728x90 AdSpace

Hot
Menu
Zon-ol na Donate

Latest News

Minam khat sungah ( Zomi leh Chin, Mizo leh Kuki). Agelh ~ Tual Khan Suan

Minam khat sungah ( Zomi leh Chin, Mizo leh Kuki).
Agelh ~ Tual Khan Suan
(November 16, 2001)


Tuhun a Zomi (Chin) a kici minam sunga om namphung (tribe) tuamtuam te in, minam (nation) khat sung pan piang hina pi’n a beisa hun in Kumpi (King) khat or vaihawmna (govenment) khat i ukna nuai ah a luang khawm ngeilo minam ihihi. Beh (clan), namphung (tribe), kampau (dialeck)te bulphuh luatna hang in minam (nation) bulphuh in ukna (administration) huangkhat sung a kalsuan khawmding ki thanem kha hi. Nidang in i pu i pa ten gam hing, tui hoihna gam a zonna uah khua a sat uh ciangin tua khua sat makai pa in “Hausa” sempah a, siah leh tang kai in,khua leh tui vaihawm zia ding thukhun leh dante a kipan pusa pasa biakna, dawi leh kau biaknate leh ngeina pawite ciang dong a ma deihna bang in gel hi. Tuahun lai in “hausa” te vanglian mahmah uh a hihmanin hausa sem in siah leh tang kaih theihna dingin mun tuamtuam ah khua kisat kawikawi hi.


Tua bangin khua thak zong in sim leh mal, sak leh khang ah kithekzak uh a; pawlkhat te mualtung lam ah, pawlkhat te zanggam ah, pawlkhatte sih tamna zang ah, pawlkhatte tei tamna zang ah cih bang in mun tuamtuam ah na teng kawi kawi uh hi.Muntuam mualtuam ah a teng uh ciang in khua khat leh khua khat kikawm zo mengmeng lo uh a, a sawt ciang in “sanggam melmak” bangin ki-en kha uhhi.Kikawm kiveh lo in muntuam mualtuam ah tang ten suak uh ahihman in a sawt ciangin pau leh ham, awkaih kilamdang tektek hi. Adeihna kibang zong a awkaih tuam, awkaih kibangzong a deihna tuamin khua khat leh khua khat pen pau leh ham ki el puak hi. Tua bang in tenna mun leh mual,khua leh tui tuam a teng sanggamte kampau pen ei tenna mun a kizang kampau tawh kibatlohnate pansan in “hih tua mun a te kampau” “hih tua khuate kam pau”ci’n minvawh uhhi.Pau paipi kibang tek hi napi’n tu hun ciangin tua bang minvawh kampaute pansan in “minam pau”a i lak man in kipumkhat ding tha pia lozaw in kikhenkhapna tha pia zaw hi.

Tua banah Zomite pen inn dongta leh tanau vai a thupi sak minam i hi a, nopna dahna ah inn dongta leh tanau neilote pen thawmhau/khua-hal mahmah in mite nuaisiahna thuak uhhi. Beh leh phung haute gualtung tuangin vang nei kisa uhhi. Beh leh phung thupi sak minam ihih bangin khangthu kan in i sut theihna ciang a pan “pu khawm” minpeuh, “pupi “minpeuh, “beh min” ding in kila a “tua pa suan leh khak teng tua te beh” cin kituam zial pah uh hi. Beh (clan) bulphuh in vaihawmna ngah dingna hanciam uh a, beh khat leh khat pen na ki-en khial kha uh hi.Beh masuan in vaihawmna a neih uh ciangin tua vaihawm khum na nuai a om mite pen tua beh min bulphuh in minam min ding in mite’n hong phuah sak uh hi. “Sukte” beh a lal lai a vaihawmna nuai a om mite pen mite’n “Sukte”minam cin hong minvawh uh a, “Zahau “beh te vaihawmna nuai a om minamte pen “zahau “minam cin mite’n hongna minvawh sak uhhi.

