728x90 AdSpace

Hot
Menu
Zon-ol na Donate

Latest News

ZOMITE PIANCILNA.

ZOMITE PIANCILNA.
Photo Credit : Thor Thorn

Zomi ihpu ihpi, ihpa ihnute in Lai tawh ihtangthute ciaptehna aneihloh uh hangh in Zomite Sengam ( China ) sungpan kipiang hi, ci-in ciaptehna nanei ciat uh hi. Zomite ihpiankhiatna mun in koilai mun ahihiam cih thu pen Khaamtung gam ( Tedim ) aa, Pasianthu hong puak masa penpen Dr. J. H. Cope KIH, BA, DD, ( ABM ) in agenna ah "No Khaamtung mite pen Mongolia minamte tawh nasamphek dan uh leh nabiakna dante uh kibang mahmah nahih uh ciangh Mongoliagam pan Tibet ah teeng in, Tibetgam monglam mualsang tung aa, ateeng Mongot minamte sung pan apiangkhia hi nuteh " ci hi.

Dr. J. H. Cope gennate ihngaihsut ciang in ei Zomite Khaamtung aa, apiangtawm’ ihhih lohna kithei hi. Tua ahih leh Zomite Khaamtung atun nang’un koilam pan hongzuan uh ahi tam?

Zomite Piankhiatna, Ngaihsutna a Tuamtuamte
Zomite piankhiatna Mun tawh kisai in upmawhna nampi Guk om aa, ( The Workers’s New Letter 1983 December Issue laaimai 1 leh 2 sung ah )
1. Khul Theory
2. Chhinlung Theory
3. Chin Theory
4. Jo/ Zo/ Chou Theory
5. Zomi Israel Theory
6. Ciimnuai Theory


1.Khul Theory:
Khul cih pen suanghawm ( cave ) cihna hi aa, pawlkhat in Sengam sung diing in ummawh uh aa, pawlkhat in Tibetgam sung diing in ummawh uh hi. A hi zong in Zomi Pi leh Pute Phuisamna kammalte sungah....

Khimpi zin ni, khapi kiat ni, Khawhkhen ah Khawlzang ah, micin sacin kikhawl nung tungpi suah ni, kapi nem nikpi, niksan hong hai tah teh nanik san aa, napai kik leh, Vannu Khulpi hong khuphnelh ta teh, Khul vang ah hong suakta teh, Dawi-in Kau in hong piangta teh, gantual ngo kuanta teh, na tuahmawh ciangh hih nu hih pa guh teep teh, nagan tual ngo zon hi nu hi pa guh teep ken, na gantual ngo zon ngahta teh, na khua zuan in, na tui zuan in a tong a Laam diing in hong ngaklah hi.

Hih a tung aa, phuisamna kammalte ih et ciang in, Khawhkhen ah, Khawlzang ah, Khulvang ah hong suakta teh ci ahih man in, Khawhkhen pen pawlkhat in guntawbingna ci uh aa, tu hun in Gunkhawm ( Kalaywah ) kici hi. Khawlzang ( Kawlzang) pen tuhun in Kawlpi ( Kalaymyo ) kici hi. Tua ahih ciang in Zomite pianna mun masa in KHUL hileh Kawlpi kuam gunkhawm leh Meitei gunkiim, tulaitak aa, ihtenna mun mah ah Zomite apiang hi diing hi.

2. Chhinlung Theory:
Zomite Chhinlung pan kipiangkhia hi ci aa, a gen mi pawlkhat om hi. Pu Zawla Laibu gelh "Mizo Pi leh Pu leh An Thlahte Chanchin" cih Laibu sung ah Chhinlung pen Sen ( China ) Kumpipa Chien-Lung mi hi aa, tua hun laitak in Sengam pan a paikhiate ChienLung mite kici aa, tua mite pen ei mah hi hangh ci-in gelh hi. A hi zong in Sen kumpite Khangthu ih et ciang in, ChienLung in kumpi asep hun pen AD 19361736 hun sungteng hi aa, tua hun in Zomite Khaamtung ah innkip lokip in teengkhinzo hi. Tua ahih ciang hih Theory pen santheih tatak diing in kicingzo tuanlo hi.

