amau luah nading gam atuntheih nang un ka thuciam/kham te tua bang in na hilhding hi ci denden hi. Ei hileng keizong kalut nang hilo thadah si e cikha ding hi hang. Moses pen angsung enhetlo makai pi khat ahih lam kimu khia mawk hi. Banghang hiam cihleh ama angsungbek akhual hileh Israel mite Canaan gam alut theih nadingun makai nuam hetlo ding hi. Aciil lai in bel, ka kampau ol, makai siam hikiang ci in bel nial hi. Ahizongin Egypt pan akipat khiatzawh uh Moses in Pasian kiangah ken makai nuamnawn kiang nami, Israel te haksa lua cingei lo hi.

Minam makai ahih leh Canaan gamlut cih thadah, ama kaih mite adingin anuntak na Pasian mai, mimai ah apiakhia ngam, Moses bang kisam mawk hi hang. Gam leh minam makai te in Moses leadership style zangthei in, zang ngam hileng minam te’n hamphat lawh ding in ka um hi. Makai pawlkhat te khansih, khantom in hong nusia thei pahpah hi. Mipi ten’ kitel banlo in asihna uhpen tua asephang, amawh khak hang, asepkhial mancihbangin kimu thei hi. Ataktak in makai sawt nungta lote pen bangteng semkhia uh hiam? Cih enleng ettak mahmah dingin ka um hi.

Bible studies neihna sungah Moses thupi kasak na leh Pasian tawh akizop nate uh lamdang sa in, khatveivei ciang Pasian in Moses thah sawm, asih ding genkhol, cihbang kamuh ciang hih Moses ama ut hizenzen lo, Pasian in asap, ama na asem Moses banghangin Canaan gamlutsak lo hiam? Cih kei leh kei kangaihsutna te leh Moses makaih zia a etteh huai makaihzia hi cih phawk ka hih man in honghawm sawn hi ing. Mipi te mawh apuaksak zote makai siam in kaciam teh hi. Moses zong Israel te mawhna khempeuh hangin Canaan gamlut lohlawh in ahizongin tuni ciang kigengen lai hi.

Asim mimal tunga lungdam!

Pau D.Lian

Source :
from:jeffrey Pau Do Lian lianjeff@gmail.com [zominam] zominam@yahoogroups.com
reply-to:zominam@yahoogroups.com
to:"ZomiDaily.com" <zomidaily@gmail.com>,
zominam@yahoogroups.com
date:Wed, Dec 20, 2017 at 9:15 AM
subject:[ ZOMI NAM ] Moses leh Makaihzia
mailing list:zominam@yahoogroups.com
  • Blogger Comments
  • Facebook Comments

0 comments:

Post a Comment

Item Reviewed: MOSES NUNTAK NA LEH A MAKAIH ZIATE. By ~ Jeffrey Lian Description: Rating: 5 Reviewed By: cinpuzomi
Scroll to Top