728x90 AdSpace

Hot
Menu
Zon-ol na Donate

Latest News

Zomi Khangthak Lasak leh laphuah siam ‘Lian @ Li Anh" i Mimal taangthu tomno leh dotna, dawnnate.

Zomi Khangthak Lasak leh laphuah siam ‘Lian @ Li Anh" i Mimal taangthu tomno leh dotna, dawnnate.


Min:
 Ngul Min Lian (Minpi)
Lian, Li Anh, Minmin, Lianpu (minneu)

Suahni : 23rd February 1985

Nuu leh Pa min:
 Nuu min: Sian Kim Naulak
 Pa min: Lian Khan Suan Naulak
 Lyricist/Songwriter
 Founder & Ex – Principal Golden Harvest School, Mizoram.
 Graduate

Beh : Naulak

Marital Status:
 It’s Complicated
 Hong na telsiam un maw, gen nuam mah aih hang genlo phot ding.haaaa!

Khua lui : Lamka

Pianpih sanggam u leh nau :
• Ka u : Pa.Thang Bawi Naulak ( Medical Interpreter – Bosco-UNCHR)
• Ka nau : Tg.Pauno Naulak (Transcriber – NDTV)
• Kan nau : Nu.Cingbawi SuanKhup (Choreographer)

Khankhiatna Khua :
• Phai
• Lamka
• Aizawl leh Delhi.

Biakna Pawlpi :
 Tuiphum pawl (Baptism)

Pianthakna :
 Sia Kam Hau Crusade pan.

Pilsinna leh Sangkahna :
• Graduate (Madurai Kamraj University) (India)
• St Paul Institute leh Blue Star Academy (Lamka, India)


Ukkna :
• Lasak leh La ngaih.
• Music lam tawh kisai limlim.

Nasepna leh mapan na, kihelnasate : (Minam sung, Pawlpi sung, Kipawlna sung etc...)
 Minam sung, Pawlpi sung leh Kipawlna tuam tuam te ah sepna ahita zongin, piak khiatna tawh mapang zo nai kei ing, mapangnuam, kihel nuam lua aih hang i theihsa tek uh mah bangin kigen siatna leh kihazatna thu za koi koi kahih manin ka kihel kei zaw hi. Aih hang Minam sung, Pawlpi sung leh Kipawlna tuam tuam te ah hong kisawl nak peuh leh nial lo in hong kisawlna bang asem dingin man sa in om gige ing.

Nasep:
 Tulian in bel “Rockin’ 1000” (https://www.rockin1000.com/en/) nuai ah FullTime Musician/Vocal Performer dan sem ing, Hong kisapna khatpeuh ah lasa in Hotel/Cafe/Bar/Lounge/Private Party/Function te ah pai koi koi ing. Nasep leh Music kisai khawm theilo ahih manin nasep khol bawl phot mai ing. Tua lo hun paisa in BPO (CallCentre)
ah nasem ing, kum giat kiim ka sep zawh ciang GGS Infosolution Pvt Ltd ah Night Shift Manager za dong sem man ing.


Tupna leh Ngimna :
• Ka tup leh ka lunggulh lianpen ahih leh Gupna kician ngah a Vantung gam lut ding.
• Tua lo leitung thu ah keima mimal Music sang (Production) leh Jam Box hong ding ka ngimna ahi hi.

Laisiangtho bulphuh :
 Late 118:8
√ Mi i muan sangin Topa belh ding hoihzaw hi.

Mipilte kammal hoih leh nang i na kammal bulphuh :
• Practice makes perfect
• No man is an island
• Two heads are better than one
• Look Before You Jump
• Actions speak louder than words

Zomi namte minam vai ah na muhna leh nadeihsakna :
 Tu ciang ciang kei muhna panin Pasian hong Itna leh hong na makaihna hangin i minam Zomi te ki khangto mah mah ta hi, sim le mal, suah le tum I omna tek uah mihau, mipil, misiam zong kitam ta, mai lam hun ah tuhun sang zong hong tam sem lai ding hi.