3. Chin Theory:
Sengam ( China ) ah Chin Kumpipa gui aliat sung ( CHIN Dynasty BC 221-207 ) hun sung in Zomi ihPu ihPiten’ Sengam pan Khaamtung hong zuan hi diing hi, ci-in Pu.Hrang Lien in Hmar Chanchin Laibu sung ah gelh hi. Pu.HrangLien gelhna ah Zomite pen Sen kumpi Chin akhan sung in kipaikhia ahihman in midangten’ "Kua mi nahi uh hiam" ci aa, anadot uh ciang in "Chin mi hi ung" na ci uh ahihman in tua hun laitak aa, Sengam pan Khamtunggam zuan aa, apaikhia Zomite pen Chin akici ahihi, ci-in Pu. Chou En in gen hi, cih Pu. Hrang Lien gelh laibu sung ah kimu hi.

Mi pawlkhatte upna ah "Chin Dynasty hun sung in Zomiten' Tibetgam zuan in pai uh aa, tua pan Naga mualdung tawn in, Kabaw Kale valley hong tung uh aa, tua mun pan Khaamtung ah hong teeng uh hi" ci-in gen uh hi.

Hih hun sung in Zomiten’ Tibetgam azuat diing uh pen uphuai nailo hi. Banghangh hiam cihleh tua hun BC-221 hun sung in Tibetgam ah Buddhist biakna nasia luakhin mahmah ahita zong in Zomiten' Buddhist bialna bia kiuhkeuhlo uh ahih ciangh tua hun in Tibetgam ah Zomite om diing cih pen uphuailo hong suak hi.

4.Zo (Jou), Cho (Sho) Theory:
Zomite pen Sen Kumpi gui Jou ( Chou Dynasty BC 1027-26 ) hun sung in, Sengam pan kipaikhia hi. Tua bangh aa, apaikhiat uh ciang in a Kumpi min uh minam minmah in la uh aa, Zomi kici uh hi.Tua Zomite mun leh mual akibat lohna hangh in Zo,Jou,Chou,Sho ci-in atuamtuam in ongkisam hi, ci-in J. Gin Za Tawng in "Zomi Innkuan" Laibu sung ah nagelh hi.

5. Zomi Israel Theory:
Tu hun in Zomite sung ah Tapidaw biakna hong om ciang in ei Zomite pen Israel minamte hihangh ci aa, a gen mi pawlkhat zongh ihom hi. Zomite Israel minam ihhih leh ihpian khiatna zongh Palestine gam hi diing hi. Hih thu tawh kisai in Leitung tangthu ( World History ) te aa, kipan ihpu ihpite gennate, tangthute ah matlap theih diing bangmah om kiuhkeuhlo hi.Hih upmawhna tawh kisai in, Israel minam 12 sungpan Manech suante hihangh, Manech pen Zawtah ( Josept ) tapa u pen hi aa, tua pa suan leh khakte taimang in Sengam pan Khaamtung atung hihangh kici hi.

Israelte biakpiak zia leh Zomite biakpiak ziate ihetkaak ciang in, Ganhing sisan tawh biakpiakna leh biakna Tau bawldante kibang mahmah hi. Hih thu tawh kisai in Lai Siangtho longal, adang siksan theih diing omlo hi. Lai Siangtho tawn in ih et ciang, Adam leh Evuah in mawhna hong bawl uh aa kipan in Sisan tawh biakna hong kipan aa, Noah khang ciang in Tau dawh aa, biakna kinei pan hi. Israel cih minpen Jakoh suan pan akipia min hi pan hi. Pasian leh Abiahang suante kikal ah thu ciam khat om aa, tua in Vun atna ahi hi. Zomite pen Israel minam ihhih leh ihpu ihpaten’ Vun na at diing uh aa, Sisan zong natang diing uh hi.

Pawlkhat leuleu in Manasi suan hihangh cilai sawnsawn uh hi. Zomite pen Manasi suan ahih diing sangh in, Manasi pen Zomite sung aa, Mi minthang khat ahih diing upmawh huaizawlai hi. Tua thamlo in Manaseh leh Manasi zongh kibang lo aa, atuam tuak hi. Tua ban ah Leitung Mihingte Nam thum in kikhenthei aa, Caucesian, Mongolian leh Negroto a hihi. Causesian kici minam pen Aryan kici anaaksau aa akuipawl hi uh aa, Israelte zongh tuate sung ah kihel hi. Zomite pen Mongolian minam ih hihi. Cii leh Sa ( race ) ah zongh Zomi leh Israel pen atuam v ilvel in kilamdang hi.

Hih atung aa, upmawhnate akhatna pan aLina ciang ihet kik ciang Zomite pen Sengam pan atai hihangh ci-in naciamteh tek uh hi. A hi zong in theihtelna (ev idence ) leh tangthu kigelhna ( Historical Record ) kician om mello hi.

