728x90 AdSpace

Hot
Menu
Zon-ol na Donate

Latest News

Ka Gol Ciang. Agelh ~ Nang Khan Pau

Ka Gol Ciang.
Agelh ~ Nang Khan Pau


Thu masa
Mi khempeuh aneu alian in hih laimal “ka gol ciang “ cih kammal aci ngeilo mihing aom ding in ka um kei a, aom phial le zong za ah 99.9 in cingei, genngei hamtang ding in lamen hang. Ka gol ciang cih kammal pen abeisa hunte leh tulaitak hunte hilo in, mailam hongpiang ding thute a genkhol ahihi. Hih kammal pen acinu acipa adam suak nakleh apiang takpi thu hi a, kumte hong bei in hunte hongcing leh gol takpi ding hi cihpen theih sa hi napi’n, ahi zong in ka gol ciang cih kammal in ami agol bek tawh manlo’n “Ciang” cih kammal in thu tampi nagen ahihna sung ah, mailam hong tungding hunte ah Lametna/lunggulhna,  Ngimna/tupna thute leh Phulak nopna zong  akihel na hi gige himawk hi.


Lametna/Lunggulhna hi
Ka golciang, icih pen lam etna/lunggulhna hi. I tung ah hongtung, hongpiang nailo thukhat hongpiang hongtung takpi ding hi cih lametna hi.  Ka neulai in, kagolciang tan sawm zo a kawleih kakah zawh ding leh ka pa’n kei cycle hong leisak ding ong ci hi ahih kei leh ka golciang galkap bu ut ing cih bang in lametna kinei hi. Midang tuamtuam in zong  ka gol ciang ci a, lametna tuamtuam tampi neiding hi hang. Neulai thu ahih man in, I gol teh lametna bang teng nei cihzong ithei nawn mel kei a, tua mah bangin ka neulai in, lametna kaneihte tangtung hiam tangtunglo hiam cih zong a theician mel ki omlo mai thei hi. Neulai thule neulai kammal zatte lak ah a kizang munpen ahihlo hang I lunggulh le I lamette kibang kimlo ding  anuih zak huai mahmah thu khawng zong tampi om thei ding hi.  Gentehna in; aki zamun pen neulaithute lak ah, na golciang bang ut ci’n hong ki dotteh akhel nono in zong kidong thei a, tuate lak ah aki gen mun pen in ( ka gol ciang  kei Zovok ut) cih dan in, kikhel dawnna zamun mahmah hi hang.

Ka gol ciang I cihpen I neulai in, ei ngiat in lametna/lunggulhna atuamtuam I neih mah bang in, I nule pa khuapih tuipih U nau Sanggamte in zong ei tung ah hinu hipa ong golteh ci a lametna lianpi hong nei uh hi. A diakdiak in inu ipa ten ka tanu katapa a golciang mipil, milian, mihau, leh katek kahuai ciang hong vakding, hong kemding, hong khoiding  ci’n hong lamen uh a tuading mah in honglunggulh uh hi.

Ngimna/Tupna  hi
Tanthum tanli aphak lai ‘n lawmte pawlkhat tawh kam kikum/ holim thei zel in tuabang hunte ah lawmte khat in, kenbel Galkapte athau puak leh a uniform silkte uh ka muhteh  ka golciang keizong amaubang a thau golpipi pua in gamsung ah galdo ning ci hi. Pawlkhat in bel Sangsia sep noptuak sa ing, kei zong ka gol ciang sangsia sep sawm ing ong cih teh adangteng in zong ngaihsutna, ngimna leh tupna thu tampi aneihteng ongsuah khe phenphang in, holimna nuamthei mahmah  zel hi.
  
Naupan lai ahih zenzen hang,I gol ciang a thuding mukhol gelkhol in,ngimna le tupna  hoih nono kinei hi. Naupan lai ahih hang lungsim kawi kinei lo in lungsim sung om bangbang ip omlo in,thu hoih nono kisuah khia theizel a, gen kawmkawm mah in I nuih azak hun bang omthei hi. Pasan nasem minthang, Vanleng hawl siam, Siavuan, Lam bu, Galkap bu, Mipil le Mihau cihbang in I gol ciang a, itunzawh ihih zawh nading in lunggulhna, ngimna lianpi tawh kihan ciam hi. Pawlkhat ta leuleu pen video etetna pan thu pawlkhat mukhia uh a, video minta ( kineih siam ) khawng aci tawh akheltat simsim pawl khatin keibel alusu ( migilo) bupa ci hithiat thei un tuadan I zakteh kinui phengphang kawmsa in ngimna ngaihsutna te ki gentheizel hi.

Phulakna
Ka gol ciang I cihna sung ah phulakna zong kihel gige hi. Pawlkhatte pen neulai in kisimmawh phadiak thei a, tua simmawhna  athuakkha naupang ten ka gol ciang no peuhmah ong dawm kei ning ei ci’n  kiciam thei zel hi. Ka gol ciang no natek tading tuatakciang tu a nong bawldan in ong bawl kiklua ning ci’n kapsa khawng in nagenthei uhhi. phulak nopna lungsim pen hih I golciang ading I neulai pek in ki ngaihsun khol na hi mawk hi. Pawlkhat in bel phulakna pen ahoih lam in ala thei zong ki om hi.  A tamzaw ki zawng lua mahmah ahih man in, hih zawnna pen phulak kulding hi ci thei mawk uh hi. Koidan in  zawnna phula theiding zawnna icih pen nuntakna nei lah hilo a, neulai ihih zenzen hang, lawmlawm samcia lawm aw,  hauhna tawh phu ila kei dia acih khit teh lawmlawm ci’n nuikawm in, khat in onggen beh a, hanciam, thadahlo, thuman in kuhkal lecin I golciang zawnna aphu kila zo ding hi ei..ci nong in, aive mawtaw  ci a lungkim mello a kigen hun zong om thei hi.

Thu Khupna

Ka gol ciang ci a, neulai in I gol ciang ading thu tampi I gen a, lunggulhna, lam etna, phullak nopna cih bang in, lawmte tawh holim, kikum khawm theizel a, ahi zong I golciang ading thu I kigenpih I lawmte pawlkhat agol manlo a si zong tampi om hi. Pasian heppihna tawh ei damsuak a agol takpi ten I neulai ka gol ciang ci a, sepding bawlding lametna tuple ngim I neihteng bangteng hi mah ale ci a, aphawk nawnlo zong kiom khading, Pawlkhat in phawkden in hanciam takpi uh a, agah suah takpi zong kiom ding hi.  A thupi mahmah thukhat In, eigelna ei lametnate I gahsuah, alawhcing zokei zong in, Inu ipa ten eitung ah ka tate ong gol ciang hongvan, hong puah, hong zun dingte ci a, lametna ong neihte tun ei agolsuak teng in hih bek  I mangngilh lo ding thupi mahmah ding hi. Pumpi cilesa apumgol pong hilo in , ngaihsutna thumuhnate zong golsak le hang, innkuan sung, minam sung ah thuhoih la hoih tampi in ongzuan ding uh hi.
  • Blogger Comments
  • Facebook Comments

0 comments:

Post a Comment

Item Reviewed: Ka Gol Ciang. Agelh ~ Nang Khan Pau Description: Rating: 5 Reviewed By: cinpuzomi
Scroll to Top