728x90 AdSpace

Hot
Menu
Zon-ol na Donate

Latest News

ITNA SUNGAH PILNA. Agelh ~ Niang Lam Hau

ITNA SUNGAH PILNA.
Agelh ~ Niang Lam Hau



Thupatna
Kaneulai aa kipan ka mangngilh theihloh ka lungsim hong phawngkhaden la-ngaih mahmah khat pen banghiam cihleh “It lehang amel ahoih, mudah leng amel asia; phal lehang piak ding om a, phalkei leng piak ding omlo; painuam leng naicik hi a, ut keileng lah gamlapi; ki-itna in khum pen a, muhdahna in kha in kha” cih ahi hi. Hih la in Zomite nuntakziateng hong bullot kasa a, Itna neitaktak peuh lehang i melte hoihsemsem in, i nuntakziate khuaizu bangin khum-semsem ding ahihlam hong phawkpha semsem sak hi. Tua ahih manin “Itna sungah Pilna” cih thulu hong sungkhia ka hi hi.

Pilna cihthu i gen ciangin namtampi om ding hi. Pianpih pilna, Sintawm pilna cih bangin namtuamtuam om hi. Ahizongin hih thulu sungah ka bulgennop pen in, ITNA tawh kizom pilna a gennuam ka hi hi. Itna tawh kizom pilna aom mah bangin, itna tawh kizomlo pilna zong na om ahihna thu a kibulkupnuam i hi hi.

Itna Tawh Kizom Pilna: 
Zomite’ tangthu sung i ettak ciangin itna tawh kizom pilna tampi i muthei hi. I pu i pate leitung pilna sangpipi na neilo uh hi. Ahizongin nopna dahna-ah, thu leh la khat peuhpeuh a vaihawm uh ciangin Itna bulphuh in na vaihawm uh ahih manin tua sungah pilna tampi na kihel mawk hi. Zu-ahawm sa-ahawm uh ciangin na mawkhawmlo uh hi. Itna bulphuh in pilna tawh nahawm uh hi. I paunak leh i la-kamte i ettak ciangin pilna vive na himawk hi. Hih thute i et ciangin Zomite pen Itna bulphuh in pilnanei minam i hihna kilang hi. Itna tawh kizom pilna anei minam i hi hi.

Itna Tawh A Kizomlo Pilna 
Tuhun ciangin leitungah pilna siamna khangto tektek a, mite ni leh kha, aksite tung nangawnah khualvazinta uh hi. Khantohna nasia mahmah napi-in gal leh sa tamsemsem a, buaina ani ani in khangsemsem hi. Mite in pilna neilomaw cileng, pillua kisa-in, a khengval nahizawsop hi. Banghangin leitungah mipil tamsemsem a, kikhualna tawmsemsem hiam ci-in i ngaihsuttak ciangin, itna tawh kizomlo pilna ahih man ahi hi. Tua pilna in angsung pilna, huaiham pilna, guktaak pilna, cihte pawl ahih man ahi hi. Itna tawh kizomlo pilna khangsemsem leh I leitung nuntakna dahhuai semsem ding a, vangam maleepna mun hilo-in hellgam maleepna gam hong suak ding hi.

Zopil Lia Leh Taang 
I pu i pa te’n Itna bulphuh in na nungta uh ahih manin, khatlekhat tungah citakin, thuman uh a, thulela tawh na nungta uh hi. Tua ahih manin i minam kiciaptehna dingin “Vaphual” lim nateel uh hi. Vaphual pen a melhoihna hang, a thahatna hang hilo in, “Nupa” thu-ah Itna tawh citakin a nungta vasanam ahih manin, Zomite kiciaptehna dingin a nateel uh ahi hi. Tua mah bangin “nupa” thu-ah citakin ki-it mahmah uh a, teekkun vuaikun in kitulpih uh hi. Cihtakna tawh ki-it uh ahih manin nupa kikalah haigamtatna cihbang omloin, pilgamtatna tawh nungta uh hi. Tua in itna sungah pilnalianpen pen ahi hi.

