728x90 AdSpace

Hot
Menu
Zon-ol na Donate

Latest News

Na Dahciang Kaplel In! Agelh - Tuang Za Khai @ Khaikok (101)

Na Dahciang Kaplel In!
Agelh - Tuang Za Khai @ Khaikok (101) 


“Na upna sang’in na launa na liatsak zawk laiteng,
na mailam ding khempeuh a khaktan cip nahi hi.”
~ Mary Manin Morrissey

April kha sung, Monday ni khat, khuapha sitset in-nitaang silsial hi. Tua nitaang silsial nuai ah ka it mahmah kapi te nih tawh nuamtak in ka holim khawm uh-hi. 

A zingteh, Tuesday ni; upmawh-hetloh pi-in ka it mahmah kapi khat in hong sihsan vat mawk! Bangmah kam ki vaikhak na ommanlo pi-in hong nusia vat ahih manin ka khasiat dan kigen zolo hi. 

Ni dangin ahihleh khatvei teitei teh dahna leh sihna hongtung ding cihthu ka ngaihsun thei zelzel hi. A hi zongin tuabang thute thakhat in hongtung vat dingin a ngaihsun thei vetlo kahi hi. 
Kap nuam mahmah ingh… Dah mahmah ingh… 
Ahih-hang’ ka khitui malkhat mah ataak-khiat ding ka lungsim in khensat zolo hi. Ka nute ka pate leh ka sia te in: “Pasal ihcih pen khasia pahpah lo-in, akap mawkmawk lo te ahi hi…” Ci-in thu hong hilhna te uh ka phawk kik-kik hi. Ka mit-tui luangin kakah khiat khak ding laulua kahih manin adah vetlo bangin ka om veva deep hi. Kap lo ding, kap ngiatlo ding!!! Ci-in ka lungsim tawng pan tha ka lala hi. 


A sawtlo in Hanmual-lam zotna dingin hun ki bawl diaidiai ta hi. Ka dahna, ka khasiatna te’ hangin aluang ding kamit-tui kadaal daal thapaih na hangin ka gim-mahmah ta hi. Khuapih tuipih te leh khuaveng meltheih te hongtung litlit in, kapi’ kiangah kap ngeungeu uh-hi. 

Amau te’ kah kamuh teh, ka kahsuak semsem napi, kap ngiatlo ding cih ka khensat tinten hi. Mi tua zah lak-ah pasal pipi kap lawmlawm hong ki cih ding ka ut hetkei hi. Pasal kahih manin a kap hetlo kahih lam a maute ka theisak nuam mahmah hi. 

Ka Uu, kapi’ kiang naihtak in tu khinkhian aa, akiang uah kapi a kipuak khiat nading kibawl lingling hi. Tua te ka muhteh ka lungsim tamzan didek hi. Ka pi ka it mahmah hiven! Aman’ zongh kei hongit mahmah, keitawh ki gamla in a-om ding nangawn alungnuam ngeilo, hong mitsuan ngaungau ka pi hi aa, tu’n sihna in hong khenkham hita.Cih thuteng a banban in ka ngaihsunsun hi. Tua ka ngaihsut thute lah sigaal hongpai te in hong theihpih hetlo uh!!! 

A nunung pen vaikhakna nei dingin meltheih tengin kapi’ lupna lam zuan diamdiam uh-hi. Ken’ zongh amau nung zui-in, ka pi kiang ka naih a, a nuntaakna-a-om nawnlo ka pi’ maitang ka muh teh leitung ah kadah penpen hun hongtung taktak hizen maw, cih kaphawk hi. 

