728x90 AdSpace

Hot
Menu
Zon-ol na Donate

Latest News

Bethel Assembly of God, Tedim biakinn tawh kisai thu Aki mangngilh (theihloh) khakding. Agelh ~ Pu Pau Za Mung

Bethel Assembly of God, Tedim biakinn tawh kisai thu Aki mangngilh (theihloh) khakding.
Agelh ~ Pu Pau Za Mung


 Thu patna
Bethel Assembly of God, Tedim in a Pawlpi phuh zawhuh kum 40- cin na (Ruby Jubilee) Pawi abawl tungtaangin ahawm khiatuh Laibu ka simkha zenzen hi. Tuabangin ka simkawm kawmin hunkhat lai aa hih Pawlpi biakinn tawh kisai vai lianpi khat ka tuahkhak ka lungsim sungah hong suaklakh lai zang hi. Tuabang thu in, Pawlpi aa dingin thulian mahmah ahih ciangin thupi tak tawh in ahong ki suaksak ding lametna tawhin tua tawh ki sai thulu ka zonpah saisai leh, ka mu zokei hi.

Kei zong, biakinn thak lamhna ding tawh kisai a theihnop leh a theih huai thupiang tampi tak a om kimlai, hihbang thu omthei ding ahiam? ci’n talo in laimai citeng mitphia lo liangin ka baanzon kawikawi leh, akawm lak khatah, “Pa Pau Za Mung (Engineer) a lim’ ki suaisak,” cihbang tengbek lai gual tomno khat tawh aki gelhlel ka mu hi. Hihbangaa aki atsa thu leh a tak takaa athu piang ki tuaksa nai pallo in ka zonzon kawikawi lai hangin ka muhbehtuan nawnkei hi.


Tuazawh phetin ka awm sungah ahong do gega khat a ombangin ka nei hi. Hih BAG biakinn tawh kisai thu piangin hihbang zah liai’ hipeuh mah lo aa, bang dingaa aki cingin hong ki suaksak lo hiding a hitaam? cih ka ngaih sunzom leuleu hi. Atawpna ah, aw…! hithong mahlo diai hiam! amau a theih ngeilohpi dinguh; tuabanga a theihna dingun ke’n ka gen ngeilohpi. Tua bangaa ka gentheihna dingin adan leh azia in ahong piak ngeilohpi in. Atak tak thupiangin, anuai aa bang dan ahi hi.

Hong hawh photphot
1986 huam, nikhat ahi hi. Sia Khambawi (HLK) leh Sia Khaisuan (KKS), a nih un ka innah hong hawh phawphot uh hi. Khambawi tawh bel, 1961- kum aa ka kikhen uh, kum 25- zawhbang ciangaa aki mukik pan ka hih uh manin,

lamdang kasa mah hi. Tua tungtaangin amau zong a maiguan (mai ngaltuam na) dinguh ci hiding hiam, India lampan aa ahong suak, sabuai puante khat hong puakuh hi. Tawlkhat ka holimh khit zawhuh ciangin a vai uh ahong gen in ah;

Biakinn ding vai
Sia Khambawi in, Tedim aa a BAG Biakinn athak lamna ding tupna nei uh ahih na; tua tawh kisai aki samh Drawing leh Builder’s Quantity (BQ) te ka bawlsak thei taam, tuabangin hihsak thei hileng, bangzah bang ka bawlman la ding ka hihna ahong dong hi. Ke’n zong, tuabangaa ahong dotna in, amah Pastor ahi kimlai thu a hilhthei taam, ci’n ka dot phingphing ding tawh ki bang ahihna, keima nasep a hihmanin hihsak theilua ding ka hihna; amah ka lawmpa in, hihbangaa Pastor ana hihna leh ahong sawlnop nasep nate in Pasian nasep na ahihna hangin keima pilna, siamna leh gimna tawlna tha mante sumpi khiat bangin ngaihsun in ka laaklohna ding; ahi zongin keimah in ageel leh ahawm bek ka hiaa, a lim suai ding ka draught-men te gawih kul ding ahihna tawh ka dawngkik hi.