Tuhun khangnote i nuntakzia ki-enkikdih ni. Leitung pilna degree tampipi i ngah a, tuate pilna taktak mah ahi hiam? Nupa thu ah i citak hiam? Nungakte in i lawmngaih tangvalpa tungah i citak i thuman hiam? Tangvalte in i lawmngaih nungaknu tungah thu manin i citak hiam? Ipu i pate Christian zong hilo napi, Christian nuntaakzia tampi na neikhin uh a, Itna bulphuh in na nungta uh ahih manin nuntakna sungah pilna tampi tawh na nungta uh hi. Zomi Christian lia leh taang te i pilna i siamna khempeuh pen Itna tawh kizom pilna ahihna dingin hanciam ciat ni. Tua hileh Zopil lia leh taang te hithei pan ding hihang.

Nupa Ki-itna
Gamdang ah sangkah in ka omtak ciangin namdang nupate kihozia leh kimakaihzia tampi ka mukhia a, amaute ki-itzia ka muh ciangin noptuak kasa mahmah a, ettehhuai kasa hi. A paina peuh uh ah kikhawlin kizuihialhial uh a, Nupa kitengkhinsa hinapi-in lawm kingaicil mah bang hialhiallai uh hi. Nopna-dahna-ah a nupa un paikawm uh a, khatguak tangpai vauvau cihbang omkhollo hi. Tua bangin paina ding munkhat peuhpeuh aom ciangin zong a nupa un keitawh kisaikei hong zuidahning ci-in kinialnialselo uh hi. Khatlekhat thu kimang diamdiam uh a, paikhawm liailiai uh hi. Market/Mall i pai ciangin a zi/a pasal khat peuhpeuh i muh aleh a khatzong agei-ah na om hamtang hi. Tua bangin nuntak hunnuam zangkhawm hialhial uh hi.

Khai leh! Zomi “Nupa”te nuntaakzia enkikdih ni. Nungak tangval hun lai-in guahzu meikai nuai-ah, asuk ato-ah kizuizui napi-in, kiteenkhitteh a kimidang hopahte i hikha hiam? I kiteenkhitteh i nungak i tangval laimah bangin kikhawlhialhial leng khialhna om ding maw? Pawlkhatte leuleu a nungak a tangval laimah in zong a ngaih taktakte kawingamlo, a ngaihkhollohteng bankawikawi, Zo ngeina cipongmawk hihang. Tua bangdan ngeina cihcih dinghun zong hi kasa nawnkei hi. Tua ahih manin Nupa kikalah Itna sungah pilna bucing hong om theihna dingin i nungak i tangval laimah in, i it i ngaihte mah tawh kikhawlin, i kiteenkhit ciangin zong i nungak i tangval laimah bangin, guahzu-meikainuai mahah, asuk-ato mahah kikhawlin, i kizuihliailiai ding pen thupi kasa mahmah hi. Tua pen i Christain nuntakzia zong hong hiding hi.

Nupa kizopna leh kihozia, itna kilah cihte pen nakpitakin thupi kasa mahmah hi. Hih thu ah numeite’ dinmun a thupi’zia bulphuh in lungngaikhawm ding hihang. Leitungah thuthuk ngaihsun pilna neite’n, “Leitungah numei om kei leh kahna le hagawina om ding hi” ciin na gen uh hi. Man kasa mahmah hi. Innkuan sungah i Pate a ci uh naleh Nu aw…Nu …aw..mah cilai veve uh hi. Tua bekthamloin i Nu te vakpakna khat neileh uh zong, i omdannuamlo a, kikhuadakdak hi. Pate bangin na Nu-uh koi ah pai hiam cihamtangse hi. H. Benson in “Leitung a galkap hangsan te sangin ‘NU HOIH’ manpha zaw hi” ci hi. Lai Siangtho sungah zong Numei thupi’ na nalim gen mahmah hi. Pasal pil cihthu kigenlo a, Numeipil in cihthu kilimgen mahmah mawk hi. Tua ahih manin Ei numeite leitung pilna sangpipi, degree tampipi neitase keilengzong, Itna bulphuh in pilna i neih ding thupi hi. Tua pilna in bang hiam “Pasian kihtakna in Pilna kipatna hi”. Nupate in Pasian kihtakna in, Itna tawh kizom pilna i neihzawh ciatna dingin hanciam ding hihang. Tua in Christian innkuannuam hong piangsak ding hi.