Kei adingin ka pi kamuh tawpna hita!!! A sawtlo in daainawl ah kivui-in, a tawntung in a kimu ngei nawnlo ding himai! Cih ka ngaihsut-teh ka lungtang nalua, ka cihna ding meltheilo in kasan bialbual hi. Ka pi’ luang-gei ah ka innkuan un kam vaikhak dingin ka pai uh-hi. Kum (15) kiim phapan kahih manin, ka pi ka neh ngam vat kei hi. Ahi zongin ka nu in kalu pan hongpom in ka pi’ kianglam hoihtak in hong naihsak hi. Ka nu’ khut kiptak in kaleen aa, kakah khakloh nading kaki-ip tentan hi. 

Ka pi’ mai-ah ka khukdin petpet uh teh ka khitui a luangkhia lodeuh lian bekmah ahi hi. Ka nu in ka pi’ khut hong leensak in ka pi kam vaikhak na nei hi. Misi te’ khut lenngei nailo kahih manin kalau giauguau hi. Ahih hang’ ka pi ka itna hangin kalau na hongveng hi. 

Ka pi akhut avot didek simloh kei hong khoih ngeina mah banglian lai hi. Ka nu ka nunghei leh kah cihtak in nakap ngekngek hi. Ka nu’ kah ka muhteh, ka pi ka it baanah kanu mahmah zongh hehpih-huaisa kahih manin kakah hongsuak mahmah hi. 

Ka nu hehpih lua kahih manin, tutna khat ah ka paipih hi. Veng leh pampan meltheih te khat khit khat in a dahna thu-uh honggen lingling uh hi. Kei zongh amau’ hong hehpih na leh ka pi a itna hangun ka lungdam na in, kamai a tai zawhna ding hanciam in kazum nuih hiuhuau pong hi. Banghang hiam cihleh, pasal ihcih pen, alungsim khauh, a kap dingin a kilawm hetlo hiven!!! 

Tua nitaak sung tawntung, ka lungsim ka hihtheih zahin ka khauhsak hi. Ka mit-tui luang ding hong kithawi teh cilvalh liangin kadaal vanvan hi. Pasal pipi kap buanglo ee!! Kap zenzen lengh mi thupi lo, mi meidawi pi hiding hivengh!! Ci-in kei leh kei ka lungsim ka khauhsak thapaai hi. A zingteh, ka nu in zingsangtung in hongphong hi. Maan (limlang) mai ah ka ki en aa, kahloh ding mah ka khensat zo saam hi. A dah mahmah ka nu tha apia ding kei hi-ingh aa!!! 

Biakinn ka tun’ uhteh misi puakna Mawtaw vom sungpan ka pi’ luanghawm hong ki lakhia in, biakinn pi sungah ki lutpih liailiai hi. Ko innkuan ahih leh ka pi’ luang-gei ahi, a mai penpen ah katu uh-hi. Hun kipat ma in ka sang-gam ka nu ka pa te ahih uh leh alungsim uh ip zolo in kap ngeingai mai uh-hi. Kei kahih leh kap ngiatlo ding, cih khensat in ka om tentan hi. Bang hang hiam cihleh pasal cih pen kap mawkmawk lo ding, lungsim khauh vailo lua… 

Thuhilh (sermon) pa hong dingto in, ka pi a damlai thute; ka pi mi thupi ahihna zia leh midik mihoih ahihna zia te abanban in hong gen toto hi. Tua tak teh kahloh phamawh in apiang ding daan himai ta hi. Thuhilh sia pa in a thugen te hongzom to in:- 

“Ih pi pen alungsim hoih, migi, itna nei-in, atu ata te akhual ngaungau khat ahi hi. A innsung leh abeh aphung sungah itna-anei mahmah khat hi aa, hehpihna-anei tawntung nupi khat zongh ahi hi. A diakdiak in, atu te naak it phadeuh kasa hi. A nu leh apa te naseem dingin apai khiat khit simin, atu te itna tawh hoihtak keemin khoi aa, a lungkim theihtheih na dingun ciamnuih pih niloh hi. A tupa in zongh a pi’ itzia tel ahih manin, a pitu’ un nuamsa in apai na peuh uah kizui kawikawi mai uh-hi. A kikhen ngeilo pitu te ahi uh-hi.” Ci-in mipi’ mai ah thu hong-gen takteh; Aw… ka pi’ damlai aa, ka omkhop hunte uh anuam pen hitah maw? Cih ka pawk-kik san hi.Tuk hun teh ka pi tawh la kasin khop hunte uh, phalbii hunteh ka inn-nung ua mualdung tengah ka pi-in hong kimawl pihpih hunte khat khit khat ka mitkha-ah hongsuak daudau hi. 