A tupna in
Aman, biakinn lamhna dingaa aki samh sum leh paaite ei gamsung bek pan ki ngah zolo ding ahih manin, Leitung mun leh gam tuamtuam aa mi namdang meltheih akua mahpeuh kiangah hawmkhiat sawwm ahih manin International Standard tawh ahi copy 10- ka bawlsak na ding zong, hong ngenbeh lai hi.

Draughtmen te tawh ki musak
Tuabang Project thupi tawh ki zui in limsuai ding draughtsmen a tawmbel thum tawh sepkul ahihna ka gen hi. Draughtmen te in a ngeina bangin a laaklohna dinguh, hih bangdanin Pasian’ nasepna ahih manin amau zong thupha ngah ding ahihna; tua ahih manin niangtui man ding ciangbang bek a laakna dingun ka gen hi. Tuakhit ciangin amau leh a mau ka ki hosak leh, a tawpna ah niangtui man ding bangbek takpi mah ahi, K 1,200/- laak ding in aki thukim uh hi.

NB:- Ahi zong in a sum aki piak taktak uh ciangin aki ciamnuih uh leh K 1,600/- pia ci’n ka nungtheih hi.

Nasep dan ding
Hihbang dan nasepna in, ageel (design) leh ahawwm baanah, B Q tuat, typing leh Licensed Engineer Endorsement ding teng keima hih ding, draughtmen te’n kei design bangbangaa athem aneng (detail) takaa a suaihna ding ahi hi.

Tua bekthamlo, hihbang biakinn in, Zomite khuapi, Tedimaa dingin abeisa aa a omngei nailo, mailam zongah a omngei nawnlo ding ahih manin, Tedim khuapi atawi sang, a laamsang ding bek hilo, Tedim khuapi aki ciapteh na leh aki lawhna ding (Landmark) khat ahihna ding tawh ki zui in, ahi ngiamh- nguamh (gothic and grandeur) aa, a sung bangah a lutte, alu uhbang khang hanhhanhaa, a khua-sikhmul uh atho liang ding, a galbang panin aki galmuh ciangin a lungsim uh vot dakhmah in a mitkha uhaa a luaisa tawh adin bang uh asang ngang-ngangsa bangaa Tedim khuapi sung a lutna ding uh, hibang zah ciang dongaa vaang anei ahih na ding ki ngimpah hi.

BN:- Hihbang innin, dawl lii (4- storeys) tak ahih baanah, munkhamh (slope) ah ki lam ding ahih manin, aki sambek hikei, zong a thupi suahsak mah mah tuam na dingin, a tunglam dawl leh a nuailam dawlte a pualam kahlei (external step) tawh hilo in, a pualam panaa aki mulo ding (Internal step or underground tunnel tawh hihding ngaihsutna ka piak leh, hong ki sangtheilo ahih manin, aki hihlo suak ahi hi. (Eg. President Cinema Hall, Yangon aa, Grand Stand ah aki lut kiau-kiau na bangte; ei a lutte mahmah in zong aki gen theilo vaang ki neituam tham hi.)

Vaikhak
Atungaa bang dan tawh na ka septheihna dingin, biakinn ki lamna ding amun (plot) ii leilupzia, adung leh avai a saunate leh a contour line te limtak aa hong teh aa a manlang thei belaa ahong khakna ding ka vaikhak hi. Amau zong a sauveilo in ka cihbang linnliann in hong khak pahuh hi.

Hong ki muan mahbangin
Ka draughtmen te tawh nisimin zum tuahzawh ciangin overtime tawh zaan 10:00pm dongmah ka sempah ciattciatt uh hi. Zum nasepdang bang dan in aki sem hileh, kha 4 bang a sauvei ding kimlai, nipi kal nihin ka manuh hi.

BN:- A pualamaa architech te ki sawl hileh, amau alam leh asem ding nasep a theisa leh a siamsa (technician) te theihtheih dingte lakin nei nawnlo in, a hampi cihbang bek tawhin aki suai ding ahi hi. Tuin eilamah tuabang technician cihbang omlo proper trained hilo, tualsung lettamate in tua bangte atel theihloh dingciang khualna tawh in, athem aneng (detailed) takin aki suai ahi hi. Tua ahih manin, a zahnih bangin a tamtuam pah hi.

