728x90 AdSpace

Hot
Menu
Zon-ol na Donate

Latest News

Laisim a Manphatna. Agelh ~ Tg. Samuel Nas

Laisim a Manphatna.
Agelh ~  Tg. Samuel Nas


Hih thu tawh kisai in bel kei sanga thei zaw tampi tak om ding cih ka thei a, ahizongin hih lamsang sim ding tam muhloh ka hih manin kei suangneu khat ong kikokhia kik hi ning.

‘Sakol tui duhlo, kipia zolo’ cih la khat I nei a, pilna tawh kisai in hih thu man phadiak hi. Ei sung panin deihna, lunglutna leh dangtakna I neih limlim phot kei leh bangmah pianglo hi.

Tua leh mipil I cih limlim pen lai simlo omlo cih zong I lungsim kiu khatah om limlim leh deihhuai. Ralph Waldo Emerson in a genna ah, “Mipil tungtuang khat ii pilna thusim na theihnop leh a laibu simte min dong in.” na ci hi. Cihnopna ah, kuamah a pilsa a suak ki-omlo a, amau zong ana top tawm vive mah cihna hi. “I kipilsak kei leh a haisa in a suak I hi hi.” – Sia Job Thawngno

Khai le! LAISIM MANPHATNA :

1. I thutheihna hong behlap :
Laibu sungah thu hoih leh thu manpha tampitak kikholkhawm a, tuate I na sim ziauna tungtawnin I thutheihna tampi tak kibehlap thei hi. Lai Siangtho lui sungah, “Ka mite theihna kitangsap manin suksiat in om uh hi” cih khat zong na om hi. Suksiat leh khema I om loh nadingin pen thu I theih zek mah ana kul hi.

2. I pilna hong behlap banah thu hong ngaihsun thei sak :
Mipilte in kum tampi sung lai ana simna uh leh ana hanciamna uh tungtawnin a ngah uh pilna pen laibu sungah a mang ngei nawnlo dingin na khumkhawm uh hi. Tua laibute a manphatna thei a ana simsim te pen mipil hi lel hi. Tua ciang mipilte laigelhte I na sim simna in amau tawh pumpi in I kikhawlh theihloh hang lungsim tawh a kikhawlkhawl kisuak a, manpha lua hi. Mipilte tawh hun tam zang zo leng ei zong mipil kisuak ziau ding dan hi, damdam in.

3. I kimuanna(confidence) hong khangsak :
Thutheihna in I pilna hong behlap banah thu ngaihsut theihna leh ciimna cih khawng tawh hong kithuahkhawm to lai ahih manin eimah ah I kimuanna tampi in hong khangsak hi. Tua in mite lakah I mai hong tang sak a, I gamtat luhek hong nuamsak in, pahtakna zong hong ngahsak behlap lai hi.


4. Lawhcinna lamah hong kha :
Laisim pen lawhcinna hi pah sam lo cih bel I thei tek ding hi. Thu thei keei napi in zattak hetlo cih bang zong mi tampi tak om hi. Bang hang ai tam? Khatah pen, a theih uh thute nuntakpihlo uh cihna hi.

I gennop zawkin, laisimna in lawhcinna lampi ah hong kha in nakpi in hong huh ding hi. I lampi zuih sawmna lamah pen ei maiah mipil tampi ana pai khin uh a, tuate in ana tuahsa uh thute lai ah gelhin sim theihin ana koih uh hi. Tuate en i na metbawl theih ding pen thupi.

5. Nisim tha hong guan :
I pumpi hoihtaka a function theihna dingin pen ann hoih taka i nek kisam a, tua bang mahin I khuak leh I lungsim in zong ann hoih kisam den hi. Motor zong hat taka a tai theih nadingin petrol/diesil I thun zel kisam a, en zong I nisim nuntakna ah thathak I lak zel nadingin pen laibu hoih kisam hi hang.