Philippines ah Union Theological Seminary  D.Min coordinator a hi Dr. Dennis Shu Maung a zi Mrs Par Thluai pen  Pasian piak pilna azangsiam nupikhat ahi hi. Kamkhum leh kamnem bek tawh mi hopih zoden ahih manin lenglakhawl mahmah hi. A pasal tungah zong thupha bekmah gennopbel in nei-in hopihsiam ahih manin a pasal in it mahmah hi. A nupa un ki-it mahmah uh ahih manin lenglate in zong nuamsa mahmah hi. Innsung nopna ding pen nute tawh kisai mahmah hi. Numeipil omna innkuan sungpen nuamhamtang hi. Innkuan nuntak anuam cihpen Numeite khutsungah omzaw hi. Paunak khat ah “Nauluai alen Nute’ khut in leitungbup uk hi” na ciliang hi. Nute bang zahin thupi a, numeite bangzahtakin thupi i hi hiam! Lai Siangtho sungah numeite’ thu tawm enlai dih ni.

Pilna A Zangsiamlo Zihai
Pilna a zangsiamlo zihaithu gen masa dih ni. Piancilna 19 sungah “Sodom leh Gomorrah a Siatna” thu i muthei hi. Tu in Sodom khuapi ninlua ahih manin Topa in haltum dingin a vantung mite hopih hi. Ahizongin Topa in Lot it in honkhianuam ahih manin abeh, aphung leh amakte kiangah gentheihna ding hun pialai hi. Tua khit ciangin Pasian in Sodom leh Gomorrah khua kaat leh meikuang tawh hal hi. Lotte innkuan zong khua pan taikhia hinapi-in, Lot’ zi nunghei a, a mah cikhuamsuakin a nuntakna suplawh hi.

Hih nupa thu i lungngaih ciangin i phawkthak thutampi om hi. Topa lamlahna zuizolo ahih manin Lot zi nunghei-in sihlawh hi. Innkuan sungah pa pen Pasianthu lamah thahat mahmah in innkuansung makaih mah lehzong zipilloin a hihleh innkuansung siatna leh lungkhamna ding hong tu’npih den hi. Hih bang innkuan pen pilna azangsiamlo zihai omna innsung hi cih a gennuam i hi hi.

Hih tawh kisai-in India (Calcutta Bible College) ka sangkah lai-in pilna lam ah hong deihsak mahmah ahi ka Principal nupate’ thu khat ka ipzawhloh omcitciat hi. Chapel service leh Vesper service ciangin sangnaupangte in makai, hunzang, thungetna-ah mawhpuak (tavuan) ka neizel uh hi. Hih bangte-ah pulpit panin sepna, genna, pauna a tuamtuamte ama lungsim tawh a kituah keileh a zi -in a tutna pan hong otsan ahih keileh hun mantakteh mipimai-ah hong taithei ziaumawk hi. Tua bangdan ahih manin sangnaupangte in ka mudahthei mahmah uh a, ahizongin a pasal in a zi’haina liah, gum den ahih manin a zi-in thunei mahmah zel hi.

Efesa 5:23- “Zite’ lutang in pasal ahi hi” ci-in Pawl in gelh hi. Lutang leh pumpi pen a tawntungin kizomden ahih manin, zi leh pasal i cihzong tua bang ding nahizaw hi. Lot’ zi ahihleh a pasal tawh nisim in kalsuankhawm den ding hinapi-in, Lot sangin kalkhat zekaizaw in a paitakteh ze-etna sungah lutkha in cikhuampisuakin a nuntakna sihlawh hi. A pasal Lot tawh kibangin kalsuanleh Lot in a zi- itnatawh kemding ahih manin siatna-ah tunglo khading hi. Ka nunglamen pakning ci’n Lot adong hileh phallo ding hi. Ahizongin a pasal’ theihlohin a gamtatsim manin a innsungah dahna lianpi tung hi.