Sepdan
Thatanghaa aki semthei teng aki sepzawh ciangin, Drawings aki suai teng khempeuh copy 10- ta, man pialo in War Office aa ka copying machine uh tawh ki bawl in, BQ te a pualam ah keima sumbei in ka bawlsak ahi hi. Drg: (3’x2’) dal 10×10= dal 100- hi’n, BQ dal 20×10= dal 200 bang ahong phapah hi. Avekpi aa ki gawm puakkhop mahmah hong phapah hi. Tuateng aki man siangzawh ciangin Sia Khaisuan ki ap hi.

BQ bel, ka uang (deih) tuat mahmah ahih baanah, ei mau aa dingin pauklap hawih mahmah ahi, 15% wastage in transit, including handling charges, from Yangon to Tedim ci sawnsawn ka hih manin asep dan ding bel anuam mahmah ding ahi hi. Tualai hun paizia tawh kizui in, tuabangin kumpi sung panin van ki ngah hileh, biakinn amah leh amah aki lamzo ding bangdan tawh, deihsak luatna tawhaa aki tuat ahi hi.

NB:- Tua lai in copying machine tuabang cia aki copy theihna ding a pualam ah om nailo in War Office bek ah om ahi lai hi.

Lam-etlohpi in hong kisam laizang
1988- kum, Summer Holiday in ka innkuan un khua ah ciah dingin Tedim ka tungto uh hi. Tedim ka om sunguh zingsang khat, BAG Pawlpi upa khat hong hawhin, sun 1:00 pm in biakinn ah ka innkuanun Pawlpite in niang tui hong neekpih nuam a hihmanin ka va pai na dingun hong sam phawphot hi. Ko zong a theikhol lopi banghang cih zong teldot tuan nawnlo in ka sang pah uh hi.

Ka innkuan un, hong sap hunlap in ka va paitaak uh leh, Pawlpi sia teng leh upateng ana kim phenghphangh baanuh ah, sa bawlbawl tawh niang tui hawmhawm tawh na sa kheokho uh hi. Tuaciang dong bangmah ka telnai kei lai uhaa, Pawlpite in hihkhat nei aa, ka innkuan uhaa ahong neekngaih na tawh ahong sam bangin ka ngaihsun lel uh hi.

Sagawh atuak ki hi zaanzaan
Ka tunzawhuh a sawtlo in, hun bawl dingin hong ki panuh aa, kei, a sabuai, hun-ukte tawh mun hong ki piakhawm leuleu hi. Tuaciang dong bang ka hemtheih nai keilai hi. Banghang hiam cih leh, hih Pawlpi tawh kisai in asia apha ka ki suanna ding bangmah ka neihloh lamtak bel, ka ki tel mahmah hi.

Hun-ukpa in hun honna a bawlzawh ciangin hun honna thugen dingin Pawlpi upa Bu Kam Cin Hang (Rtd:) asawl hi.

Bupa in, “Tuni aa hihbangaa vai ih neihtheihna a hangin, Sia Pau Mung in ih biakinn ding lim ahong suaihsakna ah, en! a pualam ah ih kankawi kawi leh K 100,000 nuai omlo kimlai, aman K 1,600/- bek tawh ahong bawl sak zawhna hangaa, biakinn neihzawhna in ih neihtuamna ding hangaa lungdam kohna ankuang um khopna anei hihang…….,” ahong cihtak ciangin, ka dip vanaa khai hong bang hi. Tuabang tawhin lungdamna thu upate in zong khat khit khat in hong genuh hi. Ke’n bel, ka cihna ding theituanlo in, ZBC No.185. I know whom I have believed cih bulphuhin ka lungdamna genkikin, vekpi in dinsa in, tua la mah sak dingin ka teel pah hi. Tua ni ka ciah dinguh ciangin, Zongeina sa ki gawhdan bangmah in sa hong tanh eu-au uh hi.