Aih hang i milip tamzaw te in i ngeina hoih lo, ciindan hoih lote tawpsan zolo hi hang, tua hang mahin tu dong Zomi te ma kibung khawm theilo hi. Mihau, mipil, misiam bangzah hiam i om teei uh hang, a milip tamzaw te pen ki hai lai lua ahih manin minam dangte kipha in, kikheng zo nailo hi. Tua in bang hang hiam icih leh a pil lah hi khat lo, a ki khuata pilsak kitam, makai zah deihna hang tawh pawlpi thak peuh phuan nuam. I minam sungah “Sak leh Khang” ci a iki khen lai siah, tua lo in pawlpi kici a tam lai siah ki deidan na bei ngeilo ding a, zong ma ki bung khawm thei ngeilo ding hi.

Leitungbup minam vai khatpeuh a kisai ciang “Sak leh Khang” ki ci ci nawn kei ni, makaih za te ci ci zaw nawn kei ni, tavuan hong kiguan/kiseh khak kei leh zong lungdam dan a siam ding, a kiniam khiat thei ding, ma a bung khawm thei siau siau dingin a nungta Vanglian Pasian in i milip lungsim sungah thu hong gen henla, khat tek tung thupha hong pia ta hen, tua hihleh i minam hong cidam pan ding hi.


Nala Phuah zah :
 Avek pi gawmin dawng 19.

Nala sak zah :
 Keila hileh mi la hitaleh kasak tampian in ah gen thei kei mai ing.

La album na bawl zah :
 Album lian bel bawl zo nailo, hanciam laitak (Sponsored ding zong).
 Recording dan bel dawng 4 hi. Ei Zola 2 leh mangla 2.

Show leh Concert te ah nakihel zah :
 Competition dan Show ah khatvei, Concert/Function/Private Party dan bel ngavei tualeh Live Solo/Duo Show dan Hotel/Cafe ah bel 20 -25 kiim ding hive

Zomite Laphuah dan na muhna leh na deihsakna :
 I Zomi laphuak masa te lagelh te bel ala thu te mah mah uh zong hoih sa ngiat ing, lungsim ong khoih kha mah mah lathu zong tam hi, a ngaihsutna uleh a phuah dan mah mah uh zong tuhun a laphuak te in kipha zo deklo hi, tuhun khangno te i laphuah leh gelh dan nidang hun a te tawh kibang thei nawn vetlo in zong ki teh theinawn lo hi, lathu leh lakam kici zang sese nawn lo uh a tuahkhak dan dan gelhsuk bial bual uhi, tua manin kei zong ong ki gen zualpak leng Zola gelh ding haksa a sa mah mah khat kahih manin mangla vive a phuak hi zaw hi ing. Hi thei ding hileh Zola phuak in gelh nuam ngiat ihi leh lathu leh lakam mah mah zang thei leng hoih kasa hi, tualo in la i gelh ciang veinakhat neih mahmahna tawh gelh ding kisam hi, na la phuah athu hong zumpih in hong kosak nuam , hong nuihsan pawl omkhading hi aih hang phamawh savet kei in, a thupi penpen cileng laphuak tungah ka gennop mahmah thu pen i Zola lamal, lakam te zong thupi mahmah hi, tuasang a thupi zaw kan kasak khatin i la aw (Melody) mahmah hong hoih ding kisampen sa ing.

Zomite Lasak dan na muhna leh na deihsakna:
 Ei Zomi te pen lasiam lo kihi hetlo napi in khat i sak dan khatin ki copy gawp mangin tua hoih sa kei ing, Kawlte maw ahih keileh Mizote lasiam minthang thak khat peuh hong omleh tua i style copy pah cih bang danin kihih ngeingai in ka mu hi, mi khatpeuh i style copy nuam na hih vetleh ama late cover bawl lel inla asak dan linlian in sak sawm zawni, Enpakleng IC (Iron Cross) te siam sa tek ive maw ? aih hang ala te uleh a music te uh ken na ngai zel in mikang te la vive ahih lam cian in tel mah mah kahih man in Professional vai salo hi ing. Tualo siah bel i lasak siamte uh bel siam theilua mai uh sa ing, Mi i style iva copy ciangin eima puak khiat siamna hilo ahih manin, mi la, music nong copy loh dinguh hong deihsak ing. Na khat peuh ah ki gensiat na hipah pah ahihmanin mite in bang bang a gen zongin, gensiat, kona, demna nathuak uh hang nangma uukna asem nahih manin lungkiatna leh thaneem na dingin la zaw loin tha nong san na dinguh kong deihsak hi.