Tuabang in mun leh mual khua leh tui i tenna a tuam manin kampau awkaih kibanglo a ,tua awkaih zui a kibawl lai zong kibang lohi. Beh leh phung tuamna bulphuh in vaihawmzia zong kibanglo hi. Khua khat leh khuakhat zong thusia thupha om leh thukhenzia kilam danghi.Kampau awsuak zui in lai kineitek a lai gelh zia zong tuamtek pah hi.Beh leh phung tek in paizia kituam neih ciat pah hi.Tua ahih manin ukpi te khat leh khat vaihawmna kileh bulhin huangkhat sung ah luang khawmkha lohi. Tedim ukpi,Tlaisun ukpi,Zahau ukpi,Lumbang ukpi,Haka ukp leh a dang ukpi te’n a mau leitang gam ciat ah vaihawmna tuamneih ciat uh hi. Tua a hih manin tuhun Zomi/Chin a kici minam huam sungah namphung (tribe) te pen (1) Mun leh mual tuam manin kibat lohna, (2) Kampau tuammanin kibat lohna,(3) Beh leh phung tuam manin kibat lohna, (4)gam leh nam vaihawmna tuammanin kibatlohna ci’n kimu thei hi. Hih a tung a kikbat lohna te pen khang khak Zomite sungah zong zung kha lai in beisiang nai lo hi.Tua hi a minam bup huam (nation level) nasepna hih kibat lohna te pen mit sin khumtheih a hihlohna tawh kiton in, a om thu pen i san leh zuih siam ding hi a, minam bup hoih zawk na ding thu ah hih thute i kikhak tan sak loh ding kisam hi.

Chin Forum te hanciamna tawh constitution
Chin forum te han ciam na tawh Chin state constitution ding a gelh uh ka mukha a minan a ding masawn na ahih man in lungdam in kamuak hi. Gamkhat peuhah gamsung vaihawmding zia pen thukhunpi pansan aki sem dinghy a, gamsung mipi khempeuh tawh zong kisai thu a hihi. A diakdiak in Zoram banga namphung (tribe) tam in ngeina,pupa tawnzia(customs) leh kibat lohna tamna gam te a ding in thukhunpi gelhna ah pilvang kisam mahmah dinghi. Gamsung thukhunpi in gammi te a ding in bitna leh khantohna ding kalbi masa ahih mahbangin minam te kiphinna leh gam pusiatna kipatna zong ahihi. I gam a beisa hun enkik leng;I gam sung vaihawmna ding thukhunpi(constitution) omngei nai lo a, mikang te hong lut zawh 1986 kum ciangbekin “Chin Hills Regulation Acts” cih min vawh in amau(mikang )te vaihawmna leh ukna nopna ding bek a mau deihkaih tawh a gelh uh om a, Zogam a om laitawh kigelh thukhunpi cih theih in aahih zong in mipi te bulphuha kigelhi lo hi. Mikang te hong uk to to uh a, I minam ngeina ,pupa tawnzia te hong kan uh a gam ukna ah thukhenna leh vaihawmna a baihlam zawkna ding in Haka ukpi vaihawmna huamsunga I paizia leh ngeina te kaikhawmin 1917 kumin “Hand book of the Haka-Chin Custom”min vawhin lai buneu khat bawlkhia uhhi. Tuamah bang in Tedim ukpi vaihawmna huam sung om minam te a dingin 1924 kum in “Kam Hau Upadi” min vawh in lai bun a bawl leu leu uh hi.Mikang te khutsung pan in suahtakna I ngah khit ciang in Zomi te kawlte bikhalap nuai pan in ki suankhia tuan lo banah I gam kivai puakzia zui in state government leh central government kikhen lo a hih manin gam sung vaihawmna ding pen ei deihna in kigelh thei lo a bulpi pan thupiakna om bangin in gamsung vaihawm ahihi.Tua hi a, Zomi te adingin constitution gelh pen sepngei loh na sep tawh kibang ahih na sep tawh kisai in zong ii ngek mahmah laihi.

