728x90 AdSpace

Hot
Menu
Zon-ol na Donate

Latest News

INNNUAI A VOKPI. Agelh ~ Khoi Lam Thang

INNNUAI A VOKPI.
Agelh ~ Khoi Lam Thang


Nulepa (Sex) thu ah "Guk nek limzaw" c'in ciamnuih bawl in, a phengtat mi pawlkhat om thei hi. Khat vei, tangval khat nitak a zawlhelna ah nungakte tawh kikhawlh khengval lua in zehpih kha hi. (Cihnopna thei pah ni mataw). Tua thu kua ma'n theilo napi "Ui misinek kisungsia" a cih bangin patau in ihmu theilo hi. Zingciang zingsang innkuan bup in pialkhang ah vaimim ciim kuangpi tawh lui in anne a ki-um liiliai laitak, tangval pa hong paukhia kha a
            "A gai nam ka ci ve"
acih leh thumong thei lo a innkuante'n lamdangsa uh hi. A dawng pak zawsawn ding om lo khat le khat ki-et pampam laitak a pa in,
            "Kua maw"
ci in dong kik hi. Tangval pa'n zong;
            "Inn nuai a vokpi"
na ci ziau man bilbel hi. Khuak manlang zong a phattuamna om veve ci ni. Ahih hangin khanglui te'n "Zuau in a khap tawn" ci hi. Midangte na khem zo zongin Pasian le nang le nang na kikhem zo ngei kei ding hi. Na kam in "Kei hi keng, kei hi keng" a cihcih laitak in na lungsim in "Na hi mah vele, na hi mah vele" na cici ding hi.


Nulepa thu ah na phengtat leh a nunggu thuakzolo ding hi teh. Tu tawm a hong tung pah "Pasan sialnek a bang" gu pawlkhat om a, khantawn khangtawn a kikhom gu zong om hi. Midangte bawl in kisia zolo a, ei le ei bawl in kisia zo bek hi ki ci hi.

Tulai gamdang pai (Khualzin) te hong ciah ciangun medical check-up bawl ding kul leh kilawm pianpian ta hi. Nang le nang tungah citak inla, na lawmngaih tungah thuman in. Na zi na pasal palngulh kei in. Tua in Pasian tunga cihtakna zong hipah hi. Mi thumanlote Pasian mai le siavuante' mai ah "Inn nuai a vokpi" in hong hon zolo ding hi. Rev. Pumzathang in "Pasian bawlsa a set hoih hi; sinna in zang kha kei in" ci hi. Leitung thupha vantung thupha kitaan thei hi. Pasian thupha na lamet leh Pasian hong piaksa thupha thupi sim in.

Source :
"SIHNA IN HONG KHEN MATENG" Laibu.

Laigelh Siapa in Zomi eLibrary/Laibusaal ading in Phalna ahong piak ahi hi.
  • Blogger Comments
  • Facebook Comments

0 comments:

Post a Comment

Item Reviewed: INNNUAI A VOKPI. Agelh ~ Khoi Lam Thang Description: Rating: 5 Reviewed By: cinpuzomi
Scroll to Top