A tawpna ding ka sakleh, aki patna hipan
Pawlpite in lungdamna ahong koh na ah, a van ki samhteng siauhna ah zong, keima huhna hong muangnuam uh ahihna uh hong genuh hi. Kei zong kei sepngei khat ahih manin, ka cihbangbang in ahong hihnak uh leh, ka huhzawhna ding kamciam ka piapah hi.

Ka cihbangin bang hiam cihleh; Drg: leh BQ set khat tawh Tetsai- za Zatkwet Okkathah pa kiangah siauhlua at ding, aman ahong recommend zawh ciangin Myonee , Khazaing, Pyenee ah a baanbaanin recommend na tawh kei kiangah aman langtheithei aa ahong puakna ding ka vaikhak hi. Kei kiang ahong tutnak leh, Directorate of Religion leh Ministry of Religion, Yangon leh Building Materials Corporation aa vaan siauh na ding lam bel keima tavuan dingin zong ka genlai hi.

MD pa tawh ki holim
Kei, Yangon ka tunzawh a sawtlo in, kei leh Lt. Col. C Ving Ciu (Rtd:) vai dang khat tawh Building Materials Corporation, Head Office, Bogalayzee Rd. ah a Managing Director, U Ohn Kyaing kiangah ka pai uh hi. Ka thum un tawl khat ka holim zawhuh ciangin, MD pa in, Chin Pyenee koi tak pan ka hih na uh hong dong laizang hi. Ko zong Tedim pan ka hihna uh ka genphet un, Bogyi Hau Za Gin Leh Bogyi Kam Cin Hang te a damlai/ loh uh hong dong hi. Ko zong damlai ahihna uh ka genuh leh, mu nuam mahmah ahihna hong gen hi.

NB:- MD pa in, U Ne Win ih a innlak sanggam ahihna; hunkhat lai in Alanni Communist Party tawh in gamsung belngei a hihna; tuabang aa gam sung belaa a omna panin Bogyi HZG leh KCH te Batallian ah a-linnwun (surrender) ahihna; tua Bn. ah Bogyi HZG in Adjutant semin Bogyi KCH in Quarter Master sem a hihna uh; amau in zong, ta-za-khaan bangin bawllo in, an limnono, zu lim nono pia in, muaizaa leh thopuan mah tawh VIP bangin limphatakin a bawluh hi. Athu aki sit zawhciangin U Ne Win in, Building Material (hardware) Corporation ah MD a piak ahi hi.

Siikkhau satpah
Kei zong tua thu ka zakphetin, Bu KCH siikkhau satpahin, ka vaikhak siauhhlua teng tawh Bu HZG zong hong tonpih in, apple kuang 5/6 bang hong vomhin a manlang theithei in ahong taisuk na ding ka vaikhak hi.

            Bu KCH leh Bu HZG te zong, 06-08-88 ni’n hong tungsuk hi. Tua hun laitakin gamsung buaina a suukmahmah laitak hi’n, khuasung khempeuhah sandahpiah aki om kawikawi laitak ahi hi. 07-08-88 ni’n MD pa zumah ka paipih pah hi.

Si leh hing kimu banglianguh
A zumkong ka suakuh, MD pa’n ahong galmuh phetin, lawmte gel ahih lamtak tellai ahih manin, a tutna panin hong dingkhia topahin, lawmte gel hong dawntuah in, si leh hing ki mukik mahmah bangin, hong kibawh hong ki kawi uhin hong ki kahphial uh hi. Aki muhtuungun, lungdam lua kisa un, pautheilo liangin a omuh hi. Tawlkhat zawh, aki khindaai khitzawh ciang un MD pa in aw nemtak mah tawhin;

Khai leh! gen dihvuau, na hong paina vai uh, ahong cihphet kei zong, keima tawi, lawmte hong laipuak teng lakhia in, Bo KCH ka pia hi. Aman MD pa a piasawn hi. MD pa in zong a hampi in a velzawh, a theihnop (facts) teng a telzawh ciangin, “bang gennuam nei vuam?,” ci’n a dotpah leh Bo KCH in, “MD pa aw, hih ka biakinn vai…….,” acih laitakin, “tua vaibel khawl phot………… (tuabel, genin nei nailo phot zezen ding, genkullo, hong pialua ding acih na),

NB:- Tua a biakinn vai uh bel, a fund ngahna uh aki cianin lak theipeuh le uh, a vekpi in apiak na ding a kamciam pah hi. Tuabang aa fund ngahna aki cih ciangin, thu haksa hi peuhmah lo, kua in donation bangzah pia cih bang aa ei deihna bangaa sazian bawl ding ahi lel hi.