A khang cing khin democracy or suahtakna ngah gamte a ding in thukhunpi (constitution)gelhna ah upadi laimalte leh a khiatna/deihna te bek ki kumin kuate makaihna tawh kuateng kihel a kigelh hiam cih kikup a kulnawn loh hangin a tunga I gen sa mahbang a namphung(tribe) tamna, a suakta lo leh minam bup huam a thukhunpi a neingei nailo Zo/Chin gam a ding in kikup bulpi pen ding kisam hi.Hih sung ah zong constitution sunga om upadi laimal leh a khiatna te kikum lo in minam dang te tawh I kibat lohna te bulphuh in nasep paizia hong kumbek ka hihi. A hangin mimal kikim lohna mun a thukhensatna in (democracy paizia tawh kituakin ah zong in)kitamkimna omngei lo a kilang buk den hi.Lamkhat pan in gen leng a tamzaw ten zozaw den a, a tawmzaw te a ding in kong kikhak cip den hi. Tua ban ah tua constitution gelh tu te’n minamte kitamkimna (equality)leh mipi te phattuamna ding sangin namphung(tribe),beh(clan) biakna leh mimal khat phattuamna ding a thapia laimalte gelhlut theizel uhhi. Mipite kidalna lum leh tei ding ahi thukhunpi penmipi te theihloh kal in mipi te theihloh laimal te tawh ei deihna kawikaih in, zawh teh mipi te tungah namkipna/kipsakna ngenin gam bup zat ding thukhunpi hi ci a a puang khia ziau pen leitung ah kumpi na tam mahmah hi. Burma gam ah U Ni Win leh Indonesia gam ah Suharto te zong tua bangmah a hihi. Tua bang gamta ah mipi te suahtakna leh kitamkimna om lo a, gamsung ah zong kilemna omngeilohi.

Gambup thukhunpi gelhna I theihngilh loh ding leh I zangkhai ngaihsut loh ding thu tampi om hi. Abeisa minamtangthu leh tuhun minamtangthu kikal ngeina, pupa tawnzia(custom) beh leh phung thu te a kipan I tuam zekna omte pen mitsin khun lo in a hi pen ahi bang a I muh theih ding kisam hi. Tua I tuam zek nate hangin tu hun in I minam huang khatsung ah a kalsuan khawm theinailo hi hang a, huang khat sungah a pilut zo pawlpi zong om nailo hi. Hih thupen minam it taktak a nasem mi peuhmah in minam bup tawh kisai vai saina leh minam bup tawh kisai in palai or pawlpi kihelna ding munte ah ki theihmawh bawl theihding thu hi lohi.

Namphung (tribe)kibanglo mite tenna gamsung vaihawmna ding thukhunpi pen namphung(or) pawlpi tawmno khat bek thuneitu te’n deihkaih in a gelh uh mipi te namkip saklel hikei henla, mipite deih palai te in mipite deihna(the will of the people) bulphun in kitamkimna(equality) leh democracy gah leh pak te mipi te’n a zal a zo theih ciatna ding in gelhna in gamsung bitna leh khantohna kalbi ahihi. Tua bang in I sepna ah;

1.     Chin Forum(or) pawlpi khat peuh hanciamna tawh constitution gelh ahi zongin, tua munah namphung(tribe) bulphuh a kiphuan pawlpi pan a hizongin, namphung bulphuh lo a kiphuan pawlpi ahi zongin mipi deihtel makai te kihel henla,minam te kitamkimna (equality) siksan in kigelh ding kilawmhi.
2.     Ngeina,pupa tawnzia(custom) lai leh kampau, a dang kibat lohna tuamtuamte bulphunin a kisapna zui in sub-committee kikphuanin mipite deihna muhkhiat ding ihan ciam masak ding kilawm hi./ Mipi te a ding kizop theihna ding gelna(community liaison programme) bawl ding kilawmhi.
3.     Kithu zak tuahna pan hanthotna piakna(a media campaign) bawlding kilawm hi.
4.     Mipi thu ngaihkhiatna (public hearing) pen munteng mual teng ah bawl ding kilawm hi.
5.     Mipi te tung pan gelhthawh ngaihsut piakna (an invitation for written submission drom the people) bawl ding kisam hi.

6.     Mipi te hilhcian kikna bawl ding kilawmhi.
  • Blogger Comments
  • Facebook Comments

0 comments:

Post a Comment

Item Reviewed: Minam khat sungah ( Zomi leh Chin, Mizo leh Kuki). Agelh ~ Tual Khan Suan Description: Rating: 5 Reviewed By: cinpuzomi
Scroll to Top