728x90 AdSpace

Hot
Menu
Zon-ol na Donate

Latest News

BANG HANGIN LAI SIM HUAI HIAM?

BANG HANGIN LAI SIM HUAI HIAM?

1. Pilna ngahna (Intelligence)
Lai icih in thu le la kiciamtehna ahi hi. Thulela theihna in thu theihna (knowledge) khangsak hi. Thutheihna in Lungsim ngaihsutna picing sakin, muhna taangzai sak hi. Tua thu theihna pan thu theihtelna ah hong puak lai a, tua pen pilna hi ci’n kihuam cih thei hi. Kawlte lai-at siam Sya Aungtin in “Pilna icih pen a thu theihtelna hi.” na ci hi. na neih na lam te tawm vei sungin bei thei mah ding hi, ahizongin tua na thutheihna pen kuamah in hong guksak theih nawn loh vangil hoih mahmah ahi hi.

2. Khuak ciim sak
 simna in ih khuak ciim nading (cognitive ability) thapia hi. Tua bek hilo in thukhat peuhpeuh ah mitsuan gige zawhna (concentration) hong pia hi ci’n Oxford Scientist ten gen uh hi.

3. Khuak ciaptehna (memory) hoihsak
Laisim na in ih khuak memory hoihsak hi. Tua hi a, teek zawh guai zawh a piang khuakteek natna (dementia, alzheima) cihte pan dal tuam hi ci’n cidamna lam research na ah kimu khia hi.

Pumpi damna dingin exercise bawl akisap mah bangin, khuak hoih, khuak damna dingin laisimna akisam ahi hi.

4. Khangto sak
Pumpi khan nadingin an akisap mah bangin lungsim khantohna dingin laisimna kisam hi. Laisim mite ahih leh a kum a tawm hangin a lungsim uh picing in khangto sak hi.

5. Naupang lungsim khantohna aading tawhtang
Developmental Psychologist khat ahi Young Piaget in “naupangno khat aading anuntak sung in lungsim theihna khantohna ii tawhtangpi pen laisimna hi” na ci hi. Tua hi a naupang kum 2 pan kipan in tangthu genna, laibu tawi sak na cihte bawlna in naupang lungsim sungah lawpna pia hi ci hi. A kum tawh kizui in laibu tawh pattah ding pen ‘theory of cognitive development’ ah na limgen mahmah hi.


6. Laisimna in na tampi tak khel thei
Mikhat in ama uuk lai asim, akan na hangin ama muhna, nuntakna bek thamloh ama kiim le paam a om nate akipan leitung bup dong kikhelna piangsak zo thei hi. Leitung a revolutionist minthang ahi Ernesto Che Guevera bang pen a neulai in Chile lapau at Pablo Neruda lapau te asimsim na panin communism lam hong lunglut tektek hi ci hi. Kawl lai-at siam Sia KaungTant in “Nikhat phone hong lut in ka san leh, Sia aw na laibu at Ka Tanu Sim Ding kasimna tungtawn in kei leh kei ka thadim kik in, ka suicide bawl ding ka khawl hi ci’n numei khat in hong gen” ci’n a thugenna ah gen ngei hi.

7. Mit-hek theisak
Laisimna hatte in mi mithek, khua hunte ensiam zaw uh hi. A mun a mual tawh kituak in om thei, pau thei zaw uhi.

8. Laisimna in hong thakhauhsak
Lai simna tungtawn panin ih theihna khangin tua in ih dinna, ih muhna te thakhauhsak hi. Ei le ei zong kimuanna hong neisak hi.

9. Laisimna in thu hoihtak hong ngaihsun thei sak hi (stronger analytical thinking)

10. Laisimna in kammal tampi hong theisak in, lai-at zia hoih sak zaw tham hi.

11. Mi tungtuang khempeuh laisim mi na hi
Tuni ciangdong leitungah mi minthang, mi tungtuangte pen laisim te ahi uh hi. 1992 kum pawl in Lai-at siam khat in a laigelhna ah tuni ciangdong US kumpi mit limlang bulhlo omlo hi na ci hi. A cihnopna ah laisim lo omlo hi acihna ahi hi.

12. Laisimmi a tamzaw gam khangto te na hi
A khangto gamte ah laibu lim sim mahmah uh hi. Leitung ah laibu limsim gamte aki et ciangin Israel, Japan, Korea, Singapore etc… cih bangin gam khangto teng mah na hi zel hi. Ih gam ah zong ih Zogam pen laibusaal le laibu sai a tawmpenna gamke khat ana hi gige hi.

13. Minam khangto picingte laisimna tawh kipantah uh
Israel te a neu akipan in laibu sim ding tawh kipantah uh hi. A diakdiak Laisiangtho bang pen sim in a nam ciatciat uh ahi hi. A tate aading laibutau pen a lupna lukhung lamah bawlsak hamtang uh hi.

14. Laisim dan ding nam 3
📓Laibu pawl khatte pen an bangin, ne in hai in valh in.
📒Laibu pawlkhatte pen kawltu bangin, a tui valh in, a tee siat khiat kul hi.
📔Laibu pawlkhatte tuuibuuk bangin, muam khit ciangin a vek in siat khiat kul hi.

Note ; Laisim manphat na tawh kisai in hi bek hilo “Laibusaal ah tampi tak Sia, siama te’n guicing tak in a at sa te om khin sim kikkik theih ahi hi. Hih a tungaa thute pen keima muhna hilo a, ka laisimna, ka kanna tungtawnin ka theihkhak thute kong hop sawn ahi zaw hi. Laisimna hangin thumanpha tampi tak om suksuk lai ding hi. Nang ee bang teng na mu aa, hong zom suk lai in!
xxxxxxx
Lungdam
Nk Khanno (Zingsol)

Lai etkak te;
1. brain power, bright side.com
2. 8 science-backed reasons to read a real book
3. “P.S I Love You” book
4. Child right and development
5. How Israel parent guide their child
6. How to read a book
7. Cheguevera


(Tuma kum khat lai in laigelhpa Dr. Nk Khanno kiangah hih article i nget hi in tun hong khakta ahihman in lungdam mahmah hang. I biak Pasian in hong zatsak semsem tahen... ~ www.laibusaal.com)
  • Blogger Comments
  • Facebook Comments

0 comments:

Post a Comment

Item Reviewed: BANG HANGIN LAI SIM HUAI HIAM? Description: Rating: 5 Reviewed By: cinpuzomi
Scroll to Top