MD’ cihnopna in, lawmte, bun (tel) zolo
Aman lawmte gel aa ding bang hihsak thei ding a hihna, amau aa ding bang deih ahih uh adot ciangin, lawmte in telpaklo in aki enlel uh hi. Ke’n, amau mitheek pia in, a inn lamna dinguh building materials a piakna dingin ka gensak leh, tuabangaa a piaktheihna ding aki samh, Drawing leh BQ a zing ciangin ama kiangah ka puakna dingun hong gen hi.

Keiman zaan thaipaai in
Ko zong, ciahpah vinghvengh in, aki samh Drg:leh BQ bawl ka ki pan pah hi. Tua nitaak an nelo bek hilo, zaanthapaai ihmu kilkello in semsuak pah ngeekngeekin, ka mansiang zawhciangin Engineer Licensed Endorse- bawlpah samsam zawh ciangin, lawmte gel zawnin sun 2:00pm MD pa kiang ah tung dingin ka paipih pah hi.

NB:- Tuabangaa BQ ka bawlna ah pilvaang takin, a pualam aa a manpha (building material hot items) teng ahi, Cement, Ms rod, GCI sheet, GI plain sht:, Wire nails, AC plain sht:, Hard, Jungle and, Teak wood etc. etc. te, pauklap hawih nono tawh a tam theithei in ka tuat ahi hi. Ka tuatna bangin hong ki pia hileh, lawmte gel nuntakna aki lamdang vat ding zahphial dongin aki kheel ding ahi hi.

08.08.88 aki ci in
A zingciang sun nai 2:00pm aki ci in, 08/08/88 (Siit lii-lungh) ni ahi hi. Tua zaanthapaai khuasungah mi phia kheokho in ki gamlum ngeiingaii hi. Tua ahih manin zingsang khuavak phetin kongzing citengah mi ki vak kheo kho hi. Khuasung mun khempeuhah mipi sandahpiah in aciangh aciangh ah ki awng ziahziah hi. Tua ahih manin, Bus car aa ki pan mawtaw peuhmah lampitung atung kha sunsun teng amun amun ah awkin a tanghciak gai hi. Tua ahih manin Taxi cihbel aki mu zo vetkei hi. Zingsang 10:00am aa ka ki patuh, 2:00pm in, MD pa zum ka tungzo mialmial uh hi.

Aki siammzo mahmahlo, lawmta tegel
MD pa zum ka tunuh leh a zum nasemte zong pawlkhat bek zum ana tungman uh ana hi hi. MD pa zong a mawtaw tawh lampi ah awk ahih manin hong pai nawnlo ding ahihna leh tuabang dan khuahun tawh a paitheih ding hun ki genthei nawnlo ahihna, a zum aate phone ana set hi. Tua nibang dan ta tawhin nisim in 18.09.88 ni, galkapte in aana a laakzawh ciangin aki dai pan ahi hi.

Tuabang zawh ciangin ih gambuppi in aki zaanpiik peek ahih bek tham lo ki ukna buppi (Administrative Mechanism) in ki songsaw-lawii gawp ahih manin, bangmah ki kankik theipak nawnlo hi. Tuazawh ka lawmte gel tawh zong aki mukik zo nawnlo, tuciang dong bek hikei, cikmah ciangaa aki mu kik nawnlo ding, hih thu piangte zong aki kumhkik thei nawnlo ding ka hita uh hi.

NB:- Atungaa sub-heading, Aki siammzo mahmahlo, lawmta tegel, aki cih hangin, amaute gelin a minpua, a lu-buukaa athuak (scape-goat) te bek uh hiaa, tua ii anung azui ding thupha (consequential blessings) in, BAG, Tedim bek hikei ei, ih Zogam leh ih Zomi buppi ii, aki pengg theilo aa ih noptuampih ding, ih Zomi paunak khatin, ”Hausa’ tell in tui kuang baan,” aki cih mahbang ahih lamtak ding, aki telloh khak ding alung himawh huai hi.