Ka nuntaak hunsung anuam aa kangaihsut hun khempeuh ka pi tawh ka om hunteng lian hi zen!! Tu in aman’ hong nusia ta!! Ka lungnop nading om ngei nawnlo ding!! Cih te ka ngaihsut sut teh kiip zo nawnlo in, kakap khia beba mai ta hi. Ka dahna leh ka khasiatna zia kuakua’ muh ding lau zo nawnlo in, hong ki neumuh ding zongh phawk-khak in ka nei man-nawn kei hi. Bang hanghiam cih leh, kasep dingin akilawm khat ahih lamzongh athak in katel cian theita hi. 

Ka pa in kakah-hongza in, a-ang ah hongpom khit-teh, ka nih un kakap ngekngek mai uh-hi. Ka nu leh ka Uu zong leitung ki tamzaan ding zah dongin kap zuazua mai uh-hi. Tua hun laitak in Pasian’ mai ah kei leh kei-in kamciam khat ka pia hi. Nidang teh Pasian in suan leh khak hongpia in, tu leh ta katawi khak zenzen leh, kasih ma teitei in, kamkhat ka vaikhak hamtang ding hi. Tua ka vaikhak nop kammal pen: “Pasal hoih, pasal thupi-ih cih te pen, kineih khem ngeilo uh-hi. A dah uh teh kapngam in, a lungdam na uah anui ngam te ahi hi.” Ka cih sawm hi. 

Kei a dingin ahih leh lungkim tak a ka vaikhak, ka it mahmah ka pi ahih lam phawk theita kahih manin, ka lungnuam mahmah ta hi. Ka pi ka it mahmah na, itlua kahih manin asih teh kadah mahmah na, dah mahmah kahih manin kakah ding ka ki-ip zawhloh na… Hi teng khempeuh ka pi’ tungtaang ah ahong uap mi khempeuh in thei uh ahih lam telta kahih manin, ka lungsim khat nuam zawdeuh ta hi. Kei leh kei a kikhem hi nawnlo, hangsan tak in ka lungsim sungah kathuak thu bangin a semkhia ngam pasal khat kahih lam zongh ka ki phawktheita hi. 

Jonathan Piceirillo’ gelh 
‘Cry When You Are Sad’ pan.

Tupna kician anei mi nahih leh
na tupna natun dong na hanciam zo ding hi.
Kua mah in, midang te’ sa’ng haizaw,
midang te’ sa’ng siamlo zaw,
midang te’ sa’ng hanciam zolo, citak zolo zaw,
hongci theilo uh hi.
A zenzen in midangte in hong neumuh in,
bangmah theilo, bangmah hih zolo,
mihai pi, ama tun zo kei-in teh…
Hongci phial zongin tua te thupi masa lo hi.
A thupi penpen ahih leh,
nang leh nang na kigen thu
ahih kei leh,
nang leh nang na ki muhna zia-ahi hi…
Nang leh nang bangci ki ngaihsut na hiam?
A citak mite’n ama uh tun peelmawh uh hi…

~ John C. Maxwell

Source :
A HIZOLO OMLO (Laibu).

(Tupna Kician Anei Khangnote a ding Thapiakna)

  • Blogger Comments
  • Facebook Comments

0 comments:

Post a Comment

Item Reviewed: Na Dahciang Kaplel In! Agelh - Tuang Za Khai @ Khaikok (101) Description: Rating: 5 Reviewed By: cinpuzomi
Scroll to Top