Tuhun in “zi” in pasal pen lutang in a koihtakpi hiam? Lot’ zi bangin a nunglam a enkik zi-in ahihleh innsungah siatna, lungkhamna, kitotna leh kiselna bek hong tunpih ding ahi hi. I Zo paunak ah “Suumkuang in a likhuat, Numei in a makhual” kici hi. Suumkuang leh numei a kibang zahphial in genkak kasa aa, thupi kasa peuhmah hi. Suumkuang bangin lungduai, lungsau, nasepna -ah gimlua cih omngeilo, damdamin a sem paisuakzo, ngimna leh tupna dong a tungzo, guallelngeilo numei picing cihna ahi hi. Numeite in zong Suumkuang bangin ngimna lianpinei-in i innkuansung makaih zawhding nakpi-in thupi kasa hi.

I Christian nuntakna-ah zong Topa tawh tonkhop ding thupipen hi. Christian nung lehpai cih omngeilo aa, kimaikahzaw hi. Tua bang mahin nungheilo, nungkiklo in mainawt in Topa khutlen kawmsa in i kalsuan leh haksatna pan in i suaktazo bek ding hi. I Upna panin tawtonloin a maikah dingte i  hi hi. I Topa mah lianbel sak ni. Christian nuntakna-ah zong Lot’zi bangin i nunghei khak leh meeikuangpi sung atung ding i hi hi.

Pilna A Zangsiam Zipil 
A nihna ah pilna a zang iam zipil tawh genteh ding hihang. I Sam. 25 sungah “Nabal leh a zi Abigail” thu i mu thei hi. Nabal pen ganhing tampi a nei mihau mahmah khat hi-in Maon khua-ah teng uh hi. A zi Abigail pen numeihoih leh teimahmah athuah khat hi a, a pasal Nabal ahihleh a ki-uk zolo naupang bang lungsim anei mikhat ahi hi. David in huhna ngen dingin a tangvalte a sawl ciangin Nabal in “David in kua hi a, ka neihsa anletui ka theihloh mipa tungah piading ka hi hiam?” ci-in dawngkik hi.

Tua ciangin David heh ahih manin a tangval mihing aza a sim bang tawh kithawi-in Nabal ado dingin hong kuan uh hi. Hih thu Abigail in a theih ciangin anletui letsong pawlkhat tawh hong kithawi a David tawh kimu dingin a tangvalte mah tawh hong kuankhia hi. Abigail in a galmuh ciangin Laa tung panin tuak a David mai-ah bok in thuum hi. Tua ciangin David in Abigail maipha pia a, “Hong pailo hile ci’n, zing ciangin Nabal khutsung pan pasal khatzong hinglo ding hi,” ci hi. Zingsang ciangin Nabal’a zukham aven ciangin a zi-in hih thuteng a kicingin a pasal tungah genkik hi.Hih tangthu i lungngaih tak ciangin zipil a manphatna tampi i muthei hi. 

Abigail ahihleh pil ahih manin galte khutsung pan a pasal suakta sak hi. Kamnem tawh galte zo hi. A pasal suahtakna ding ahih nakleh galte ading piakkhiatna-ah neihsa bangmah itlo hi. ‘Gal’ cih pen a sihkhit masiah uh zum leh hiam tawh i do ding hinapi-in, Abigail in pilna tawh na do in zomawk hi. Nabal sihna ding munah a ma nuntakna kikhamngam zahdongin a lawmpa tungah itna lakzen hi. Topa a zahtaak leh a it numei hi aa, kamkhum takin galte’ mai ah vathum in akun takteh Topa in a galte’ maipha na ngahsak hi. Itna kip neileng launa omlo hi. (I John 4:18).

Abigail bangin a pasal adingin a singam Zomi nupi tampi mah ki-om dingin ka um hi. Numeite’ kammal, thugen pen nakpi-in vangnei hi. Pasalte lungsim leh ngaihsutna kikhelsak zomawk hi. Numei pil (Abigail) in lampiman tawn ahih manin a pasal hainate liahzo hi. Pasalte’ thanemna munah numeite in pilna zatsiam ding thupi hi. Tua hileh innkuansungah thusia cihbang piang ngeilo ding hi. 