BAG, Tedimin khatvei hong samkik
BAG in sa ahong gawhzawh, kum 4 ding zawhciangin khatvei mah ka innkuanun khua aa ciah ding Tedimah ka taam laitakun, BAG Pawlpi upa khat in, hunkhat lai aa ka Biakinn lim suaihsak lam ki panzo uh ahih na; a etsak dingin hongsam leuleu hi. Kei zong keima khutma tawh ki sai ahih manin a zui dingin a lawpbek hikeng, zong ka ki paaklai hi.

Ka khasiat suak
Kei zong ka va zuipah hi. Aphual ka tunuh ciangin, ka lim suaihsaksa copy khat la in a sep nasa acihte uh ka va check leh, amau amau thu in nana lopthop bawl, nana hihgawpin, drawing tawh ki check thei vetlo hi. Agen uh ciangin, drawing acih khempeuh uh hangin, a sep uh ciangin tua a drawing cihuh et in neivet lo in, amau atheih ngeisa, amuh ngeisa, ahih ngeisasa khat tawh ahih veve uh ahi lel ana hi hi.

Tuabeek hilo, ahong khaakuh contour lines tawh ki zuiin, Biakinnpi a mun asan theihbel na dingin, lam lianpi khampna (gradient) tawh aki naih theitheih na dingin ka geel hiaa, a galpanin aki et ciangin galvawngin a et lawm mahmah ding kimlai, aki hihtaktak ciangin, lamlianpi level panin inn dawlkhat ai taang ding bang nana niamsuk ahih manin, a galvawng gengen loh, agaal panin BAG, Tedim biakinnpi a kawmlak ah zonzon in omlai hi. Tua hiaa, ka ngaihsut ciangin ka khasiat a suakbek hikei, ka kah bang a suaklai hi.

Kei, thupi takaa hong ki sam, hehsa leh hangsa in ka ciahsan ngawh hi. Hihbangaa ka hihna in, ka hihna sate khempeuh hangaa keimah leh kei mah ka ki piak ka ngahsa mat (credit) teng khempeuh a buaksuah kiuhkeuh bang danin ka ki ngaihsun aa, ka lungbang anuam kei hi. Aki pattuungaa, ka lunggulh, ka lamet, ka tupna, ka ngimna leh ka lawpna teng khempeuh, seh-nel lakaa tui ih buakbang in ka mansuah kiuh-keuh ta hi.

Thu khuphna
Hihbang nasepna in, BAG, Tedim biakinn lamhna ciang bangbek tawh a ngaihsun hi lehang, a thupitna a omkei mah hi. Ahi zongin athuk leh azai zawkaan lai in tua tawh ki sai aa thupiangte thuukkan in abaan abaanin ngaihsun zomlai lehang, BAG thu bek hikei, Leitung thu aa ki pan thu tuam tuam tampitakte ah, Tedim, ih Zogam leh AG taangthu aa dingin thu ciapteh huai tampi tak ki muthei hi. Tuate in;

(a). Rev. Hau Lian Kham
Amahin bangci mi cih ki kumh masa dih ning!. Amah in, hihbang vai pi leh vai lianpi a phuangkhia pa ahi hi. Tuabangaa ahih theihna dingin, Zogam bek hilo, Kawlgam buppi ah, Christian Pawlpi aki cikhempeuh lakah, khanlawhthakna meikuang (Rivival torch) sangin dee aa atai masa penpen pa ahi hi.