Ngaihsutna 1. KHUL Theory pen Zomi ihpu ihpate genna pan kithei ahihi. A mun pen Oksatang hi, aci pawlkhat om hi. Khul aa, akiten hun pen Songthu Khang hun hi aa, Dawi thoih phuisamnate khawng ih et ciang Khawhkhen ah, Khawlzang ah, Khulvang ah ongsuak teh...., ci-in nalo uhhi. Hih thu ih et leuleu ciang in KHUL omna mun pen Sengam hikei leh kilawm hi. Khawhkhen pen Gunkhawm hi aa, Khawlzang pen Kawlpi kiimteng hi. Tua ahih ciang in KHUL pen Gunkhawm leh Kawlpi kiimteng hi diing in ki ummawh hi.

Ngaihsutna 2. CHHINLUNG Theory pen uphuailo thu hong suak hi. Banghang hiam cih leh Chhinlung ma in CHIN KUMPI in, Sengam buppi ah AD 1644 kum in pasal khempeuh asam uh mettolsak aa, hih mun ah Zomite ki hello, kitheilo hi.

Ngaihsutna 3. CHIN Theory ihet kik ciang in, SHI-HUANGTI hun lai aa, Chin dynasty kulhpi ( the great wall ) laam nuamlo uh aa, ataikhia Zomiten’ Buddhist biakna nabialo uh hi. Chin dynasty ( BC 221-207 ) hun lai Zomite Kawlgam hong tunma un Tibetgam ah kumza tampi teeng uh hi. Tibet pau leh Zo pau akibatna tampitak om hi. Tua ahih ciang in Kulhpi laamlaitak aa, ataikhia pawkkhat aomkha zong in, atamzaw pen Kulhpi kilaam mapek in Tibetgam ah teengkhin uh hi.

Ngaihsutna 4. Z0 (JOU), CHO (SHO) Theory ih et ciang in ZO/JOU/CHO/SHO dynasty ( BC 1027 pan 256 ) hun sungteng in Zomiten’ Sengam nusia in, kipaikhia hi cih pen a uphuai penpen ahi hi. Biakpiakna leh Ngeinate ih et ciang in, Buddist biakna Sengam ah atun ma in Tibet ah tung khinzo hi. Sengam ah SIX dynasty ( 221 BC pan AD 289 ) hun in, Buddist biakna in gam sungteng zelpan hi. Zo dynasty hun laitak in Sengam pan paikhia ih hih manin Zomi akici ih hi hi. Tangthu kansiam ( Archealogists ) vanlui zongte paulapna tawh kisai in, akantelte leh mihing nuntakzia akantel mipilte in Zomite pen Mongolian minam hi aa, Sengam laizang Yangty leh Khoangho gun kikal pen Zomite leh Mongolian minamte ten masakna ( Original home ) hi, ci-in (C.M.Enriquafz. A Burmese Aready) Laibu sung ah kigelh hi.

Tu hun ciang in thubulkan, thuteelsut, thudik zongpawl ( Archealogists ) kicite in, tanglai aa, Han (tomb) te tokhia, pholhkhia uh aa, tu ma 2000 hunlai in Chin kumpi phualpi pen Sengam Shannyi Prov ince Fengsiang country gam sung ah, mukhia uh hi. “ The country is the sits of 18 tombs of the Chin Rulers in China in this country century” sungpan in tanglai van nam 2000 val mukhia uh hi, ci-in People’s Daily of Beijing ( Peking ) pan June 13,1986 ni-in nagelh kik leuleu uh hi.

Zomite buddah biakna in sukhalo ahihman in, Tibet gam aa, akiten hun pen BC 600-250 sung hi diing hi. Chin dynasty hun aa, Sengam aa, a omlaite leh Kulhpi cian laitak aa, apaikhiate in Junan hong tawnsuk uh aa, Shan gam ah Tibet aa, a omte tawh hong kituah uh hi. Shan pan in Kawlzang zuan in, Tuikang dung hong zuisuk uh aa, Kawlzang hong tunkhit uh ciang in, vai tuamtuam tawh hong kikhen zakgawp uh aa, atung in Zomi bek ihhih hangh in tenna mun leh mual leh guam in honghal ciang khat leh khat kido, kisim in mun kawmbu tata tuh in khua nasat uh ahih man in Kampau, mukpau kibat lohna tampi hong piang sawnsawn hi.