Zomite Music lam ah na muhna leh nadeihsakna :
 Tuma ka interview na ah ka genmah bangin ei Zomite pen Music tawh asuakkhia ngiatdan in mumai ing. Tuciang ciang gen dingin in bel Music lam ah khangtoh lam a kinawt hi ci ing, I Musician te mah mah uh zong siam cip uh. I Musicte uh zong ei neihsa, i omna gam a level tawh kituakin hoih thei mah mah lel sa ing. Enpakleng Zolia, Zotaang atam zaw Pro Musician ahih loh uh hang eima a ding khawm ciatin guitar/music ki tum thei tek hi. Tua manin Pasian in Zomi leh Music atonkhawm, kizui totoding ahongsiam hinteh aci kahi hi. Bektham lo in tunai G-Force ate hita leh Idol ate, i khangno lasiam leh tumging tum siam aki selsim tampi na om mawk hi, amau te in hong theihpih loh uh hang a sim in na lungdam pih mahmah ing, tua ci zaw deuh leh cih ding om kei in ah ka deihsak mah mah thu in Musician khat ihih buang leh eima idea own composition music khat lim lim nong neih theih ding uh thupi sa ing, Tualo in a thapiading Zomi milip aneu, alian in i mawhpuak na uh tello hi hang, tha kipia nuamlo ihhiam? cihpen kei leh kei kakidot ngei thu ahi hi. Tuaban ah i theihsa bangin ei Zomi tebel khatsiamna (Talent) khat neita leh siam ei, hoih hi cihsangpeuh gensiatlam ki hatzawpian theizel mawkin, tuapen khasiat huai banah hoihsa hetkei mawk ing. Zomi milip aneu, alian in thapiak siam keileng a omlai akisel sim khangno lasak uukna anei leh tumging tum thei leh uukna anei nu, maw anei pa hong kizang khia ngamlo ding ahih manin akua mapeuh nulepa ulenau thapiak siam ni cih Zomi Musician khempeuh sik leh tang in kong ngetna hipah hen. A tawpna dingin lasak siamte leh Music tum siamte tung bek hizaw lo in Zomi ten i kisap mah mah khat om a ka theih tua in Audio/Sound Engineering ahi hi. A hanciam zo ding i omleh hanciam dih ni ei guai.


Zomi Piltung tuang Madawkte lak pan etteh huai nasak diak teng leh etteh taak nasakna ahang : (Atawmpen mi3)
1. Late Dr. Vum Son
2. Late Dr. Cin Do Kham
3. Late Rev. Khup Za Go

 Pilna lam hitaleh vai khatpeuh ah a minam a itna uh, a awlmawhna uleh a veina te uh hangin a vekpi mah un etteh huai kasa pah hi. Ka minam leh gam it ing ci in awng awng se takei leh uh zong a minam a veina uleh Zogam a itna uh kilang veve hi. Tua banah Zomi nam pen minam picing khat a hihna muhtheih ding a tangko ko te leh a kilangsak te zong amau te mah ahi hi uhi. Tuni in amaute eite tawh a hong nungta khawm nawn kei phial uh zong a minam a itna, a awlmawhna, a veina te uh ngaihsun, gelpha, phawk kik in eite mah hanciam in i sutzop dinguh i milip uh tavuan, mawhpuak na ahi hi. Amaute i kipiak khiatna leh a hanciam nate uh muk leh kam tawh gen zawh ding hilo a, amaute hang mah in Zomi te hiciang a khangto leh a ki tung zo bek ahi hi.Hi teng hangmah in etteh huai uh kasa hi.

Gamdang na zin nasa Gamte :
 Haaa… India leh Kawlgam simloh gampam sik kha nailo.

Mundang gamdang na painopna gam 3 :
1. USA
2. Europe
3. China.