Hihbang ahihna in, mihingte utthu, hanciam zawh thubang tawh aki hih zo ding, a piangzo ding thu ahi kei hi. Pasian sathau nilh ahih man ahi hi. Tua bang ka cihtheihna in, anuai aa thute ngaihsun lehang;

(i). Khatvei, ih Zomite lakah Pasian tawh kisai in, thu leh la ah aki vaa aa a innteek mahmah ahi, Rev. Tun Za Kap (late) tawh ka holimna khatuh ah, hih khanlawhna in, Pasian telte bekmah ciangin hong kuang aa hong ki lawhzo pan hiding in a upna; tuabang a cihtheih na in, amau mahmah in khanlawhna aki ci, 1950- kumpek in taangko niloh uh ahih na; tuabangaa a hihlai un bangmah piangzolo ahih hangin, tuazawh kum 20 val, Sia Hau Lian Kham ahong khanciang bekin, ki lawhziahziah zo pan ahihna ahong genngei hi.

(ii). Kawlgam sungaa AG upna ah mi masa penpente in, U Myo Chit, U Tin Mg Tun, U Aung Hla te unau ahi uh hi. U Tin Mg Tun hong gen ngeina ah, amau unauteng mahin 1950-huamlai peka kipan Gospel akici, lungdamna thu khanlawhna a taangko masa pente uh ahih na uh hong genngei hi.

U Tin Mg Tun bang, hunhawih laipekin, Aero Mechanics, Aircraft Engineer, nasep hawihmah mahkhat asem ahi hi. Ahi zongin, tuabang nasep nusia liangin lungdamna thu (Gospel) taangko ding ana ki panuhahihna hong genngei hi.

1963-66- kum, GTI, Insein ah ka sangkah lai inah, kumsimin Christmas naiikuan peuh leh, U Myo Chit in amau innmai, Insein, Mingyi Rd khaktanh liangin Stage lamhin, nitak simin Crusade bawlin lungdamnathu (khanlawhna) aki taangko na ah, kei zong kava ngaingei hi. Tualai in U Myo Chit aki cici in, tulai aa ih U Myo Chit pi ana hi gige thong hi.

Khatvei, U Myo Chit Singapore ahong pai lai in nuampha takin ka holimna uh ah, amah hun hawihlai in, Engineer ahihna, 1950- huampawl in Insein GTI sangah Demonstrator hi’n, tualai aa, manglai aa curriculum teng, Kawllai in a letkhiapa ahihna hong gen hi.

Keizong, ka thugen uh hong ki zomthei ahih manin, 1963-66 kum in GTI sangkahngei kahihna; a Crusade ah zong paingei ka hihna ka gen leh, alung hong dam mahmahin, a maibang hong taangpamh liang a hih lamtak ka heemmuh giau hi.

U Aung Hla tawh personal in ka ki theihkei uh hangin, ke’n bel ama thu leh a movement up to date in ka tel mahmah hi. Amah bel, gammial avei mahmah khat ahi hi. Amah gamdang zong tawh ki zomin, a ngah sunsunte gammial aa dingin a zangkhia pahpah khat ahi hi.

1970- kum huam dingin ah, Rakhine State ahi, Taungkoh, Ann, Mee-pong leh Zogam panin ah Paletwa gam, khuano citengah, azu ahaam thuakin, guahzu meikai nuai ah, zin leh vaakin gammialna sem in kha tampipi gamsungah aki manggthang bawl liang ahihna ka zangei hi. A tunna peuhaa a cimawh a zawngkhal a genhthei te maan zaihin gamdang ah huhna ngenliang hi, kici hi.

 Hibang unaute in a nuntakna uh ki buppiakaa a sep nangawnuh zong, Kawlgam sungah khanlawhna in, a kuangkimh zongeilo, mit dingin a phe-leplep huih mut khuaimei bang ahi hi.

Leitungaa khanlawhna in, 19-20 kum zalom lai in nitumna lampanin hong ki pan ahi hi. Tuazawh kum 200 bang ding ciang, 1970- kumin tua khanlawhna mei-eek khat ahong leng viau-viau, Kawlgam nitumna sak lam, gamsimthamh na mun, Bethlem bangaa khua neuno khat hong tuu vinghvengh ahi hi.

Tua ahong tukna, lei pianma pekaa aki sehsa, Hau Lian Kham a kici khangno khat tung hong tuu in, tua pa in, Pasian gelna bang tawhin na na sangthei pah bek thamloh, ana sem zom paisuak theipah hi. Tua ahih manin, akhang akhang aa ki lawhaa a kuangzo ngeilo, khanlawhna Rev. Hau Lian Kham huntak ciangin hong kuangpha mahmah in, tu in tua in Kawlgam buppi lawhin akuang ahi ta hi.