India (Carey Baptish Church, Calcutta) ah Pastor a sem ngei Pastor Andrew a zi pen pawlpi sungah (minister) khasum sang ahih loh hangin ahihtheih zahin pawlpi-ah panpih mahmah hi. Sunday school leh Youth lamah a pilna leh siamnate siitloin nakpi takin a pasal’ nasephuh hi. Pastorpa a omlohteh amah pen hunzang khawngin hong dinglel hi. Ama hih theihna bangbangin a pasal nasep panpih in, ama omloh hun ciang nangawnin , ama tangin sun leh zan ihmuloliangin nasemin manlahden hi. Tua ahih manin mikhempeuh in zahtaka, ama hangin a pasal zong mite mai-ah maipha ngah hi. Zipil in pasal minthanna ahi hi.

I Tapidaw nuntakna-ah enkikleng Nabal’ sihna ding munah Abigail (mawhna a nei lo) in aluang kipheikham in apasal suahtakna ding avaihawm mah bangin, mawhnei nang leh kei adingin mawhna themzong aneilo Jesuh in a nuntakna hong kipiakhia hi. Abigail in galte mai-ah Nabal adingin a thumsak bangin Jesuh in Pasian mai-ah eite adingin hong thumsak hi. Tua ahih manin mawhna pan a suaktate i hi hi. Nisimin kiniamkhiatna tawh Topa mai ah mawhpulak ding pen eite mawhpuak ahi hi. Nabal bangin kiphatsakna lungsim i neih aleh gal i hausemsem ding a, Abigail bangin i pilna i zatsiam aleh i innkuanbuppi- i suahtakpihzo ding hi. Paunak 14:1a “Numei pilte in innsung nuntakna khangsak a,” a cih bangin a khangto innsung pen numei pil omna hi cih i muthei hi.

Thukhupna
Zomite ngeina gamtatzia, kihozia leh Topa’ hong piaksa pianpih pilnate nupa kihotheihna in i zatsiam ding Topa’ min tawh kongzawn hi. Zomi ki-itnate khahsuahlo-in zangsiam ding hihang. I Paunak ah “Nupa kilungtuak khuakhat in zolo, khuakhat kilungtuak khuakua in zolo” acih mah bangin kilungtuak in kithukup leng kua mah in hong susia zolo” ding hi. Tua hi-in ki-it photphot lehang hong tung ding thulela khempeuh a luanzianopin, a pilvaivive hong hita ding hi. Tua pen Topa in ei Zomite tungah a hong piak thuphate lakpan thuphalian mahmah khat ahih manin, i nuntakna-ah sintawm akullo pilna zangsiam ciatni. “Itna neite a lungduai-in migi hi. Itna neite in hazatna lungsim neilo in, zong kisatheilo hi. Itna neite a kilawmlo in gamtalo, hehpakpaklo, mite mawhna ciamtehlo hi. Thumanlote ah lungdam ngeilo uh a, thumante bekah lungdam uh hi. Itna neite lungkia cih omngeilo uh hi; a upna, a lametna, lungduai takin a ngaknate uh a mawkna cih omngeilo hi. Itna pen a tawntungin akip ahi hi.” (I Korin 13: 4-8.). Itna neite haigamtat ngeilo a, pilgamtat tawntung hi. Itna sungah pilna oma, tua pilna a zangsiamte milungdam ahi hi. “Itna sungah Pilna” Zomite pilna khempeuh Itna tawh kizom pilna ahih theihna dingin hanciam in mainawt ciat ni.

Source :

Ciimnuai Khuavak Vol. 2 (Laibu).
  • Blogger Comments
  • Facebook Comments

0 comments:

Post a Comment

Item Reviewed: ITNA SUNGAH PILNA. Agelh ~ Niang Lam Hau Description: Rating: 5 Reviewed By: cinpuzomi
Scroll to Top