Leitung ah lasak siam nasak mi 3 :
1. Jon Bon Jovi (Bon Jovi)
2. James Hethfield (Metallica)
3. Joey Tempest (Europe)

Zomi sung ah lasak siam nasak mi 3 :
1. Cingsan
2. Pauno (Lengtong)
3. Mimin Baite (White Dove)

Zomi sung ah laphuak siam nasak mi3 :
1. Pauno (Lengtong)
2. Thawn Kham
3. Stephen Mang

Zomi sung ah music siam nasak mi3 :
1. Cinpi (Lazy Club)
2. SK.Go Hau (Lengtong)
3. Zen Lian

Zolai tawh aki bawl laibu na deih mahmah bu 3 te :
1. Laisiangtho
2. Hauhna leh Khansauna Thu Guuk (Gelh – Sia. Do Khup)
3. Zomi In Ka Suak Hi (Gelh – Late Rev. Khup Za Go)

Manglai lakpan laibu na deih penpen 3te :
1. Holy Bible
2. Zo History ( Gelh – Late Dr. Vum Son)
3. Redeeming Love (Gelh – Francine Rivers)
Lai simna i Manphatna leh Athupitna' na muh dan tawm nong gen thei diam?
 Laisim i manphatna tampi tak om hi, LST Paunak sungah As You Sow So Shall You Reap cih a om bangin na mailam nuntakna anop theihna ding nang i khut sungah om hi, Laisim lo pi in laipilna ki ngah theilo a, mipil leh mihau khat i suahtheih na dingin laipil na kisam hi tua laipilna i ngah theih na dingin lasim loh hong kiphamawh hi. Lai i sim laitak in a gah ki mu in kilo thei pah lo hi aih hang na mailam nuntakna dingah tu a na laisim na leh na hanciam nate a gah alo ding na hizaw hi. Tua ahih manin laisim na icih nak pitakin manpha kasa hi.

A tel baih pen ding khat genpak leng laisim leh laisim lo mihing khat i nuntakna bek ah zong nak pitakin a ki lamdang na om pah hi, a hau lai a sim khat leh a haukhat mah lai a simlo khat i sum ngahna, zeek na leh zatna mah mah zong ki banglo pah a tuamah bangin a pil a kigen laisim khat leh apil a kigen mah lai a simlo khat i ngaihsut na zong tongh leh lam in ki khia pah hi bang hang hiam cileh lai ana sim vet lote them in a thu muhna uleh athu theihna mah mah uh zong na tawi zaw hamtang ahih man na hizaw hi. I minam sung enkik pak leng lai pilna neilo makaih za tuh nuam pong in ki phasak nuam lai tualeh leh laisim lo a ki pilsak nuam i tamluat manun i minam sungah buaina piang den hizaw hi. Bek tham loin tuhun ciang i omna leh gam te zong khangto ta ahih manin khuapi nuntakna, nek le taak zonna ah zong laisim te mah in sepna hoih mu uh a, a khasum sanguh zong na hoih pah hi. Tua ahih manin Margaret Fuller in Today Reader, Tomorrow Leader na ci liang hi, hih thupil teng bekin zong laisim ding a thupi na gen khin kasa mah mah lel hi.

Kizopna ding :
 F-15, 1st Floor (F Block)
Vikaspuri, New Delhi, India-110018
Cell-9871462011
 Email: li.anhnaulak @songwriter.net
li.anhnaulak @musician.org
li.anhnaulak @gmail.com
Illuxionofdeath@gmail.com

A lasakte ngaihtheihna ding link :
Audio Link: - https://www.musicwhim.com/band/theiod
Video Link: - https://www.facebook.com/IlluxionOfDeathSxf/videos/

Dotna abawl :
Cinpu Zomi


www.laibusaal.com
  • Blogger Comments
  • Facebook Comments

0 comments:

Post a Comment

Item Reviewed: Zomi Khangthak Lasak leh laphuah siam ‘Lian @ Li Anh" i Mimal taangthu tomno leh dotna, dawnnate. Description: Rating: 5 Reviewed By: cinpuzomi
Scroll to Top