(b). Rev. Khai Khan Suan
Amah, Rev. Hau Lian Kham’ pattah hi’n, Pawlu leh Timothy bangdan ahi uh hi. Rev. Hau Lian Kham a om nawnloh ciangin ama mun lathei pahlian. ahih manin, Leitungah, hih upna ah, a siapa ii gamh a luahthei pahsuak hi. Tua ahih manin, Rev Khai Khan Suanin zong hih khanlawhna meidet saang theipahin, asaang lapto aa a taipih zompa khat bangin aki ciamteh zo ahi hi.

(c). Rev. Gin Za Lian
Rev. Khai Khan Suanin, Kawlpi ah tavuan ala dingin apiat ciangin, BAG, Tedimaa ama mabaan teng Rev. Gin Za Lianin tavuan ala hi.

(d). Bo Kam Cin Hangin
Bupa in, Zomi lakah apil masa pawl ahihna zahkhat in, galkapbu masa pawl zong ana hi hi. Amah in Pasian a it mahmah na hangin, a minam zong a it phadiak pa khat ahi hi. Atua cihbek hikei, a mabaan peuhpeuh ah phinhciil kuhkal tenhtanhin, thumaan thutakin citakna tawh akhuasa tawntung khat zong ahi lailai hi.

(e). Bu Hau Za Gin
Amah zong Zomite lakaa mipil masa, khuamu masa ana hih zahkhat in, galkapbu masa pawl mah zong ana hi hi. Pasian a itna tungtawnin a minam a itpa ahih baanah, cihtakna tawh a thumaan kip let tenhtanhaa ana khuasa mah ahi hi.

(f). A lamdang sakhuai, Bute gel
Atungaa Zomi bute gelin, amau hii-nate ki gengenaa aki zuaktawwmte bang hilo in, tuabang a hii-na uh tungtawnin midangte in akaan vinghvengh zawkna in, minamdangte tawh ih ki batlohna, ih tuampian diakna aki langh sakte uh ahi hi. Nidang laiaa minam dangte’n, Zomite ahong ki phatna leh a hong pahtaaknate in, hihbangte hang ana hi gige hi.

(g). Bu Kam Cin Hang leh Bu Hau Za Ginte tungtawnin, ulian mahmah MD pa ih thei aa, ama tungtawnin, hunkhat laia aa Kawlgam sungaa aana lian mahmah, U Ne Win thu zong theihbehna in ih nei hi. Tua baanah, hun khat laiaa Kawlgam Naingngaanzee, Alanni Conmunist te thu zong, theih khak na in ih nei hi. MD pa bangin hong genkha zenzen lo hileh, ih bute gel in amau leh amau ki genlo aa, hihbang ahii-na uh leitung tawh a mangg cipkhawm ding ahi tazen liang hi. Alamdan dan….

(h). 08.08.88

Hih ni in, Kawlgam bek hilo, Leitung buppi aa thuthang mahmah hiaa, Kawlgam sungaa kum (26) sung galkap aanna nuai pan aa suahtakna dingaa buaina a suuk mahmah pen ni ahi hi. Hih BAG, Tedim vai leh hihni tawh a ki tuak sese zong alamdang mahmah khat aa ciapteh huai thu ahi hi. BAG, Tedim biakinn lamna ding tawh ki sai, atungaa thute khempeuh ki theihna in ki neituam ahih manin, thu neu ahihloh lamtak aki theihloh khak ding leh aki theih mah leh zong aki manggngilh khakloh ding lung hih mawh huaisa in, hamhtanghpi in ahong at ka hi hi.
  • Blogger Comments
  • Facebook Comments

0 comments:

Post a Comment

Item Reviewed: Bethel Assembly of God, Tedim biakinn tawh kisai thu Aki mangngilh (theihloh) khakding. Agelh ~ Pu Pau Za Mung Description: Rating: 5 Reviewed By: cinpuzomi
Scroll to Top