6. Thugen leh thugelh ah nakpi in hong huh :
Thu i gen ding ciang ei theihna bek pen na kicing khin hetlo hi. Tua manin hih munah laisimna a manphatna hong kidok hi. Thu I gelh ciang zong tua bangmah hi. Tua ciang lai a na simsim te ii thugen leh thugelh pen zaknop deuh se hi. Lai tam sim mah ana thupi koikoi ei.

Hi teng banah I khuamuhna hong zaisak, hai mahmah na pan hong honkhia, hong khanglo sak, hong picingsak, I pai ngei lohna munte ah hong paisak cih khawng leh a hoih vive adang zong tampi tak zong om lai ding hi.

BEHLAPNA A LIAN NGA
1) Sim theih ding laibu tampi om a, ahizongin laibu khempeuh a hoih hi khinlo hi. Amasa pen ah, laibu hoih penin Lai Siangtho ahi hi. Laibu dang I hahkat zo kei zongin hi beek bel hahkat huai mahmah.

2) Thu hoih tawh hong vak ding, na khuamuhna hong zaisak ding leh a hoihzaw na suah theih nadinga hong challenge thei laibu pen laibu hoih hi a, tuate sim zel in. A hoih pente mah na hun hoih pia in.

3) Laibu i sim ciang laigelhte (author) tawh a kikhawl kisuak a, tua manin lawm hoih i tel bangin laigelhmi hoih zong teelhuai hi.

4) Pasian mizat minthang Spurgeon in laisim tungtang a genna ah, “In reading let your motto be MUCH NOT MANY ” na ci hi. Laibu hoih I sim pen tam veipi sim kikkik zaw dingin, a sunga thu hoih omte limtak suuk khia in notes khawng zong la zihziah lel ding, tua pen mimal takin kimetpih zaw zel hi. Laibu tampi theician mello a sim zelzul sangin master nih leh thum i neih pen kiphattuam zaw cihna dan aive.

5) I khuak in pen thu na mangngilh ziauziau thei hi. Tua manin thu hoih i sim khakte pen notebook ah tei khia zel leng, tua in I laisimna man om sak diak hi. Pen tui tawmcik in leitung a khuak hoihpen sangin na hoih ciamteh thei zaw cih mangngilh kei ni.

A tawpna ah, hun neihloh kawmkal ah LAIBU HOIH TAMPI BANGCI’N SIM THEI DING cih tawmkhat gen lai leng. Hih tawh kisai pen Lydia Roberts in Boston Globe ah ana gelh anuai bangin hong teikhia ziau ing.

-        Kamtam lo ding.
-        Bag (Ip) ah laibu pua den ding.
-        Na lukham nuai ah laibu koih ding. Na ihmut theih kei leh sim ding.
-        Hun dang sangin minit 15 in tho baihin lai sim ding.
-        Ann buk leh kizepna mun cihte ah laibu sim pak theih ding koih koikoi ding.
-        Mi punctual lote tawh kimuh ding ciang laibu tawi hamtang ding.
-        Dentist, doctor akl. lawyer khawng tawh kimuh ding ciang laibu tawi ding.
-        Traffic jam khawng ah na awk cianga na sim theih dingin car sungah zong laibu koih ding.
-        Laibu keng lo in khualzinkhia ngeilo ding.
-        Na khut ah na tawi laibu khat pen inn ah na koihcip laibu nih sangin manpha zaw cih mangngilh ngeilo ding.

Hi teng bang i gen khit ciang, challenge khat bawl nuam hang. Mite in kum khat in laibu 50 val bang simin hanciam thei uh ahihleh nang bangzah hanciam ding? Ni khatin laidal 10-15 ta beek sim ning ci-in na hanciam thei diam? Tukum in laibu 10 beek sim ning na ci thei diam? Hanciam huai lua hi aw. Ahang pen ei ading mah hi a, i pilna ding mah hi.

Source :

Thu Hoih La Hoih.
  • Blogger Comments
  • Facebook Comments

0 comments:

Post a Comment

Item Reviewed: Laisim a Manphatna. Agelh ~ Tg. Samuel Nas Description: Rating: 5 Reviewed By: cinpuzomi
Scroll to Top