728x90 AdSpace

Hot
Menu
Zon-ol na Donate

Latest News

ZOMITE KEI MUHNA PAN. Agelh ~ Rev. Neng Za Khup

ZOMITE
 KEI MUHNA PAN.
Agelh ~  Rev. Neng Za Khup

ZOMI i cih kuate ahi hiam? Zomi cih i khiatna kibang hetlo ding hi. Pawl khatte adingin Zomi cih pen Zote cihna hikha ding hi. Pawlkhatte adingin Kawlgam-a Tedimmi a kicite leh India gama Paitemi a kicite cihna hikha ding hi. Pawlkhatte adingin Tedim kampaute cihna hikha ding hi. Pawlkhatte adingin Zote, simte, Vaiphei, Gangte, Hmar, Kuki, Paite, Tedim leh Mizo a dangdangte i genna hikha ding hi. Tulaitak (nidang ciang kikhengkha thei) kei ngaihsutna pan in Zomi ka cih ciangin unau Mizo – “engnga” pau zanglo deuhteng ka genna in ka ngaihsun a, Mizo ka cih ciangin Mizoram ateng leh “engnga” pau zang deuhte genna in ka ngaihsun a, “ZO” ka cih ciangin Zomi leh Mizote khaikhopna in ka ngaihsun hi. No ngaihsutna tawh kibang khinlo ding hi. Phamawhlo hi. I ngaihsutna kikhekkhek thei hi. 1980 laikhawngin Zomi ka cih ciangin Tedimmi leh Paitemite ka cihna hi. Tu-in tua pen ka ngaihsutna ahi nawnkei hi.

Tua bangteng i genzawh ciangin i thugelh dingin a tuunkhak ding pen “Engnga” zanglote ka genna hiding hi. “Ennganga” zangte ka deihlohna hi zenzenlo hi. Mizo ka hi cih pen kei adingin haksalo hi. Gamtuam leh hong thei cianlote kiangah Mizo ka kici zellel hi. I vek in kici khinleng zong phamawh kasa kei hi. Ahih hangin tua ci thei nailo i hih manin a tamzawte pomsiamleh theihsiamna ciang tawh tutung hih thu kong gelh hi. Research bawl-a laisiamte gelh bang a gelh ka hikei hi. Thu ngaihsun nuamte leh thu ngaihsun mite ading a cithakkhuat ding tawm aom khakleh cihna tawh kong gelh ahi hi.

Zomite Leh Laipilna
I pianna, i tenna leh i nekzonna in tulai leitung pilna leh siamna sinna lamah mite tawh khekhai kibang dingin haksatna tampi hong tung hi. I khuak Pasian in hong piakpen midangte a sang hoihlo zaw sesetuanlo hi. Tua ahih manin i minam pen leitung pilna leh laipilna tawh kisai-in i tun ding tan tungzo lo hihang. Ahih hangin a tunga haksatna i gente leltak bangmah hikei ci a zumledai phamawh salo a laipilna a zongte i omna peuhah minuai a hituanlo hihang. Tua ahih manin Zomite i hanciamna na ding khat a ka ngaihsut leitungah mitawh kiton in painuam hang, i cihleh i siksan masapen ding Laipilna lamah atam theipen in i hanciamphat ding kulsa ing. Thauvui thautang leh thagum tawh hilo in laipilna tawh midangte i zo thei bek ding hi.

Zomite Leh Sumbawlna
I gam in lah hong zillo, kawlgam kumpi-in lah hong zillo a hih manin zomite sumbawlna-ah i kipia uh hi. I siamman leh i utman hilo in hih dingdang a omlohman hikha ding hi. Tua bang hi napi-in sumbawlna-ah zong a tuahphami theihpihzah a ahau zong om hihang. Ka gennoppen bel sumlepaai i zonna-ah hun paisa sangin citakzaw, muanhuaizaw in Pasian phawk leh zahtak takpikawm in sumzongleng deihhuai kasa hi. Banghanghiam cihleh sumlepaai zonna-ah muhtheihna ahih nakleh ci-in muhtheih muhmawh amuhsawm, zuaugen, mikhem phamawh salo, biakna lamah lah ki Pasian thu awisak mahmah sumpi bang tampi pi pia zawzen ahih hanga-lah i sumbawlna-ah siangtholoin omkha hileng kilawm hi. Tua bang pen i nutsiat ding hi.

Zomite Leh Pasian Thu
Dawi leh kau lauhna leh singbul-suangbul biakna khuamial sunga kipan khuavak hong musak Pasian ahi hi. Khristian i hihna kum 100 val paita hi. Pasian thu bang gen, bang hanga ei Khristian suak, banghang a Khristian Pawlpi om i hia cih ngaihsun a, tua i hihna hang hih tantung ding ci-a panlak sangin eima aituam pawl tuamtuam bawlin manlah hi lehang kilawm kasa hi. Pasian thu sinte’n zong paulam (excuse) a zangin – English siamnopman peuh, sum zonna ading a khawdakna peuh a azangkha zong i omkhak ding lauhuai kasa hi. Pasian thu tua banga ei-ut bangbang a, zat ding hilo hi. Pasian hehna hong tungleh kua ta’n thuakzo ding? Tua ahih manin Zomite i omna peuhah laipilna sinte, sum zongte leh nasep tuamtuam a semte’n ahi ding bang taka Pasian thu i zuih a, sem ding hong cih pen muanhuaitak leh diktattaka i sep ciangin Pasian in thupha hong pia-in, hong zangin makai leh luleban in hong zang ding hi.

