728x90 AdSpace

Hot
Menu
Zon-ol na Donate

Latest News

Neihsa Vs Lungnopna. Agelh ~ En Khat Thang

Neihsa Vs Lungnopna.
Agelh ~ En Khat Thang


Tulai leitung khuahun, Eite in, inn sangpipite lam napi hangin, i lungsimte niam semsem mawk hi. Lampi tanzau theithei zik napi hangin, i muhnate ahih leh kawcik semsem mawk hi. Sumlepai tampi zong zo semsem napi hangin, i nuntakna nuamsa lo zawsop mawk hi hang. Inn lianpipite sungah teng zo sam napi hangin, i lungsimte toi semsem mawk hi.

Eite in zulesa tawh nuamsa in om zo napi hangin, Inn lam ah i NulePate a kipan mipihte tampitak gilkial sak lai mawk hi hang. I pilna sang semsem ci napi hangin, i thu khinkhai theihna kiam semsem mawk hi. Neihlelam kibehlaplap cidep napi hangin, i mimal manphatna ahih leh kiam semsem mawk hi.

Telephone olno takin mikim phial in nei tei sam napi hangin, NulePa, Ulenau, Innkuan pihte tawh kizopna haksa sak semsem mawk hi hang. Kam tampipi pau napi hangin, kisiatna khangin ki-itna kiam sak zawsop mawk hi hang.

Mihingte khapi tung na ngawnah khualzin zo sam napi hangin, i inn vengte va hopih zo nawn lo mawk hi hang. Leitung thak zongin buai mahmah napi hangin, a omsa leitung puahlezuan sawm nawn lo mawk hi hang. Leitung gam mun tuamtuam tung napi hangin, i Zogam sungteng sik khak kim ding ngaihsun kha ngei lo mawk hi hang.

I khasumte hong tam semsem napi, i lungsim bel hong neu semsem zawsop mawk hi. Nekledawn i duh i deih ne zo, dawn zo napi hangin, i cidamna bel hong kiam hanhan mawk hi. Nupa a kopkop in khasum sangin kiom napi, Innkuan sung bel kitot kiselna tam zawsop mawk hi. Inn hoih tampi kilam behbeh napi, innkuan sung kisia tam semsem mawk hi.

I lungnop semsem na ding ci-in mihingte in, i pumpi nisim phialin nasemsem sak hi hang. A hizongin, i pumpi nasem kawmkawmin nuntakna bei lawh tampi kiom mawk hi. Tua ahih teh pumpi cilesa a ding bek ngaihsut luat ding hoih het lo hi. Nisim i tuah khak thute tungtawnin pilna laksiam huai hi. I lungsim picin theihna dingin thu theih beh ding hanciam huai hi. Laibu hoih tampi sim huai hi.

Cilesa deihna nung bek zuih khak loh ding thupi hi. Pasian thumaan thutak nisim zongin nuntak zawh ding hanciam huai hi. Innkuan pihte tawh hun lakkhop huai hi. Cidamna ding a hoih anletui kanin nek ding kisam hi. Tomkal nuntak sungin lungnuam sinnuam a, Pasian thu tawh kituakin nuntak siam ding kisam hi.

Nungta mawkmawk cih bang hih loh ding thupi hi. I innkuanpite, i lawmlegualte tawh hunnuam la in, gualnop khawm zel ding zong, thupi ngaihsut theih ding kisam hi. Inn hoih, lo hoih sumlepaite sangin KHA, LUNGSIM le PUMPI cidam na dingte thupit bawl sem ding kisam hi. Second, minute, hun khempeuh i nuntakna a ding a manpha penin zat theih ding hanciam huai hi.



Tua ahih manin, ni khat ni ciang ka Nu ka Pa lungdam sak ning, ka ulenaute huh ning, ka pawlpi a ding thupha bawl ning, ka mipihte a dingin na hoih tampi sem ning ci a, na sunmang neihte, tua ni khat ni ngak sese lo-in, tu mahmahin na hih zawh zahzah tawm leh, tam leh sem pah lel zaw in, bang hang hiam cih leh i ni tawp ni ding kuamah in thei khol lo hi hang.


Source :
Hih Thute Manpha Sa Lua Ni Teh’ Laibu.
  • Blogger Comments
  • Facebook Comments

0 comments:

Post a Comment

Item Reviewed: Neihsa Vs Lungnopna. Agelh ~ En Khat Thang Description: Rating: 5 Reviewed By: cinpuzomi
Scroll to Top