728x90 AdSpace

Hot
Menu
Zon-ol na Donate

Latest News

I SUNGLAM HONG NIINSAK THEITE. Agelh ~ GSPau

I SUNGLAM HONG NIINSAK THEITE.
Agelh ~ GSPau


1.         Mawhna ipna
            Pasian leh mawhna omkhawm theilo hi. Mi pawlkhat in zu dawn gegu napi, dawn ke'ng, kici hi. Khaini muam gegu napi, muam ke'ng, kici hi. Sumvai ah kizuau napi, zuau ke'ng, kici hi. Hih pen Pasian a khem lah ihi a, eimah leh eimah kikhem zong ihi hi (1Jn.1:8). Hih mawhnate in Pasian tawh hong kikhensak hi (Isa.59:2). Mawhna i ip ciangin Pasian in i thungetnate hong dawng lo hi (Late 66:18). Innkuan sung kicidam theilo a, kidaupai theilo hi. Ni simin kilunggim den hi.
           
I mawhnate im se lo-in,  Pasian tungah pulakin thum zaw le'ng, Pasian pen hehpihna tawh kidim ahih manin amah in mawhmaina hong pia ding a, amah tawh i kilemkik ding hi (1Jn.1:9). Tua ciangin i ci hong dam ding a, i dau hong pai ding hi.


2.         Mawhna maisak zawhlohna
            George Herbert in, "Midangte' mawhna a maisak zolote ama' tot ding lei (bridge) a sattat tawh kibang hi," ci-in gen hi. A cidam thei ngiatlo mi pawlkhat pen midangte' mawhna a maisak loh man uh na hi thei hi. Midangte' mawhna i maisak loh ciangin i kha keu a, kimaigum hi. Pasian' minphat khawng nuam kisa lo hi. I ankam hong lim lo-in, nuam takin zong ki-ihmu theilo hi. A tawpna ah lungtang natna, sikhang natna, gilpi natna leh zunkhum natna cihte kingah lawh thei hi.
             
Pasian' naseem tata, a khami tata, thusuak nei tata in midangte' mawhna kimaisak zo hetlo thei hi. Mite' mawhna ciamtehin kithukkik nuam thei hi. Tua in i sunglam niinsak a, i khalam nuntakna keusak hi.
           
Topa in ei' mawhna hong maisak mah bangin e'n zong ei hong khem mite' mawhna, leiba hong loh nuamlote' mawhna, ei hong haza mite' mawhna, ei hong bawlsiate' mawhna, i maa hong khaksak mite' mawhna a maisak dingin Topa in hong deih hi (Efe.4:32; Kol.3:13).

3.         Kiphatsakna
            William Barclay in, "Kiphatsakna pen mawhna dangte' pian'na nu leh pa hi," ci-in gen hi. John Flaval in, "Amah leh amah a kitelcian mite kiphasak ngeilo hi," ci leuleu hi. Kiphatsakna pen ei leh ei i kitellohna pan hong kipan thei hi. Kiphatsakna in pukna piangsak hi (Pau.16:18). Mikhat hong kiphatsak nak leh puk tawh hong kizom thei hi.
           
Mihingte pen i daupai pian teh, i nopsak pian teh, i lawhcin' pian teh, Topa in hong zat pian teh, mite'n Topa min tawh hong thupi bawl pian uh teh i sungah kiphasakna hong kipan thei hi. Hihte pen Topa' thupha ahih lam kiphawk kha lo-in, eima' pil man, eima' siam man, eima' hanciam zawh man, eima' ginat man, leh eima' kaamphat man peuh kisa kha thei hi. Tuate panin pukna piang thei hi.
           
Hun khat lai-in Pasian' mizat pen 7 (Top seven) sungah a kihel Jim Baker zong hong kiphasak kha ahih manin a lawhcin' laitak, a minthan' laitak mahin hong kipuk a, thong sung nangawn hong tung hi. 
           
Tua ahih manin i pilna, i hauhna, i lawhcin'na, i meelhoihna cihte kiphatsakpih kha kei ni. I kiphatsakpih khak leh a neipa in hong lakik ziau kha thei ding hi.

4.         Hazatna
            Hazatna pen sunglam keekseuna hi a, a nungah muhdahna in zui den hi. Hazatna pen guh muatsak natna hoihlo ahi hi (Pau. 14:30).
           
Saul kumpipa leh Davidte galsimna pan hong ciah uh ciangin mipite in na dawn uh a, "Saul in a tulin that, David in a tul sawmin that," ci-in hong awng ziahziah uh hi (1Sam.18:7). Mite in Saul sangin David pakta zaw uh cih Saul in a theih ciangin David hong haza hi. Topa Kha in Saul nusia a, a sungah khanin hong lut hi. Tua ciangin Saul in David hong tang mudah mikmek a, thah hong sawm mawk hi.
             
Ei sangin a pilzaw, a hauzaw, a lawhcing zaw, a khangtozaw, mite' pahtak zawk khatpeuh hong om ciangin kihaza thei hi. Ei  i lawhcin' teh i kiphasak a, midangte a lawhcin' uh teh i haza hi. Tua bang hun ciangin Saul kumpipa mah bangin i sungah khaniin hong lut thei hi. I sunglam hong keekseu-in, Topa tawh i kizopna hong maan nawnlo hi. I omzia leh i nasepziate hong maan thei nawnlo ding a, sep ding a kilawmlote vive kiseem kha ding hi. A tawpna ah Saul kumpi mah bangin a mi mahmah thahnopna lungsim nangawn kinei thei lai ding hi.
           
Tua ahih manin i sungah hazatna lutsak kha kei ni. Hong lut khit leh zong manlang takin paaikhia mengmeng ni.

5.         Muhdahna
            Muhdahna pen mithahna ahi hi (1Jn.3:15). Muhdahna in i sunglam meima sak a, Kha Siangtho nasepna zong dal thei hi. Khatvei Billy Graham in khua khatah crusade bawl hi. Mikhat in, "Hih pa pen leitung bup ah mi khemin a vak kawikawi khat hi. A thugen um kei un," ci-in kiko hi.  Billy zong heh a, tua pa mudah hi. Tua ni-in Kha Siangtho in naseem lo pah a,  a crusade lawhcing lo pah hi. Zan tawntung ihmu theilo hi. Satan in ciangkang bangin tua pa zangin amah a sat ahihna a tel ciangin tua pa a muhdahna teng bei a, itkik thei hi. 
           
Satan in i makaite leh i lawm-itte peuh zangin eite hong sat thei hi. Tua bang hun ciangin a mi kimudah kha thei hi. Eite' muhdah ding pen a mi hi lo-in, a nung-a naseem Satan ding hizaw hi.
           
Pasian' naseemte sungah a hang omlo pi-in mi khatpeuh a tang muhdah mikmek om thei mahmah hi. A muhdah mite in a maitai uh ciangin mudah semsem thei lai uh hi. Tua pen khaniin' nasepna hi a,  tua in sunglam hong niinsak hi.  Tua ahih manin kimuhdah khempeuh paaikhia ni (Efe.4:31). 
  • Blogger Comments
  • Facebook Comments

0 comments:

Post a Comment

Item Reviewed: I SUNGLAM HONG NIINSAK THEITE. Agelh ~ GSPau Description: Rating: 5 Reviewed By: cinpuzomi
Scroll to Top