Zomite Leh Leitung Vai
Mihing khat i hih leh leitungvai tawh kikhen theihlo hi. I vek sai theihhilo a, asai dinga Pasian in asap om hi. Zomite i kamsiatna mahmah khat pen gamthum – Kawlgam, Bangladesh leh India gamah kikhenkhia i hih manin gamkhat leh ki-uknakhat nei a, Paukhat leh Laikhat zang a i om ding pen thubaihlo ding hi. Ahitheilo ding cileng kikhiallo ding hi. Gam leh lei vai-ah i omna gam ciatah inntek pantheih dingdan ngaihsun a, a thuklut theithei a hampha himai dingin ka um hi. Tua dingin ah i vanzat ding omsun pen laipilna bek hi-in ka mu hi. Thauvui thautang leh thagum tawh mungeilo neilo hingeilo ding hi. Tua ahih manin Zomi nungak tangvalte aw – laipilna nakpitakin zong ni. A siampen hih sawmni. Tua hileh leitungah kivallo ding a, i omna gam peuhpeuh ah na poimawh leh mun poimawh len in vaihawmna i khut sungah i tawithei bek ding hi.

Zomite Leh Pau
Zomite gamtuam leh muntuam ah i om hangin i Zomi hihna i kepbit theihna ding pen Lai leh Pau hi-in ka thei hi. Pau tawh kisai genpak leng: I innsung pau hiam Zomipau laka khat peuhpeuh i zatte i innsung ciatah zattheihna ding koigam koigamah omtase leng zatsawm hamtang lehang bang aci tam? Tua i omna gamte pau leh lai zong amau tawh kibang a siamsawm ciat lehang tua hileh i omna gam peuhpeuhah kimikhuallo ding kuaman hong simmawh theilo ding hi. Tua banah i pau kammalzat tawh kisai-in zong, i omna gam zilin hong tuamkha ding hi. Ahihangin tuate hang kibuaisaklo ding. Amau dik, ei adik amau-adikkei ei adikkei cih sangin theihsiamsawm phot ding. Tua hileh nidang ciang kitheituahkhin ding hang a, Zopau pen Kawlpau, Bangdeshpau leh Indiapau kigawm hong hiding a pau hausapi leh a hoihpikhat hong suak ding hi.

Zomite Leh Lai
Lai tawh kisai-in ah i gelhdan spelling pen kibangkim thei pahlo ding hi. Lauloh ding hi. Banghanghiam cihleh America-te gelh dan leh Englishte gelhdan bang zong kibanglo-a ahih hang tua pen kuaman buaipihlo hihang. Kithei theilel hi. English laigelhzia pen leitungah a haksa pen leh paizia a neilo pen cileng cihtheihphial ding hi. Ahihangin sin hang a, kithei lel h]i. Tua bek hilo, kawllai, meitei lai hindilai i cihte ei Zomite adingin sikhalai tawh kibang hi. Ahih hangin sin hanga siamlel hihang. Tua ahih manin Zolai gelhdan tawh kisai-in I gelhdan ciat tawh gelhphot ding, hih dik, hih dikkei cih tamsaklo phot ding. Ei Zolai a hih nakleh sim theihsawm ding, a thugen uh theihsawm ding. Indiate zatdan, Kawlgamte zatdan, Bangladeshte zatdan ciding hang a asawt ciang kitheihtuah hun hong om ding hi. Tu laia “o” leh “ou” leh “c” leh “ch” leh “Tuu” leh “Belam” khawng buaipih –a a dikzaw hih kituh-a kigawm theihloh cih khawng pen a tunga i gensate khawng ka ngaihsut ciang keibel ka nuihza bek hi. Kigawm utlo hihang ka cilel hi.

Zomite Leh Thulela
Zomite hong gawmkhawm leh hong kaikhawm ding i pau leh laiteng a kigawmna thulela hong hiding hi. Kum sawmnih paita a ka ngaihsut tuni dong-a a sitheilo khat pen Zomite la phuakte kaikhawm in, khatvei a kikhen/print khinpahzolo peuh mah ding ahih ciang La bul 500 khawng telkhia dingin khen/print phot ding. Tua pen Zomite omna peuhah zuak/hawm ding. Tua bangin a bulpan lehang i kigawmna leh i kipumkhatna ding a vanzat poimawh mahmah khat hi dingin ka um tinten hi. Thu tawh kisai-in laibukhat peuhpeuh a gelh thei agelh zote’n gelh ding Zomite omna gamah hawm/zuak ding. Lai Siangtho pen tuletu hehu in khatzat ding pen haksa ding hi. Zomipau a Lai Siangtho omte neihsawm ding. Simtuahzel ding. English-a version tampi a ombang koihlel ding. Hihbang zong a lamdangpi a ngaihsutlo ding. Nikhat ni ciang Pasian in pha asak leh Paukhat leh Laikhat i zatkhawmtheih ding gam tuamtuamah i om hangin hong piangkhia mawhlo ding hi.

Mi tampi hih ka laigelh a simte’n hihpa thugelh bangci ahia naci kha ding uh hi. Duh thusam cihbel ka utpeuh gen hilo in i haksatna leh i buainate thei kilkelkawm in, a piangthei hetlo ding leh hahkat lehang a piangthei dingte ngaihsunkawm in hahkat in sawm lehang apiangthei ciang kong gelh hi.

Zomite’n tulaitak i phatmawh pen – Pasian athei, azahtak, diktat leh muanhuai, muhkholhna nei mi muanhuai leh misiam hangsan makai i kisam hi. I phatmawh lianpen hi kaci hi. Tua bang makai i neih theihna dingin thungen ni.

Source :

Ciimnuai Zomi Philippines (Laibu).
  • Blogger Comments
  • Facebook Comments

0 comments:

Post a Comment

Item Reviewed: ZOMITE KEI MUHNA PAN. Agelh ~ Rev. Neng Za Khup Description: Rating: 5 Reviewed By: cinpuzomi
Scroll to Top