728x90 AdSpace

Hot
Menu
Zon-ol na Donate

Latest News

Zomite USA ah. Agelh ~ Nang Khan Pau

Zomite USA ah.
Agelh ~ Nang Khan Pau


Thumasa
Gamke (state) 50 kigawmkhawm US gam in, July 4 1776 kum in Great Britainte kiangpan Gam suahtakna nangah uh a, gamsuah takna angahzawh kum zanih val khin himah leh, tuhun teh leitung ah minam  khempeuh, avom akang khempeuh utna mun cileng kikhiallo ding a, tua aut mite lak ah Zomite zong tampi na kihel hi cihpen amasa in gennuam hang. Asia gampan in ei Zomite i hih leh US ah khangkhatna ki hipan ding in ummawh  ing, ei sang amasa zawdeuhte sungah Minam Pawlkhat gentehna; Japan,Sen leh Korea minamte cihbang hi uh a, amaute ahih leh USA leitang ah  khang ngana bang na hita uh hi.


Zomite Omna
US gampen Gamke (State) 50 kigawm gamkhat ahih mahbang in, mun leh mual lian mahmah a, gamke khat leh khat pen kikawm nading zong hamsa hi mah leh US itun ziale dan kibang kimlo ahih man’n Iomna munzong hong kibang kimlo pah hi. Pawlkhatte behlephung omna tanau omna munmun ah kidelh, kizuan uh a, atamzaw pawlkhatte leuleu in tun masakna munmun ah kikhuasa suak uhhi. Zomite munlemual, innlelo tawh  kician in gamke 30 sung ah kithehzak in ki om a, tua lak ah Okalahoma gamke huam Tulsa ah Zomite atampen ki khuasa hi. Georgia, Tennessee, Texas cihte ah mimal in tulkim ki om ding a tualo adang State sawmnih valte ah za pan za sagih kikal ki om kimding in ki lamen  hi.

Nuntak khuasak zia
Nuntak khuasak zia pen mimal khatle khat kibangkim lo ding himah leh nisim I phutkhak thule la te ahuampi in kibangkim pian lel hi. Zomite US gam ah khang masate I hih mahbang in paule ham atheilo  kitamzaw  a, nasepna zong atamzaw  aniampen lam ah kisem khapah hi. Nasep lam ah hawmthawhna omlo in, ahi bangbang lungkimtak in asemzo pawl lak ah kihel bilbel ihih man in, sepna peuhpeuh ah  makai lawm le gualte pahtak maipha na ki ngah bilbel hi.  Pawlkhatte Company ah naitha tawh asem om in, Pawl khatte in Sushi seppi in nei uh a, Pau athei zaw deuhten Kamphen leh agency tuamtuam ah asep kawm un, pawlkhat in Pastor, Pasian nasep tawh thuah uh hi. Mimal sumzonna  Gentehna; Super market leh Small business aneipen   khutme kuaile hang kisim theilai ding hi, ki tawm mahmah lai cihna hi. ( khangthak ten pilna siamna tawh munleh mual hoih ah pamun lianpipi ngah in ong makaito ding I lam etna le i lunggulhna hi).

Upna le Biakna
Gamdang Itun man in gamdang biakna ah piangthak ki omsamlo in, Khang masa ten Zogam pan a, izuih I pom teng mah kilen tinten suaklai hi. Laipian upna azui ten laipian mah na hisuak uh a, Yahweh te Yahweh mah, Roman Catholic ten Roman catholic mah, Protestant ten protestant mah ah nakip suak uh hi. Biakna sung ah Upna Pasian I neihbeh loh hang in, Zogam ah aom mello pawlpi tampi kipiangsak hi. Adiakdiak in protestant upna azui thu um mite sung hipha diak a, tuate ahihle , Mission Church, Christian Church, Community Church, Fellowship Church cihbang pawlpi minthak tampi ong piangkhia hi.  Mimal tampi aki omna khuate ah Zogam a izuih pawlpi minciat ah kipawlkhawm in, Mimal atawm omna khuate ah upna kibang kimlo ahih man in, hih bang pawlpi minthak a hongpiang khia hiding in, upmawh huai hi. Biakna pawlkhatte pen mipi in siading zong tawm in, pawlkhatte leuleu in, Sia in apawlpi mi ding zongtawm cih bang in kipan uh hi.

Biakna le upna sung ah kimakaih zia kibang kimkhinlo ding himah le Sia Pawlkhat pen itenna gam ah tax (siah) apialo kitam tuak mahmah hi.  Tax file noplo man cih zong hituan lo in, siate khasum aki piakteh Pay roll tawh piakding kiphawk khalo ahih man in isia ten vai khat peuhpeuh agel alei sawmteh credit neilo uh ahih mah in, Haksatna nengneng phukha zel uh hi.

Thu khupna
US gam ah Khangmasa i hih man in, na khempeuh ei ading athak vive hi a, muh ngeilo, sep ngeilo, neih ngei loh theihngeiloh  cih bang in ngeilo vive kigawmna ahihi. Tua mahbang in omdan ngeina leh khuasak zia zong kibanglo ahih man haksatna tampite sung ah kinungta kigamtang ahih mah bang in, khantona gam ah khuasat thak  Zomite hi mawk hihang.

Laigelhpa Sia Nang Khan Pau hi.

  • Blogger Comments
  • Facebook Comments

0 comments:

Post a Comment

Item Reviewed: Zomite USA ah. Agelh ~ Nang Khan Pau Description: Rating: 5 Reviewed By: cinpuzomi
Scroll to Top