Zomite leh Senmite pen ngeina, upziate aa kipan Misi akivui ciang aLulam pen nisuahna lam ahih kei leh Tuitaw lam kingasak aa, nisuahna lam aki ngatsakna a hangh pen amanawhna diing Lampi lahna hi cih ihupdante zong ki bang mahmah hi.

6. Ciimnuai Theory:
Zomi ihpu ihpa ten Zomite piankhiatna thu agen uh ciang in CIIMNUAI nakihel tawntung hi. Tua ahih ciang Zomite Khamtung gam ihtun ciang in ihten masakna pen Ciimnuai hipahkha diing hi.

Kawlkumpi Ava mangpa hong khanma AD 1596 pawl in Zomite pen kumpi ukna gamkhat sung ah kumpi khat mah in naom khinzo hi. AD 80 kum pawl in Kawlgam sung ah Zomite na tungkhin na teengkhinzo uh hi cih pen kuama nial theihloh diing in PONG ( Shan ) mite Khang simna, Khang tangthu ah kiciantak in kiciamteh hi. PONG kumpi gam ah kumpi asem masa pen KHUUL LICE hi aa, AD 80 pawl in Kumpizaa nangah hi. Pong gamuk kumpite pen Shan mite nahi uh aa, tulaitak aa, Thailand ( Judia ) ah tampi teeng uh hi.Tua mite Kawlgam hong tunma un, Sengam NANCHAU-FU mun teng ah teeng uh hi.

Khuul Lice kumpi aa kipan MURGNAW kumpipa ciang Khang 30 pha uh aa, AD 777 kum pawl in Murgnaw si hi. Murgnaw asihkhit ciangh atapa SOOKAMPHA in kumpisemto aa, Sookampha naupa SAMLONGPHA in FUNAN aa kipan ASSAM gam ciangdong gamkeeek aa, Burmaputra gunkhawm ah, AHOM kumpi gam hong phut hi. Tua laitak aa, PONG kumpi ukna gam pen Nanchao ( Vietnam ) Bengal, China leh Kawlzang buppi a hihi. Tua hun pek in zongh PONG minamte khangsimna tangthu ah ZOMI NAMTE cih na omkhin hi.

SAMLONGPHA in AD 1474 kum in Meitei hausa Ningtboou Kyamba tanu azi diing in hong pi hi. Lampi ah Sourunkhum in agalkapte tawh napang aa, mopite thatlum uh hi. PONG kumpipa thusa pipa Chowlanghied suakta khazenzen hi. Hih thu hangh in, Pong kumpipa leh Khampat kumpipa hong kido uh aa, Khampat khua kisimgawp in Zomite nitumna lam mualtung zuan in galtai uh hi. Khampat khua kisiatkhit asawtlo in Ciimnuai leh Geeltui khuate hong thupi mahmah aa, Thang Ho leh Lian Do te unau in Hausa hong sem in, a Pi vaikhak mahbang in Pupa ngeina, Zo ngeina, Zo biakna te hong kemcing uh hi. Thangho leh Liando hunlai ihkan ciang in Zomite ihngeina, ihkhangthu tampi kimukhia hi. Thangho te unau Pau zat pen Dimpau hi aa, a innvengte Pau zat pen Duhlian pau ( Mizo pau ) a hihi.

Thang Ho leh Lian Do in Daak a tum uh ciang, a vengte dotna La te ihet ciang in "Lian Do te unau Dar eng nge in tum, in tum, Dar eng mah kan tum lova, Lian Do Bor Chhiate kantun kantun" Tua hunlai in Lusei, Tedim, Falam, Thahdo, Kuki cihte omlo in avekpi un ZOMI ci-in kisam uh hi. Capt. R.B. Pemberton intelligent department, Manipur- PONG khangsimna laibu Chronicle-1830 sung ah teltak in kigelh hi.

Tua ahih ciang in, ei ZOMI te pen PONG kumpite khutsung ihomlai pek aa kipan ZOMI ci-in ih min ih puam a omkhinsa ahi hi. Tulaitak aa, min tuamtuam aa, hong kilawhnate phiat in Zomi ih cih diing a thuman pen ahi hi.

Source :
Internet.

Ngetna :
Kua I gelh, kua I kaihkhop cih kithei lo ahih man in athei te in nong gen nang un Laibusaal pan huhna ka hong ngen uh hi. Lai gelhte tungah lungdam mahmah ung.
www.laibusaal.com



  • Blogger Comments
  • Facebook Comments

0 comments:

Post a Comment

Item Reviewed: ZOMITE PIANCILNA. Description: Rating: 5 Reviewed By: cinpuzomi
Scroll to Top